ବଲାଙ୍ଗିର, (କେପିଏନ୍ଏସ୍) : ଗଂଜେଇ କାରବାର ଏଛିନ୍ ଚହଲ୍ ସୃଷ୍ଟି କରିଛେ ବଲାଙ୍ଗିର ସହର୍ ନେ । ଗଲା ୮ ଦିନ୍ ଭିତ୍ରେ ଗଂଜେଇ କାରବାର୍ କେ ନେଇ କରି ବଲାଙ୍ଗିର ପୁଲିସ ତିନ୍ ତିନ୍ଟା ମାମ୍ଲା ସାମ୍ନା କରି ସାରିଛେ । ଗଲା ୨୩ ତାରିଖ୍ର ଘଟ୍ନା ତ’ ଚହଲେଇ ବିହିଲେଇ ପକେଇଛେ ବଲାଙ୍ଗିର୍ ଜିଲ୍ଲା କେ । ବଲାଙ୍ଗିର ପୁଇଁତଲା ଥାନା କେସେର୍କେଲା ଗାଁ ମୁର୍ସାର୍ ପଡ଼ିଆ ନୁଁ ବଉଦ୍ ଜିଲ୍ଲା କଂଟାମାଲ୍ ଅଂଚଲର ସଂଯୁକ୍ତା ହର୍ପାଲ୍ କେ ଅଭିଯୁକ୍ତ ସପ୍ତମ ବଗର୍ତ୍ତି ଅନ୍ମୁନ୍ଷୁଆ ଭାବେ ଦିହିଁ ଭୋଗ୍ କଲା ଉତ୍ରୁ ହତ୍ୟା କରିଥିଲା । ଇ’ ଘଟ୍ନାର ମୂଲ୍ ବି ଗଂଜେଇ କାର୍ବାର୍ ନୁ ହେଇଛେ । ହେନ୍ତା ଗଲା ୨୦ ତାରିଖ ଦିନେ ସକାଲୁ ସକାଲୁ ପୁଇଁତଲା ଥାନା କରୁଲ୍ ନୁ ଭାଲେର୍ ଯାଇଥିବାର୍ ବାଏପାସ୍ ରାସ୍ତା ତରା ଥି ଥିବାର୍ ଗୁଟେ ବନ୍ଧ ଭିତରେ ପଡ଼ିଥିବାର ଗଂଜେଇ ଲୋଡ଼୍ ହେଇଥିବାର୍ କାର୍ କେ କ୍ରେନ୍ ଲଗେଇ କରି ଘିଚିଥିଲା ପୁଲିସ୍ । ଫେର୍ ଗଲା ୧୭ ତାରିଖ ଦିନର୍ ମାଛି ଅନ୍ଧ୍ରିହା ବେଲ୍କେ ବଲାଙ୍ଗିର ରେଲ୍ଟେସନ୍ ପାଖୁ ଗୁଟେ କାର୍ ସାଙ୍ଗେ ୨୫ କେଜି ଗଂଜେଇ ଆର୍ କନ୍ଧମାଲ୍ ଗୋଛାପଡ଼ା ଅଂଚଲ୍ର ୪ ଜନ୍ କେ ବଲାଙ୍ଗିର ପୋଲିସ ଗିରଫ୍ କରିଥିଲା । ଏନ୍ତା ଗଲା ୮ ଦିନ୍ ଭିତ୍ରେ ଗଂଜେଇ କାର୍ବାର୍ ଥି ଗୁଟେ ହତ୍ୟା ମାମ୍ଲା ସାଂଗେ ତିନ୍ ତିନ୍ଟା ମାମ୍ଲା ବଲାଙ୍ଗିର ପୁଲିସ୍ର ହାତେ ଲାଗିଛେ । ବାରମ୍ବାର ଗଂଜେଇ କାର୍ବାର୍ ସାଂଗେ ଜଡ଼ିତ୍ ଥିବାର ମାମ୍ଲା ଦେଖିକରି ବଲାଙ୍ଗିର ସହରେ ଗଂଜେଇ କାର୍ବାର୍ ବର୍କସ୍ ଧରିଥିବାର୍ ଲୋକଙ୍କର ଭିତ୍ରେ ଜୋର୍ସୋର୍ ଆଲୋଚନା ଚାଲିଛେ । ଇ’ ଦିଗେ ପୁଲିସ ପ୍ରଶାସନ ନିଘା କର୍ବାର୍ ଆବଶ୍ୟକ ହେଇପଡ଼ିଛେ ବଲି କୁହାଯାଉଛେ ।