ବଲାଙ୍ଗିର, (କେପିଏନ୍ଏସ୍) : ପୁଣି ଅପରାଧୀଙ୍କ ନୃଶଂସତା ବଲାଙ୍ଗିର ସହରରେ ଦେଖିବାକୁ ମିଳିଛି । ମାଲପଡ଼ାରେ ଗତ ରାତିରେ ପିକୁନ ଦଣ୍ଡସନା ନାମକ ଜଣେ ଯୁବକଙ୍କୁ ଖଣ୍ଡାରେ ଆକ୍ରମଣ କରାଯାଇଥିବା ଭଳି ଏକ ଚାଞ୍ଚଲ୍ୟ ଖବର ସହରବାସୀଙ୍କୁ ଚମକାଇ ଦେଇଛି । ସୂଚନା ଅନୁସାରେ ସ୍ଥାନୀୟ ମାଲପଡ଼ାରେ ପିକୁନଙ୍କ ଘର । ପିକୁନ ଖଣ୍ଡା ଆକ୍ରମଣର ଶିକାର ହେବା ପରେ ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଭୀମ ଭୋଇ ମେଡ଼ିକାଲକୁ ନେଇଥିଲେ । ଅବସ୍ଥା ଗୁରୁତର ହେବାରୁ ତାଙ୍କୁ ବୁର୍ଲା ସ୍ଥାନାନ୍ତର କରାଯାଇଛି । ସେ ରାସ୍ତାରେ ଚାଲିଚାଲି ଯାଉଥିବାବେଳେ ୪ଜଣ ଯୁବକ ଆସି ଖଣ୍ଡାରେ ଆକ୍ରମଣ କରିଥିବାବେଳେ ପିକୁନ ଦୌଡ଼ି ପଳାଇବାକୁ ଚେଷ୍ଟା କରିଥିଲେ ଓ ୪ଜଣ ଯୁବକ ଗୋଡ଼ାଇ ଆକ୍ରମଣ କରିଥିଲେ । ଆକ୍ରମଣର କାରଣ ଜଣାପଡ଼ିନାହିଁ ।