କେସିଙ୍ଗା, (ପ୍ରୀତେଶ ପଟେଲ) : ସ୍ଥାନୀୟ ବୃନ୍ଦାବନ ସାଂସ୍କୃତିକ ଅନୁଷ୍ଠାନର ସଭାପତି ସୁଶାନ୍ତ ମହାପାତ୍ର ଓ ସମ୍ପାଦକ ଅକ୍ଷୟ ଦାସଙ୍କ ଆମନ୍ତ୍ରଣ କ୍ରମେ ଅଞ୍ଚଳର ସାମ୍ବାଦିକମାନଙ୍କୁ ନେଇ ଏକ ପ୍ରେସ ଇସ୍ତାହାର ପ୍ରକାଶ ପାଇଛି । ଏହି ଇସ୍ତାହାର ଅନୁସାରେ ଚଳିତ ମାସ ୨୨ ଓ ୨୩ ତାରିଖ ୨ ଦିନ ଧରି ଜଗନ୍ନାଥ ମନ୍ଦିର ପଡ଼ିଆରେ ଅନୁଷ୍ଠାନ ତରଫରୁ ଲୋକକଳାକୁ ନେଇ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମମାନ ପରିବେଷଣ କରାଯିବ । ଏହି ଦୁଇ ଦିନିଆ କାର୍ଯ୍ୟକ୍ରମରେ ବିଶିଷ୍ଟ ବ୍ୟକ୍ତିମାନେ ଅତିଥି ରୂପେ ମଞ୍ଚାସୀନ ହୋଇ ବିଭିନ୍ନ ମନ୍ତବ୍ୟ ଦେବା ସହ ମଞ୍ଚ ଶୋଭାମଣ୍ଡିତ କରିବେ । ଏହି ଅବସରରେ ଶିଶୁରୋଗ ବିଶେଷଜ୍ଞ ଡଃ. ପଲଉ ପ୍ରଧାନ, ଘୁମୁରା ଗୁରୁ ମାର୍କଣ୍ଡ ନାୟକ, ସଙ୍ଗୀତ ନିର୍ଦ୍ଦେଶକ ମନୋରଞ୍ଜନ ପାଢ଼ୀ, ସମାଜସେବୀ ରାମ କୁମାର ଜୈନ, ଅବସର ପ୍ରାପ୍ତ ଶିକ୍ଷକ ରବୀନ୍ଦ୍ର କୁମାର ଧଳ, ସାମ୍ବାଦିକ ଅଂଶୁମାନ ପାତ୍ର ଓ ନାଟ୍ୟ ନିର୍ଦ୍ଦେଶକ ମନୋଜ ରଥ ପ୍ରମୁଖଙ୍କୁ ସେମାନଙ୍କ ପେଶାଗତ କ୍ଷେତ୍ରରେ ଉଲ୍ଲେଖନୀୟ ସଫଳତା ପାଇଁ ସମ୍ମାନିତ ହେବାର କାର୍ଯ୍ୟକ୍ରମ ରହିଛି । ଏଥି ସହିତ ଅତିଥିମାନଙ୍କ ବୈଠକ ପରେ ଜିଲ୍ଲା ତଥା ରାଜ୍ୟସ୍ତରୀୟ ସାଂସ୍କୃତିକ କାର୍ଯ୍ୟକ୍ରମମାନ ପରିବେଷଣ କରାଯିବାର ମଧ୍ୟ ପ୍ରେସ ଇସ୍ତାହାରରେ ପ୍ରକାଶ । ଏହି ବୈଠକରେ ବିକ୍ରମ ବାରିକ, ଡ଼ଃ. ହରେକୃଷ୍ଣ ଧଳ, କେସିଙ୍ଗା ମହାବିଦ୍ୟାଳୟ ପ୍ରିନ୍ସିପାଲ ସୁଶାନ୍ତ ପାଢ଼ୀ, ଜ୍ଞାନେନ୍ଦ୍ର ମହଲା, ଅମୀୟ ନନ୍ଦ ଏବଂ ଅନୁଷ୍ଠାନର ଅନ୍ୟାନ୍ୟ କର୍ମଚାରୀ ଉପସ୍ଥିତ ଥିଲେ । ଶେଷରେ ଶ୍ରୀ ନନ୍ଦ ଧନ୍ୟବାଦ ଅର୍ପଣ କରିଥିଲେ ।