ଭୁବନେଶ୍ୱର : ତିନି ଦିନର ଛୁଟି ପରେ ପୁଣି ସରଗରମ ହେବ ବିଧାନସଭା । ଆଜି ବିଧାନସଭାରେ କୃଷି ଓ କୃଷକ ସଶକ୍ତି କରଣ, ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ, ଶକ୍ତି, ସମବାୟ, ମତ୍ସ୍ୟ ଓ ପଶୁ ସମ୍ପଦ, ବୟନ ଶିଳ୍ପ, ହସ୍ତତନ୍ତ ଓ ହସ୍ତଶିଳ୍ପ, ସୂକ୍ଷ୍ମ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ, ବିଜ୍ଞାନ ଓ କାରିଗରୀ ବିଭାଗର ପ୍ରଶ୍ନକାଳ ରହିଛି । ଦ୍ୱିତୀୟ ପର୍ଯ୍ୟାୟ ଅଧିବେଶନର ପ୍ରଥମ ଦିନରୁ ଦୁଇ ବିରୋଧି ଗୃହରେ କଡା ଆଭିମୁଖ୍ୟ ରଖି ଶାସକ ଦଳକୁ ଘେରୁଛନ୍ତି । ଏହା ଶାସକ ଦଳ ପାଇଁ ଚିନ୍ତାର କାରଣ ସାଜିଛି । ଅନ୍ୟପଟେ ବିଶୃଙ୍ଖଳା ଆଚରଣ ପାଇଁ କଂଗ୍ରେସର ୧୪ ଜଣ ବିଧାୟକ ନିଲମ୍ବନ ହୋଇଛନ୍ତି । ତେଣୁ ଅଭିନବ ଉପାୟରେ କଂଗ୍ରେସ ବିଧାୟକମାନେ ଏହା ବିରୋଧରେ ପ୍ରତିବାଦ ଜାରି ରଖିଛନ୍ତି । ନାରୀ ନିର୍ୟ୍ୟତନା ପ୍ରସଙ୍ଗରେ କଂଗ୍ରେସ ହାଉସ କମିଟି ମୁଖ୍ୟମନ୍ତ୍ରୀଙ୍କ ବିବୃତି ଦାବି କରି ପ୍ରତିବାଦ ଜାରି ରଖିଛି । ମୁଖ୍ୟ ବିରୋଧୀ ଦଳ ପକ୍ଷରୁ ମୁଲତବୀ ପ୍ରସ୍ତାବ ଦିଆଯିବ । ଶୂନ୍ୟକାଳରେ ବିଜେଡି ବହୁ ଗୁରୁତ୍ଵପୂର୍ଣ୍ଣ ପ୍ରସଙ୍ଗ ଉଠାଇ ସରକାରକୁ ଘେରିପାରେ । ସେହିପରି ଶାସକ ଦଳ କିଛି ବିଲ୍ ଗୃହରେ ଆଣିପାରେ । ଯାହାକୁ ନେଇ ବିଧାନସଭା ବେଶ ଉଷ୍ମ ହୋଇପାରେ ।