ନୂଆପଡ଼ା, (କେପିଏନ୍ଏସ୍) : ନୂଆପଡ଼ା ଜିଲ୍ଲା ସିନାପାଲି ଅବକାରୀ ବିଭାଗ ଚଢାଉ କରି ଲକ୍ଷାଧିକ ଟଙ୍କା ମୂଲ୍ୟର ବିଦେଶୀ ମଦ ଜବତ କରିବା ସହ ଏକ ମାରୁତି ସୁଜୁକି ଆର୍ଟିକା (ଓଡ଼ି ୨୬ଇ ୮୦୩୨) ସହ ଟଙ୍କେଶ୍ୱର ଦଣ୍ଡସେନା (୩୨) ନାମକ ଯୁବକକୁ ଗିରଫ କରି କୋର୍ଟ ଚାଲାଣ କରିଛି । ସୂଚନା ଅନୁସାରେ, ଉକ୍ତ ଅଭିଯୁକ୍ତ ଜଣକ ଖଡିଆଳ ସହରରୁ ସିନାପାଲି ବ୍ଲକ ଧିଙ୍ଗିଆମୁଣ୍ଡା ନିଜ ଗ୍ରାମକୁ ବେଆଇନ୍ ଭାବେ ଗାଡିରେ ଉକ୍ତ ବିଦେଶୀ ମଦ ଆଣୁଥିଲେ । କୌଣସି ସୂତ୍ରରୁ ଖବର ପାଇ ଯୁଗେନପଦର ଛକ ନିକଟରେ ଅବକାରୀ ବିଭାଗ ଚଢାଉ କରି ବିପୁଳ ପରିମାଣର ବିୟର ଓ ବିଦେଶୀ ମଦ ଜବତ କରିଛି । ଯାହାର ଆନୁମାନିକ ମୂଲ୍ୟ ଲକ୍ଷାଧିକ ବୋଲି ଅନୁମାନ କରାଯାଉଛି । ୨୯୬.୪୦୦ ଲିଟର ବିୟର ଓ ୩୫.୨୮ ଲିଟର ବିଦେଶୀ ମଦ ଜବତ ହୋଇଥିବା ଅବକାରୀ ବିଭାଗ ସୂତ୍ରରୁ ଜଣାପଡ଼ିଛି । ଅଭିଯୁକ୍ତ ଜଣକଙ୍କ ସିନାପାଲି ବ୍ଲକ କେନ୍ଦୁମୁଣ୍ଡା ଗ୍ରାମପଞ୍ଚାୟତର ସରପଞ୍ଚ ମଦନ ଦଣ୍ଡସେନାଙ୍କ ପୁଅ ବୋଲି ଜଣାପଡିଛି । ସିନାପାଲି ଅବକାରୀ ଥାନା ଅଧିକାରୀ ସିଦ୍ଧାନ୍ତ ପାତ୍ରଙ୍କ ନେତୃତ୍ୱରେ ହୋଇଥିବା ଏହି ଚଢାଉରେ ଏଏସ୍ଆଇ ସୁନା ମାଝି, କନେଷ୍ଟବଳ ମଳୟ ମହାଲିଙ୍ଗ, ରିତାଞ୍ଜଳି ଶବର, ଦେବ ସିଂ ମାଝି ସାମିଲ ଥିଲେ ।