ପଦ୍ମପୁର, (ନିରୋଜ କୁମାର ପାଣୀ) : ପଦ୍ମପୁର ସରକାରୀ ବାଳିକା ଉଚ୍ଚ ବିଦ୍ୟାଳୟର ଧନ୍ଦାମୂଳକ ପ୍ରଶିକ୍ଷକ ଚକ୍ରଧର ନାୟକ ତାଙ୍କ ଚାକିରିରୁ ଅବ୍ୟାହତି ନେଇଛନ୍ତି । ଏହି ଅବସରରେ ବିଦ୍ୟାଳୟ ପରିସରରେ ତାଙ୍କ ଉଦ୍ଦେଶ୍ୟରେ ବିଦ୍ୟାଳୟର କାର୍ଯ୍ୟକାରୀ ପ୍ରଧାନ ଶିକ୍ଷକ ଗୋପାଳଜୀ ପ୍ରସାଦ ପାଣିଗ୍ରାହୀଙ୍କ ସଭାପତିତ୍ୱରେ ଏକ ବିଦାୟ କାଳୀନ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଥିଲା । ଶିକ୍ଷକ ଶିକ୍ଷୟିତ୍ରୀ ଶ୍ରୀ ନାୟକଙ୍କ ସୁଗୁଣ ଗୁଡିକୁ ବର୍ଣ୍ଣନା କରିଥିଲେ । ପିଲାମାନେ ନାୟକ ସାରଙ୍କ ପାଠ୍ୟ ଶୈଳୀ ଓ ଛାତ୍ରୀ ମାନଙ୍କ ପ୍ରତି ତାଙ୍କର ସ୍ନେହ ବିଷୟରେ କହିଥିଲେ । ନିଜେ ନାୟକ ବାବୁ ଏହି ବିଦ୍ୟାଳୟର ରହଣୀକାଳ ମଧ୍ୟରେ ନିଜ ଅନୁଭୂତି ପ୍ରକାଶ କରିଥିଲେ । ଛାତ୍ରୀ ମାନଙ୍କ ଅନୁରୋଧ ରକ୍ଷା କରି ରାଇମୋହନଙ୍କ ଅଭିନୟ କରି ଦେଖାଇଥିଲେ । ରବିନା ପଧାନ ସଭା ପରିଚାଳନା କରିଥିବା ବେଳେ ମାନସ ରଞ୍ଜନ ଶତପଥୀ ଧନ୍ୟବାଦ ଅର୍ପଣ କରିଥିଲେ । ସଭାରେ ଶିକ୍ଷୟିତ୍ରୀ ପୂଜାରାଣୀ ନାୟକ, ସଂଯୁକ୍ତା ଭୋଇ, ବୃନ୍ଦାବତୀ ସାହୁ, ଖୁସବୁ ବରିହା, ଜ୍ୟୋତିରେଖା ମହାନନ୍ଦ, ପ୍ରଭାତୀ ପଟ୍ଟନାୟକ, ମମତା ମିଶ୍ର, ନୀଳିମା ରାଣୀ ମହାନ୍ତି, ସୁଷମା ଦାଶ, କର୍ମଚାରୀ ଦୁଷ୍ମନ୍ତ ଛତର ଓ କମଳା କୁମ୍ଭାର ଉପସ୍ଥିତ ଥିଲେ ।