ଖପ୍ରାଖୋଲ, (ଅଶୋକ କୁମାର ବାଗ) : ପୂର୍ବ ଶତ୍ରୁତାରୁ ରାଗ ରଖି ନିଶାଶକ୍ତ ଅବସ୍ଥାରେ ଗାଁ ମନ୍ଦିରରେ ପୂଜା କରୁଥିବା ପୂଜକଙ୍କ ପରିବାର ଲୋକଙ୍କୁ ମରଣାନ୍ତକ ଆକ୍ରମଣ କରି ଘର ଭଙ୍ଗାରୁଜା କଲା ସ୍ଥାନୀୟ ଜଣେ ଯୁବକ । ଏହିପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଖପ୍ରାଖୋଲ ଥାନା ଦର୍ଲିପାଲି ପଞ୍ଚାୟତ ମାଲପଡା ଗ୍ରାମରେ । ଗ୍ରାମରେ ଥିବା ମହାଦେବ ମନ୍ଦିରରେ ବହୁ ବର୍ଷ ହେଲା କଳିନ୍ଦ୍ର ଥନାପତି ପୂଜକ ଭାବେ ପୂଜା କରି ନିଜର ପରିବାର ସହ ଜୀବିକା ନିର୍ବାହ କରୁଛନ୍ତି । ସେହି ଗ୍ରାମର ଅଭିମନ୍ୟୁ ମାଝୀ (୩୩) ଶନିବାର ରାତ୍ରି ୯ଟା ସମୟରେ ଘର ବାଡ଼ି ପଟୁ ଆକସ୍ମିକ ଭାବେ ଥନାପତିଙ୍କ ଘର ଭିତରକୁ ପଶି ପରିବାର ଲୋକଙ୍କୁ ମାରଣାନ୍ତକ ଆକ୍ରମଣ କରିଥିଲା । ଏହା ଦେଖି ପୁଅକୁ ଆକ୍ରମଣ ନ କରିବା ପାଇଁ ବାପା ଅଭିମନ୍ୟୁକୁ ମନା କରିଥିବା ବେଳେ ଅଭିଯୁକ୍ତ ଅଭିମନ୍ୟୁ ତାଙ୍କ କଥାକୁ ଖାତିର ନକରି ତାକୁ ମଧ୍ୟ ଆକ୍ରମଣ କରି ତଳେ ପକାଇ ଦେଇଥିଲା । ପରେ ଠେଙ୍ଗା ସାହାଯ୍ୟରେ ଘରର ଖପରକୁ ଭାଙ୍ଗି ଚୁରମାର କରିଦେଇଥିଲା । ଏହା ଦେଖି ପରିବାର ଲୋକେ ଖପ୍ରାଖୋଲ ଥାନାକୁ ଯୋଗାଯୋଗ କରିଥିବା ବେଳେ ଘଟଣାସ୍ଥଳରେ ପୋଲିସ ପହଞ୍ଚି ସ୍ଥିତିକୁ ନିୟନ୍ତ୍ରଣ କରି ଅଭିଯୁକ୍ତକୁ ଥାନାକୁ ଆଣିଥିଲେ । ଏନେଇ ଖପ୍ରାଖୋଲ ଥାନା କେସ ନଂ ୧୯୨/୨୦୨୫ରେ ଏକ ମାମଲା ୠଜୁ କରି ଅଭିଯୁକ୍ତକୁ କୋର୍ଟ ଚାଲାଣ କରଯାଇଥିବା ବେଳେ ଏହାର ଅଧିକ ତଦନ୍ତ କରୁଥିବା ଖପ୍ରାଖୋଲ ଥାନା ଅଧିକାରୀ ନରେନ୍ଦ୍ର ଛତର ସୂଚନା ଦେଇଛନ୍ତି ।