ଡୁଙ୍ଗୁରିପାଲି, (କେପିଏନ୍ଏସ୍) : ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ବ୍ଲକ ଗଜବନ୍ଧ କ୍ଲଷ୍ଟର ସ୍ଥିତ ଧାତୁକିପାଲି ପ୍ରାଥମିକ ବିଦ୍ୟାଳୟରେ ଭାରତୀୟ ଭାଷା ସପ୍ତାହ ଉପଲକ୍ଷେ ଭାଷା ଓ ବୈଷୟିକ ଜ୍ଞାନ ସମନ୍ୱୟ ଦିବସ ପାଳିତ ହୋଇଯାଇଛି । ଭାରତ ସରକାରଙ୍କ ବିଦ୍ୟାଳୟ ଶିକ୍ଷା ଓ ସାକ୍ଷରତା ବିଭାଗର ମାର୍ଗଦର୍ଶିକା ଅନୁସାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ପ୍ରଧାନ ଶିକ୍ଷକ ମୋହନ ଚରଣ ନାଏକ ଭାଷା ଶିଖିବାରେ ଆକାଶବାଣୀ, ଦୂରଦର୍ଶନ, ମୋବାଇଲ, ୟୁଟ୍ୟୁବ ପରି ବୈଷୟିକ ସାମଗ୍ରୀର ବ୍ୟବହାର କରିବାର ଉପାୟ ଓ ସତର୍କତା, ଡିଜିଟାଲ ଭାଷା ପତ୍ରିକା, ପାରସ୍ପରିକ କ୍ରିୟା ମାନଚିତ୍ର, ରୋଷେଇ ବହି ପ୍ରକଳ୍ପ ବିଷୟରେ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଥିଲେ । ସହକାରୀ ଶିକ୍ଷକ ହାରାଧନ ରଣା ଛାତ୍ରଛାତ୍ରୀଙ୍କୁ ଡିଜିଟାଲ ବୈଷୟିକ ଉପକରଣ ସାହାଯ୍ୟରେ ଅକ୍ଷର, ଶବ୍ଦ, ବାକ୍ୟ ପରି ମୌଳିକ ଭାଷା ଶିକ୍ଷା ଦେଇଥିଲେ । ପାଚିକା ଆହ୍ଲାଦିନୀ ସେଠୀ ଓ ବିଦ୍ୟାଳୟ ପରିଚାଳନା କମିଟି ସଦସ୍ୟ,ସଦସ୍ୟା ସହଯୋଗ କରିଥିଲେ । କାର୍ଯ୍ୟକ୍ରମରେ ୨୭ଜଣ ଛାତ୍ରଛାତ୍ରୀ ଭାଗ ନେଇଥିଲେ ।