ପାପଡାହାଣ୍ଡି : ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ନାକଟିଗୁଡା ଗ୍ରାମ ପଞ୍ଚାୟତ ଅନ୍ତର୍ଗତ ସଦର ମହକୁମା ତୁରୀନଦୀ ପୋଲ ତଳେ ବାଇକ ଖସି ଜଣକ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ହୋଇଥିବା ଜଣାପଡିଛି । ମୃତ ବ୍ୟକ୍ତି ଜଣକ ନାକଟିଗୁଡା ଗ୍ରାମର ଖଗପତି ପୂଜାରୀ ବୋଲି ଜଣାପଡିଛି । ଗୁରୁତର ବ୍ୟକ୍ତି ସେମଲା ଗ୍ରାମର ନିରଂଜନ ପୂଜାରୀ ବର୍ତ୍ତମାନ ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଥିବା ଜଣାପଡିଛି ।
ସୂଚନା ଅନୁଯାୟୀ ସେମଳା ଗ୍ରାମର ନିରଞ୍ଜନ ପୂଜାରୀ ଦିଆଳି ପର୍ବ ପାଳନ ପାଇଁ ନିଜ ମାମୁଘର ନାକଟିଗୁଡା ଗ୍ରାମକୁ ଆଜି ଆସିଥିଲେ । ସନ୍ଧ୍ୟା ସମୟରେ କୌଣସି କାମରେ ତୁମ୍ବଲ୍ଲା ଗ୍ରାମକୁ ଯାଇଥିଲେ । କାମ ସାରି ମାମୁ ଭଣଜା ନିଜ ବାଇକ ଯୋଗେ ଘରକୁ ଫେରିବା ସମୟରେ ନାକଟିଗୁଡା ଗ୍ରାମ ତୁରୀନଦୀ ପୋଲ ଉପରେ ବାଇକ ଭାରସାମ୍ୟ ହରାଇ ପୋଲ ଉପରେ ଥିବା ଖୁଣ୍ଟକୁ ଧକ୍କା ଦେଇ ପୋଲ ତଳକୁ ଖସିପଡ଼ିଥିଲା ।
ଯାହାଫଳରେ ଘଟଣାସ୍ଥଳରେ ହିଁ ମାମୁଁଙ୍କର ମୃତ୍ୟୁ ହୋଇଯାଇଥିବା ବେଳେ ଭଣଜା ନିରଞ୍ଜନ ଗୁରୁତର ଆହତ ହୋଇଥିଲେ । ଖବର ପାଇ ଆମ୍ବୁଲାନ୍ସ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଗ୍ରାମବାସୀଙ୍କ ସହାୟତାରେ ଗୁରୁତର ନିରଞ୍ଜନକୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ପାପଡାହାଣ୍ଡି ଗୋଷ୍ଠୀସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ପ୍ରାଥମିକ ଚିକିତ୍ସା ପରେ ନିରଞ୍ଜନଙ୍କ ସ୍ୱାସ୍ଥ୍ୟ ଅବସ୍ଥା ବିଗିଡ଼ିବା ପରେ ତାଙ୍କୁ ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟ ସ୍ଥାନାନ୍ତର କରାଯାଇଥିଲା । ତେବେ ଦୁର୍ଘଟଣାର ଖବର ପାଇ ପାପଡାହାଣ୍ଡି ପୋଲିସ ଓ ଅଗ୍ନିଶମ ବିଭାଗ ଘଟଣାସ୍ଥଳ ପହଞ୍ଚିଥିଲେ । ଅଗ୍ନିଶମ ବିଭାଗ ପୋଲ ତଳୁ ଶବ ଓ ବାଇକକୁ ଉଦ୍ଧାର କରିଥିଲେ । ପୋଲିସ ଶବ ଜବତ କରିବା ପରେ ପାପଡାହାଣ୍ଡି ଗୋଷ୍ଟୀ ସ୍ୱାସ୍ଥ୍ୟକେନ୍ଦ୍ରକୁ ଶବ ବ୍ୟବଚ୍ଛେଦ ପାଇଁ ପଠାଯାଇଥିଲା । ଆସନ୍ତାକାଲି ଶବ ବ୍ୟବଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ତଦନ୍ତ ଅଧିକାରୀ ଲାଇବାନ ବେମଲ ସୂଚନା ଦେଇଛନ୍ତି ।