ବ୍ରହ୍ମପୁର, (କେ. ସତ୍ୟନାରାୟଣ ରେଡ୍ଡୀ) : ଚଳିତ ବର୍ଷ ଡେରିରେ ହେଲେ ମଧ୍ୟ ରାଜ୍ୟ ସରକାର ଓ ଗଞ୍ଜାମ ଜିଲ୍ଲା ପ୍ରଶାସନ ଗୋପାଳପୁର ମହୋତ୍ସବ ଆୟୋଜନ କରିବାକୁ ଯେଉଁ ଉଦ୍ୟମ କରିଛି ତାକୁ ରାଜନୈତିକ ରଙ୍ଗ ନ ଦେବା ପାଇଁ ପ୍ରଦେଶ କଂଗ୍ରେସ କମିଟିର ମୁଖପାତ୍ର ତଥା ରାଜ୍ୟ ଆଇନଜୀବୀ ପରିଷଦର ସଦସ୍ୟ ତଥା ବ୍ରହ୍ମପୁର ସହରର ବିଶିଷ୍ଟ ଆଇନଜୀବୀ ପୀତବାସ ପଣ୍ଡା ଆହ୍ୱାନ ଦେଇଛନ୍ତି । ଗତବର୍ଷ ମହୋତ୍ସବ କମିଟି ସ୍ଥାନୀୟ କଳାକାର, ବୁଦ୍ଧିଜୀବୀ, ଓକିଲ, ଡାକ୍ତର, ବିଭିନ୍ନ ରାଜନୈତିକ ଦଳ ଓ ସିଭିଲ ସୋସାଇଟିର କର୍ମକର୍ତ୍ତାଙ୍କୁ ନିମନ୍ତ୍ରଣ ପତ୍ରଟିଏ ମଧ୍ୟ ଦେଲେ ନାହିଁ । ଏହିପରିକି ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ଓ ସାନଖେମୁଣ୍ଡି ବିଧାୟକ ରମେଶ ଜେନାଙ୍କୁ ନିମନ୍ତ୍ରଣ କରାଗଲା ନାହିଁ । ଦଳୀୟ କର୍ମୀ ସମାବେଶ ପରି ଉତ୍ସବକୁ ଆୟୋଜନ କରିଥିଲେ । ଜିଲ୍ଲା ପ୍ରଶାସନ ଓ ଶାସକ ଦଳ ତଥା ଏହି ପରିପ୍ରେକ୍ଷୀରେ ଗୋପାଳପୁର ବେଳାଭୂମିର ସୌନ୍ଦର୍ଯ୍ୟ, ଜିଲ୍ଲାରେ ବ୍ୟବସାୟିକ ଉନ୍ନତି ଓ ସ୍ଥାନୀୟ କଳାକାରଙ୍କ ପ୍ରତିଭାର ବିକାଶକୁ ଦୃଷ୍ଟିରେ ରଖି ମହୋତ୍ସବ କମିଟି ମହୋତ୍ସବ କରୁ । ରାଜ୍ୟ ବାହାର ବିଭିନ୍ନ କଳାକାରମାନଙ୍କୁ ଆଣିବାରେ ଅସୁବିଧା ନାହିଁ କିନ୍ତୁ ଜିଲ୍ଲାର ଲୋକନୃତ୍ୟ ଓ ଲୋକ କଳାକାରମାନଙ୍କୁ ମୁଖ୍ୟ ରଙ୍ଗମଞ୍ଚରେ ସୁଯୋଗ ଦିଆଯାଉ । ମହୋତ୍ସବରେ ଖର୍ଚ୍ଚ କରାଯାଉଥିବା ଅର୍ଥ ରାଶିର ସାର୍ବଜନୀନ କରିବା ପାଇଁ ଶ୍ରୀ ପଣ୍ଡା ଦାବି କରିବା ସହିତ ଯଦି ଏହା ଦଳୀୟ ଭିତ୍ତିରେ ଆୟୋଜନ କରାଯିବ ତେବେ ଏହାକୁ ବିରୋଧ କରାଯିବ ବୋଲି ଶ୍ରୀ ପଣ୍ଡା ଏକ ପ୍ରେସ୍ ବିବୃତିରେ ଜଣାଇଛନ୍ତି ।