କଣ୍ଟାବାଞ୍ଜି, (କୈଳାଶ ସଗ୍ରିଆ) : ତୁରେକେଲା ବ୍ଲକ ଅନ୍ତର୍ଗତ କମେଇମୁଣ୍ଡା ପଞ୍ଚାୟତର ମାନ୍ଦଲା କ୍ଲଷ୍ଟରର ପଖନମୁଣ୍ଡା ଉଚ୍ଚ ପ୍ରାଥମିକ ବିଦ୍ୟାଳୟରେ ପରିଚାଳନା କମିଟିର ଏକ ବୈଠକ ଅନୁଷ୍ଠିତ ହୋଇଯାଇଛି । କମିଟିର ସଭାପତି କୈବଲ ମାଝୀଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ସରପଂଚ ଶ୍ରୀମତି, ସମିତି ସଭ୍ୟା ଶ୍ରୀମତି, ନୂତନ ଭାବେ ଯୋଗ ଦେଇଥିବା ପ୍ରଧାନ ଶିକ୍ଷକ ବିରଂଚି ନାରାୟଣ ଦାଶ ଓ ସାଲେପଡା ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନଶିକ୍ଷକ ସୂର୍ଯ୍ୟକାନ୍ତ ରଣା ଉପସ୍ଥିତ ଥିଲେ । ସର୍ବ ପ୍ରଥମେ କମିଟି ତରଫରୁ ନବ ନିର୍ବାଚିତ ସରପଂଚ ବିନୋଦିନୀ ନାଗ, ସମିତି ସଭ୍ୟା ରଜନୀ ତାଣ୍ଡୀ ଓ ପ୍ରଧାନ ଶିକ୍ଷକ ଶ୍ରୀ ଦାଶଙ୍କୁ ପୁଷ୍ପଗୁଚ୍ଛ ଦେଇ ସମ୍ବର୍ଦ୍ଧିତ କରାଯାଇଥିଲା । ଶ୍ରୀ ଦାଶ ଶିକ୍ଷାର ଗୁଣାତ୍ମକ ବିକାଶ ପାଇଁ ସମସ୍ତଙ୍କ ସହଯୋଗ ଦରକାର ବୋଲି କହିଥିଲେ । ବିଦ୍ୟାଳୟର ଦୁଇଟି କୋଠରୀକୁ ମରାମତି, ମିନିପାର୍କ ଓ ନୂତନ ନଳକୂପ ଖନନ ପାଇଁ ସରପଂଚଙ୍କୁ ଅନୁରୋଧ କରିଥିଲେ । ଛାତ୍ରଛାତ୍ରୀ ସଂଖ୍ୟା ବୃଦ୍ଧି ଓ ନିୟମିତ ବିଦ୍ୟାଳୟକୁ ଆସିବା ପାଇଁ ସମସ୍ତେ ଚେଷ୍ଟା କରିବାକୁ ଅନୁରୋଧ କରିଥିଲେ । ତା’ପରେ ବିଦ୍ୟାଳୟ ପରିବେଶକୁ ସୌନ୍ଦର୍ଯ୍ୟକରଣ କରିବା ପାଇଁ ସମସ୍ତେ ମିଶି ବୃକ୍ଷ ରୋପଣ କରିଥିଲେ । ଏହି ସଭାରେ ଶିକ୍ଷକ ମନୋଜ ତାଣ୍ଡୀ, ଆଲେଖ ବନଗୋଲା, କାନ୍ତ ନାଗ, ଡମନ ମାଝୀ, ଯୁଗେଶ୍ୱର ମାଝୀ, ନବଘନ ପୁଝାରି, ରୁକ୍ମୁଣୀ ମାଝୀ, ନରେନ୍ଦ୍ର ମାଝୀ, ଭରତ ନାଗ, ବିଶେଶ୍ୱର ମୁଦୁଲି ଆଦି ଉପସ୍ଥିତ ଥିଲେ ।