କଳାହାଣ୍ଡି, (ଶୁଭେନ୍ଦୁ କୁମାର ପଣ୍ଡା) : କଳାହାଣ୍ଡି ଜିଲ୍ଲା ବାଦଲି କିସ୍ ଆବାସିକ ବିଦ୍ୟାଳୟ ପରିସରରେ ଆଗାମୀ ଦିନରେ ହେବାକୁ ଥିବା ଜିଲ୍ଲା ସ୍ତରୀୟ ଅଭିଭାବକ ସମ୍ବିଳନୀ ନିମନ୍ତେ ଜିଲ୍ଲା ସ୍ତରୀୟ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକରେ ମୁଖ୍ୟ ଅତିଥି ଭାବେ ବିଶିଷ୍ଟ ଆଦିବାସୀ ନେତା ତଥା କିସ୍ର ଶୁଭେଚ୍ଛୁ ପରମାନନ୍ଦ ମାଝୀ ଯୋଗଦେଇଥିଲେ । ସମ୍ମାନିତ ଅତିଥି ଭାବେ ଗଙ୍ଗାଧର ଶବର ମୁଖ୍ୟ ବକ୍ତାଭାବେ ଅଧ୍ୟାପକ ନୀଳାମ୍ବର ପାତ୍ର ଯୋଗ ଦେଇଥିବାବେଳେ ଜିଲ୍ଲାର ବିଭିନ୍ନ ବ୍ଲକରୁ ଆସିଥିବା କିସ୍ର ଅଭିଭାବକ ଓ କିସ୍ର ପୁରାତନ ଛାତ୍ରଛାତ୍ରୀମାନେ ଯୋଗ ଦେଇଥିଲେ । କିସ୍ର କାର୍ଯ୍ୟନିର୍ବାହୀ ପ୍ରଶିକ୍ଷାର୍ଥୀ ସିଦ୍ଧାନ୍ତ ମାଝୀ ସ୍ୱାଗତ ଅଭିଭାଷଣ ଏବଂ ପରିଚୟ ପ୍ରଦାନ କରିଥିଲେ । ମୁଖ୍ୟ ଅତିଥି ଶ୍ରୀ ମାଝୀ ପ୍ରତିବର୍ଷ ଡିସେମ୍ବର ମାସରେ ମେଘା ଅଭିଭାବକ ସମ୍ବିଳନୀ ଭୁବନେଶ୍ୱର କିସ୍ରେ ହୋଇ ଆସୁଥିଲା କିନ୍ତୁ ଚଳିତ ବର୍ଷ କିସ୍, କିଟ୍ର ପ୍ରତିଷ୍ଠାତା ଡ଼. ଅଚ୍ୟୁତ ସାମନ୍ତ ପ୍ରତି ଜିଲ୍ଲାରେ ଅଭିଭାବକ ସମ୍ବିଳନୀ ଆୟୋଜନ କରାଯିବା ପାଇଁ ଜଣାଇଥିବା ପ୍ରକାଶ କରିଥିଲେ । ଏଣୁ ବହୁ ସଂଖାରେ ଯୋଗଦାନ କରି ଜିଲ୍ଲାସ୍ତରୀୟ ଅଭିଭାବକ ସମ୍ବିଳନୀକୁ ସଫଳ କରିବା ପାଇଁ ଶ୍ରୀ ମାଝୀ ଉପସ୍ଥିତ ଅଭିଭାବିକା ଏବଂ ଶୁଭେଚ୍ଛୁ ମାନଙ୍କୁ ଆହ୍ୱାନ ଦେଇଥିଲେ । ଶିକ୍ଷୟିତ୍ରୀ ସୁପ୍ରିୟା ପଣ୍ଡା ଏହି କାର୍ଯ୍ୟକ୍ରମକୁ ସୁଚାରୁ ଭାବରେ ପରିଚାଳନା କରିଥିବାବେଳେ ଵିଦ୍ୟାଳୟର ସମସ୍ତ କର୍ମଚାରୀମାନେ ପୂର୍ଣ୍ଣ ସହଯୋଗ କରିଥିଲେ । ପରିଶେଷରେ କିସ୍ କଳାହାଣ୍ଡିର ଉପ-କାର୍ଯ୍ୟ ନିର୍ବାହୀ ଅଧିକାରୀ ଦୁଷ୍ମନ୍ତ କୁମାର ପଧାନ ଧନ୍ୟବାଦ ଅର୍ପଣ କରିଥିଲେ ।