ସୁନ୍ଦରଗଡ଼, (ସସ୍ମିତା ପ୍ରଧାନ) : ସଦଭାବନା ଗୃହରେ ଆଜି ବେଟି ବଚାଓ ବେଟି ପଢାଓ ଉପରେ ଜିଲ୍ଲାପାଳ ଡ଼ା. ଶୁଭଙ୍କର ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଏହି ଅବସରରେ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଯଥା ସ୍ଥାନାନ୍ତରଣ, ସ୍କୁଲ ପରିତ୍ୟାଗ ଓ ଶିଶୁ ଶ୍ରମିକ, ପ୍ଲାଟଫର୍ମ ଶିଶୁମାନଙ୍କ ସଂଖ୍ୟାରେ ବୃଦ୍ଧି ଓ ତାଙ୍କର ଥଇଥାନ, ଅଳ୍ପ ବୟସରେ ଗର୍ଭଧାରଣ, ଶିଶୁ ଚାଳାଣ ଇତ୍ୟାଦି ଉପରେ ଆଲୋଚନା କରାଯାଇଥିଲା ଏବଂ ତାହାର ସମାଧାନ ପନ୍ଥା ଗୁଡ଼ିକ ମଧ୍ୟ ଆଲୋଚନା କରାଯାଇଥିଲା । ସେହିଭଳି ଶିଶୁ ମାନଙ୍କ ସୁରକ୍ଷା ସମ୍ପର୍କିତ ଥିବା ବିଭିନ୍ନ ଅସୁବିଧା ଗୁଡ଼ିକ ଉପରେ ମଧ୍ୟ ଆଲୋଚନା କରାଯାଇଥିଲା । ବିଭିନ୍ନ ବିଭାଗର ସହଯୋଗରେ ଶିଶୁମାନଙ୍କ ଅଧିକାର ଗୁଡିକର ସୁରକ୍ଷା କରାଯାଇ ପାରିବ । ବାଲ୍ୟ ବିବାହ ନିରୋଧ, କନ୍ୟା ଭୃଣ ହତ୍ୟା, ଲିଙ୍ଗ ଭିତ୍ତିକ ତାରତମ୍ୟର ମୂଳୋତ୍ପାଟନ ନିମନ୍ତେ ସମସ୍ତ ବିଭାଗ ଯଥା ଶିକ୍ଷା, ସ୍ୱାସ୍ଥ୍ୟ, ଆଦିବାସୀ ଉନ୍ନୟନ, ଗୃହ ବିଭାଗର ସହଯୋଗିତାରେ କନ୍ୟା ମାନଙ୍କର ସାମଗ୍ରିକ ବିକାଶ କରାଯିବା ଉପରେ ବୈଠକ ରେ ଗୁରୁତ୍ଵାରୋପ କରାଯାଇଥିଲା । ସେହିଭଳି ଚଳିତ ବର୍ଷ ଜୁନ ମାସ ଠାରୁ ଜାନୁଯାରୀ ୨୦୨୬ ପର୍ଯ୍ୟନ୍ତ “ବେଟି ବଚାଓ ବେଟି ପଢାଓ” କାର୍ଯ୍ୟକ୍ରମ ଅନ୍ତର୍ଭୁକ୍ତ କଣ କଣ ପଦକ୍ଷେପ ନିଆଯିବ ସେ ସମ୍ବନ୍ଧିତ ସଂପୂର୍ଣ୍ଣ ବିବରଣୀ ଜିଲ୍ଲା ସମାଜ କଲ୍ୟାଣ ଅଧିକାରୀ କ୍ରିଷ୍ଣା କୁମାରୀ ନନ୍ଦ ଉପସ୍ଥାପନା କରିଥିଲେ । ଏହି ସଭାରେ ଜିଲ୍ଲା ପରିଷଦ ଅଧ୍ୟକ୍ଷା ସୁଶ୍ରୀ କୁନ୍ତୀ ପ୍ରଧାନ ଯୋଗ ଦେଇ ତୃଣମୂଳ ସ୍ତରରେ ସଚେତନତାର ଆବଶ୍ୟକତା ଉପରେ ଗୁରୁତ୍ଵାରୋପ କରିଥିଲେ । ବୈଠକରେ ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ସୁରଞ୍ଜନ ସାହୁ, ଆଇ ଏ ଏସ ସିକ୍ଷାନବିଷ ସୁଶ୍ରୀ ଫାବୀ ରସିଦ, ଅନ୍ୟାନ୍ୟ ବିଭାଗୀୟ ଅଧିକାରୀ, ଜିଲ୍ଲାର ସମସ୍ତ ଶିଶୁ ବିକାଶ ଅଧିକାରୀ, ଜିଲ୍ଲା ଶିଶୁ ସୁରକ୍ଷା ୟୁନିଟ, ଶିଶୁ ଯତ୍ନ ଅନୁଷ୍ଠାନ, ଶିଶୁ କଲ୍ୟାଣ କମିଟି ଏବଂ ସ୍ୱେଚ୍ଛାସବୀ ସଂଗଠନର କର୍ମକର୍ତ୍ତାମାନେ ଉପସ୍ଥିତ ରହି ନିଜର ମତାମତ ପ୍ରଦାନ କରିଥିଲେ ।
