ବଲାଙ୍ଗିର, (ଦେବାଶିଷ ମିଶ୍ର) : ଗତକାଲି ଟାଉନ ବାଳିକା ବିଦ୍ୟାଳୟ ପରିସରରେ ବ୍ରାହ୍ମଣ ମହାସଭା ଆନୁକୁଲ୍ୟରେ ପର୍ଶୁରାମ ବାହିନୀ ତରଫରୁ ଭଗବାନ ପର୍ଶୁରାମ ଜୟନ୍ତୀ ଉପଲକ୍ଷେ ସୁଧିର କୁମାର ନନ୍ଦଙ୍କ ଆବାହକତ୍ୱରେ ଏକ ପ୍ରସ୍ତୁତି ବୈଠକ କରାଯାଇଥିଲା । ଶକ୍ତିବାହିନୀ ମୁଖ୍ୟା କସ୍ତୁରୀ ରଥ ମଂଚ ପରିଚାଳନା କରିଥିଲେ । ମଂଚାସିନ ଅତିଥିଗଣ ବ୍ରାହ୍ମଣ ମହାସଭାର ସଭାପତି ଗୋପବନ୍ଧୁ ପୁରୋହିତ, ସଂପାଦକ ଜୟରାମ ମିଶ୍ର, ନଗର ସଭାପତି ତଥା ଓଡିଶା ରାଜ୍ୟର ପର୍ଶୁରାମ ବାହିନୀ କାର୍ଯ୍ୟକାରୀ ସଭାପତି ନରେନ୍ଦ୍ର କୁମାର ଆଚାର୍ଯ୍ୟ, ବରିଷ୍ଠ ସଦସ୍ୟ ଡ. ଶ୍ରୀକର ମିଶ୍ର ଓ ଅଶୋକ କୁମାର ପାଣ୍ଡିଆ ଆଗାମୀ ୨୯.୦୪.୨୦୨୫ରେ ହେବାକୁ ଥିବା ପର୍ଶୁରାମ ଜୟନ୍ତୀ କିପରି ଶାନ୍ତି ଶୃଙ୍ଖଳା ସହିତ ଏକ ଭବ୍ୟ ଶୋଭାଯାତ୍ରା ହୋଇପାରିବ ତା ଉପରେ ମନ୍ତବ୍ୟ ରଖିଥିଲେ । ଏହି ଉତ୍ସବରେ ଘଣ୍ଟ, ଶଙ୍ଖ, ଦୁଲଦୁଲି, ସଂକିର୍ତ୍ତନ ଓ ଅନେକ ସାଜସଜ୍ୟାର ସହିତ ସନ୍ଧ୍ୟାରେ ସହର ପରିକ୍ରମା କରାଯିବ ବୋଲି ନରେନ୍ଦ୍ର ଆଚାର୍ଯ୍ୟ ସୂଚନା ଦେଇଥିଲେ । ସୁଧିର ତ୍ରିପାଠି ଏହି ଜନ୍ମୋତ୍ସବକୁ କିପରି ଭାବରେ ସୁପରିଚାଳନା କରାଯିବ ସେହି ପରିପ୍ରେକ୍ଷିରେ ବିଭିନ୍ନ କମିଟି ଓ ନାମ ଘୋଷଣା କରିଥିଲେ । ଉକ୍ତ ସଭାରେ ସହରର ବିଭିନ୍ନ ପଡାରୁ ବହୁ ବିଶିଷ୍ଟ ବ୍ୟକ୍ତିଗଣ ବହୁ ସଂଖ୍ୟାରେ ଯୋଗଦାନ କରି ନିଜର ମତବ୍ୟକ୍ତ କରିଥିଲେ ଏବଂ ଜିଲ୍ଲାର ବିଭିନ୍ନ ଧାର୍ମିକ ଅନୁଷ୍ଠାନ ତାଙ୍କର ସହଭାଗିତା ପ୍ରକାଶ କରିଥିଲେ । ସଭା ଶେଷରେ ବରିଷ୍ଠ ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା ସାଂପ୍ରତିକ ପରିସ୍ଥିତିରେ ବ୍ରାହ୍ମଣ ମାନଙ୍କର ଭୂମିକା ଅବଗତ କରାଇ ଧନ୍ୟବାଦ ଅର୍ପଣ କରିଥିଲେ ।