୨୮,୮୪୦ କୋଟି ଟଙ୍କା ବ୍ୟୟବରାଦ ସହିତ ଆଞ୍ଚଳିକ ସଂଯୋଗୀକରଣ ଯୋଜନା-ସଂଶୋଧିତ ଉଡ଼ାନ ଯୋଜନାକୁ କ୍ୟାବିନେଟ୍ ଅନୁମୋଦନ

ନୂଆଦିଲ୍ଲୀ, (ପିଆଇବି) : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ୍ ସଂଶୋଧିତ ଆଞ୍ଚଳିକ ସଂଯୋଗୀକରଣ ଯୋଜନା -ଉଡ଼ାନର ଶୁଭାରମ୍ଭ ଏବଂ କାର୍ଯ୍ୟକାରିତା ପ୍ରସ୍ତାବକୁ ଅନୁମୋଦନ କରିଛି।୨୦୨୬-୨୭ ଆର୍ଥିକ ବର୍ଷରୁ ୨୦୩୫-୩୬ ଆର୍ଥିକ ବର୍ଷ ପର୍ଯ୍ୟନ୍ତ ଦଶ ବର୍ଷ ପାଇଁ ଏହି ଯୋଜନାରେ ଭାରତ ସରକାରଙ୍କ ବଜେଟ୍ ସହାୟତାରୁ ୨୮,୮୪୦ କୋଟି ଟଙ୍କା ବ୍ୟୟ କରାଯିବ।

ପ୍ରଭାବ:

• କମ ସେବା ପ୍ରାପ୍ତ ଏବଂ ବଞ୍ଚିତ ଅଞ୍ଚଳ ପାଇଁ ଆଞ୍ଚଳିକ ବିମାନ ସଂଯୋଗୀକରଣରେ ସୁଧାର।
• ଦ୍ୱିତୀୟ ଏବଂ ତୃତୀୟ ଶ୍ରେଣୀର ସହରଗୁଡ଼ିକରେ ଆର୍ଥିକ ଅଭିବୃଦ୍ଧି, ବାଣିଜ୍ୟ ଏବଂ ପର୍ଯ୍ୟଟନକୁ ବୃଦ୍ଧି କରିବା।
• ସାଧାରଣ ନାଗରିକଙ୍କ ପାଇଁ ସୁଲଭ ବିମାନ ଯାତ୍ରାକୁ ସମର୍ଥନ।
• ଦୁର୍ଗମ ଏବଂ ପାର୍ବତ୍ୟ ଅଞ୍ଚଳରେ ଜରୁରୀକାଳୀନ ପ୍ରତିକ୍ରିୟା ଏବଂ ସ୍ୱାସ୍ଥ୍ୟସେବାର ସୁବିଧାକୁ ଉନ୍ନତ କରିବା।
• ଆଞ୍ଚଳିକ ବିମାନବନ୍ଦର ଏବଂ ବିମାନ ଚଳାଚଳ ପରିଚାଳକମାନଙ୍କ ପାଇଁ ଅଧିକ କାର୍ଯ୍ୟକ୍ଷମତା ଏବଂ ସ୍ଥିରତା।
• ଆତ୍ମନିର୍ଭର ଭାରତ ଅଧୀନରେ ସ୍ୱଦେଶୀ ବିମାନ ଚଳାଚଳ କ୍ଷେତ୍ରକୁ ପ୍ରୋତ୍ସାହିତ କରିବା।
• ବିକଶିତ ଭାରତ ୨୦୪୭ଲକ୍ଷ୍ୟ ଦିଗରେ ଅଗ୍ରଗତି।

ଏହି ଯୋଜନାର ପ୍ରମୁଖ ଉପାଦାନ ନିମ୍ନରେ ଦିଆଗଲା:

(କ) ବିମାନବନ୍ଦର ବିକାଶ (ପୁଞ୍ଜି ବ୍ୟୟ)

ସଂଶୋଧିତ ଉଡ଼ାନଯୋଜନା ଅଧୀନରେ, ଆଗାମୀ ଆଠ ବର୍ଷ ମଧ୍ୟରେ ମୋଟ ୧୨,୧୫୯କୋଟି ଟଙ୍କା ଖର୍ଚ୍ଚ ସହିତ, ବିକଶିତ ଭାରତ ୨୦୪୭ର ଲକ୍ଷ୍ୟ ସହିତ ଆଞ୍ଚଳିକ ସଂଯୋଗୀକରଣକୁ ବୃଦ୍ଧି କରିବା ପାଇଁ ଅବ୍ୟବହୃତ ଏୟାରଷ୍ଟ୍ରିପଗୁଡ଼ିକରୁ ୧୦୦ଟି ବିମାନବନ୍ଦର ବିକଶିତ କରିବାର ପ୍ରସ୍ତାବ ରହିଛି।ଏହାଦ୍ୱାରା ଭିତ୍ତିଭୂମି ବିସ୍ତାର ଏବଂ ଭାରତକୁ ବିଶ୍ୱସ୍ତରୀୟ ପ୍ରତିଯୋଗିତାମୂଳକ ବିମାନ ଚଳାଚଳ ଇକୋସିଷ୍ଟମରେ ପରିଣତ କରାଯାଇପାରିବ।

(ଖ) ବିମାନବନ୍ଦରଗୁଡ଼ିକର ପରିଚାଳନା ଏବଂ ରକ୍ଷଣାବେକ୍ଷଣ

ଆଞ୍ଚଳିକ ସଂଯୋଗ ଯୋଜନା (ଆରସିଏସ) ଅଧୀନରେ ଥିବା ବିମାନବନ୍ଦରଗୁଡ଼ିକର ପରିଚାଳନା ଏବଂ ରକ୍ଷଣାବେକ୍ଷଣର ଉଚ୍ଚ ଖର୍ଚ୍ଚ ଏବଂ ସୀମିତ ରାଜସ୍ୱ ଉତ୍ସକୁ ଦୃଷ୍ଟିରେ ରଖିଏହି ଯୋଜନାରେ ପ୍ରତି ବିମାନବନ୍ଦର ପାଇଁ ପ୍ରତି ବର୍ଷ ସର୍ବାଧିକ ୩.୦୬କୋଟି ଏବଂ ପ୍ରତି ହେଲିପୋର୍ଟ/ଜଳ ବିମାନଘାଟି ପାଇଁ ପ୍ରତି ବର୍ଷ ୯୦ ଲକ୍ଷ ପର୍ଯ୍ୟନ୍ତ ପରିଚାଳନା ଏବଂ ରକ୍ଷଣାବେକ୍ଷଣ ସହାୟତା ପ୍ରଦାନ କରିବାକୁ ପ୍ରସ୍ତାବ ଦିଆଯାଇଛି, ଯାହା ପ୍ରାୟ ୪୪୧ବିମାନବନ୍ଦର ପାଇଁ ୨୫୭୭କୋଟି ଟଙ୍କା ହେବ।

(ଗ) ଆଧୁନିକ ହେଲିପ୍ୟାଡର ବିକାଶ

ପାହାଡ଼ି, ଦୁର୍ଗମ, ଦ୍ୱୀପ ଏବଂ ବିକାଶଶୀଳ ଅଞ୍ଚଳରେ ଯୋଗାଯୋଗ ସମସ୍ୟାର ମୁକାବିଲା କରିବା ପାଇଁ, ଏହି ଯୋଜନାରେ ପ୍ରତି ହେଲିପ୍ୟାଡ ପାଇଁ ୧୫ କୋଟି ଟଙ୍କା ଖର୍ଚ୍ଚରେ ୨୦୦ଟି ଆଧୁନିକ ହେଲିପ୍ୟାଡ ବିକଶିତ କରିବାର ପ୍ରସ୍ତାବ ଦିଆଯାଇଛି। ଏଥିପାଇଁ ଆଗାମୀ ଆଠ ବର୍ଷ ମଧ୍ୟରେ ମୋଟ ୩୬୬୧ କୋଟି ଟଙ୍କା (ମୁଦ୍ରାସ୍ଫୀତି-ସମାୟୋଜିତ) ଆବଶ୍ୟକତା ରହିଛି। ଏହି ଯୋଜନା ଶେଷ ମାଇଲ ସଂଯୋଗ ଏବଂ ଜରୁରୀକାଳୀନ ପ୍ରତିକ୍ରିୟାକୁ ଉନ୍ନତ କରିବା ପାଇଁ ପ୍ରାଥମିକତା ଏବଂ ବିକାଶଶୀଳ ଜିଲ୍ଲାଗୁଡ଼ିକ ଉପରେ ଧ୍ୟାନ ଦିଏ।

(ଘ) ଉପଯୋଗିତାରେ ରହିଥିବା ଅଭାବ ଦୂର ପାଇଁ ପାଣ୍ଠି (ଭିଜିଏଫ)

ଆଞ୍ଚଳିକ ସଂଯୋଗ ଯୋଜନା ଅଧୀନରେ, ବିମାନ ପରିଚାଳକମାନେ ଆବଣ୍ଟିତ ରୁଟରେ କାର୍ଯ୍ୟ କରିବା ପାଇଁ ଭିଜିଏଫଆକାରରେ ଆର୍ଥିକ ସହାୟତା ପାଆନ୍ତି। ଦୀର୍ଘକାଳୀନ ବଜାର ପରିବର୍ତ୍ତନର ଆବଶ୍ୟକତାକୁ ଧ୍ୟାନରେ ରଖି ୧୦ବର୍ଷ ମଧ୍ୟରେ ବିମାନ ପରିଚାଳକମାନଙ୍କ ପାଇଁ ୧୦ ହଜାର ୪୩କୋଟି ଟଙ୍କାର ଭିଜିଏଫସହାୟତା ପ୍ରସ୍ତାବ ଦିଆଯାଇଛି।

(ଙ) ଆତ୍ମନିର୍ଭର ଭାରତ ବିମାନ ଅଧିଗ୍ରହଣ

ଦୂରବର୍ତ୍ତୀ ଏବଂ ଦୁର୍ଗମ ଅଞ୍ଚଳରେ କାର୍ଯ୍ୟ ପାଇଁ ଆବଶ୍ୟକ ଛୋଟ ଫିକ୍ସଡ୍-ଉଇଙ୍ଗ ବିମାନ ଏବଂ ହେଲିକପ୍ଟରର ଅଭାବକୁ ପୂରଣ କରିବା ଏବଂ ଆତ୍ମନିର୍ଭର ଭାରତର ଦୃଷ୍ଟିକୋଣକୁ ଆଗକୁ ବଢ଼ାଇବା ପାଇଁଯୋଜନାରେ ପବନ ହଂସ ଲାଗି ଦୁଇଟି ଏଚଏଏସଧ୍ରୁବ ହେଲିକପ୍ଟର ଏବଂ ଆଲାଏନ୍ସ ଏୟାର ଲାଗି ଦୁଇଟିଏଚଏଏସଡୋର୍ନିୟର ବିମାନ ଅଧିଗ୍ରହଣ କରିବାର ପ୍ରସ୍ତାବ ମଧ୍ୟ ରହିଛି।

ପୃଷ୍ଠଭୂମି:

ମୂଳ ଉଡ଼ାନଯୋଜନା ଅକ୍ଟୋବର ୨୦୧୬ରେ ଆରମ୍ଭ କରାଯାଇଥିଲା ଯାହାର ଲକ୍ଷ୍ୟ ଥିଲା ବିମାନ ଯାତ୍ରାକୁ ସୁଲଭ କରିବା ଏବଂ ଦ୍ୱିତୀୟ ଏବଂ ତୃତୀୟ ଶ୍ରେଣୀ ସହରଗୁଡ଼ିକୁ ସଂଯୋଗୀକରଣକୁ ସୁଦୃଢ଼ କରିବା। କାର୍ଯ୍ୟାନ୍ୱୟନର ନଅ ବର୍ଷ ମଧ୍ୟରେ:
• ୨୮ ଫେବୃଆରୀ ୨୦୨୬ ସୁଦ୍ଧା ୯୫ଟି ବିମାନବନ୍ଦର, ହେଲିପୋର୍ଟ ଏବଂ ଜଳ ବିମାନଘାଟିରେ ୬୬୩ଟି ମାର୍ଗ କାର୍ଯ୍ୟକ୍ଷମ କରାଯାଇଛି।
• ଏପର୍ଯ୍ୟନ୍ତ ୩୪.୧ ନିୟୁତରୁ ଅଧିକ ବିମାନ ଚଳାଚଳ କରାଯାଇଛି, ଯେଉଁଥିରେ ୧ କୋଟି ୬୨ ଲକ୍ଷ ୪୭ ହଜାର ଯାତ୍ରୀ ପରିବହନ କରିଛନ୍ତି।
• ଦୂରବର୍ତ୍ତୀ, ପାର୍ବତ୍ୟାଞ୍ଚଳ ଏବଂ ଦ୍ୱୀପାଞ୍ଚଳରେ ସଂଯୋଗ ସ୍ଥାପନ କରାଯାଇଛି, ଯାହା ପର୍ଯ୍ୟଟନ, ସ୍ୱାସ୍ଥ୍ୟସେବା ଏବଂ ଜରୁରୀକାଳୀନ ସେବାକୁ ବୃଦ୍ଧି କରିଛି।
• ଏହି ଯୋଜନା ଆଞ୍ଚଳିକ ବିମାନ ସେବା ଏବଂ ବିବିଧ ଫ୍ଲିଟର ପରିଚାଳନା ବୃଦ୍ଧି ଉପରେ ଗୁରୁତ୍ୱାରୋପ କରିଥିଲା, ଯାହା ସଂଶୋଧିତ ଉଡ଼ାନ ଯୋଜନା ପାଇଁ ଏକ ଦୃଢ଼ ମୂଳଦୁଆ ସ୍ଥାପନ କରିଥିଲା ।