ବଲାଙ୍ଗିର, (କେପିଏନ୍ଏସ୍) : ଶେମଫୋର୍ଡ଼ ଫ୍ୟୁଚରିଷ୍ଟିକ ସ୍କୁଲ ବଲାଙ୍ଗିର ଗତ ତା ୦୨/୦୫/୨୦୨୪ ରିଖ ଦିନ ସିବିଏସ୍ଇ ନୂଆଦିଲ୍ଲୀ ସହ ଅନୁବନ୍ଧିତ ହୋଇଯାଇଛି । ଏହାର ଅନୁବନ୍ଧିତ ନମ୍ୱର ହେଉଛି ୧୫୩୦୪୨୪ । ଏହି ଖବରଟି ବଲାଙ୍ଗିର ଶିକ୍ଷାବିତ୍ ମହଲରେ ଆନନ୍ଦର ଲହରୀ ଖେଳାଇଦେଇଛି । ସ୍କୁଲର ଛାତ୍ରଛାତ୍ରୀ, କର୍ତ୍ତୃପକ୍ଷ ଓ ଅଭିଭାବକମାନେ ବେଶ ଆନନ୍ଦ ପ୍ରକାଶ କରିଛନ୍ତି । ଏହା ଦ୍ୱାରା ଆଗାମୀ ଦିନରେ ବହୁ ଛାତ୍ରଛାତ୍ରୀ ଉପକୃତ ହୋଇପାରିବେ ଓ ବଲାଙ୍ଗିର ସହରରେ ଗୁଣାତ୍ମକ ଶିକ୍ଷାର ଆହୁରି ଅଭିବୃଦ୍ଧି ଘଟିବ ବୋଲି ବୁଦ୍ଧିଜୀବୀ ମହଲରେ ମନ୍ତବ୍ୟ ପ୍ରକାଶ ପାଇଛି । ସ୍କୁଲର ସଭାପତି ଆଶିଷ କୁମାର ରଥ, ସମ୍ପାଦକ ସଂଜୀବ ରଥ, ପରିଚାଳନା ନିର୍ଦ୍ଦେଶିକା ଶ୍ରୀମତୀ ନୀଲମ ରଥ ତଥା ଅଧ୍ୟକ୍ଷ ପ୍ରତାପ କୁମାର ଜେନାଙ୍କ ପାଖକୁ ଶୁଭେଚ୍ଛାର ସୁଅ ଛୁଟିଛି । ପ୍ରକାଶଯୋଗ୍ୟ ଯେ, ଶେମଫୋର୍ଡ଼ ଫ୍ୟୁଚରିଷ୍ଟିକ ସ୍କୁଲ ଗତ ୧୨ ବର୍ଷ ଧରି ବଲାଙ୍ଗିର ସହରରେ ଗୁଣାତ୍ମକ ଓ ମୂଲ୍ୟବୋଧ ଭିତ୍ତିକ ଶିକ୍ଷା ପ୍ରଦାନ କରିଆସୁଛି । ସ୍କୁଲ ଶିକ୍ଷକ ଶିକ୍ଷୟିତ୍ରୀଙ୍କ ନିଷ୍ଠାପର ଶିକ୍ଷାଦାନ, ଛାତ୍ରଛାତ୍ରୀଙ୍କ କଠିନ ପରିଶ୍ରମ ତଥା ଅଭିଭାବକଙ୍କ ସହଯୋଗ ଏହି ସଫଳତାର ଉତ୍ସ ବୋଲି ସ୍କୁଲ କର୍ତ୍ତୃପକ୍ଷ ପ୍ରକାଶ କରିଛନ୍ତି । ଉତ୍ତମ ଶିକ୍ଷାଦାନ ସହ ଛାତ୍ରଛାତ୍ରୀମାନଙ୍କ ପାଇଁ ଉନ୍ନତ ମାନର ସାଇନ୍ସ ଲେବ୍, କମ୍ପ୍ୟୁଟର୍ ଲେବ୍, ମେଥ ଲେବ୍, ଲାଇବ୍ରେରୀ ତଥା ସେମାନଙ୍କ ଶାରୀରିକ ବିକାଶ ନିମନ୍ତେ ଇନ୍ଡୋର୍ ଏବଂ ଆଉଟ୍ଡୋର୍ ଖେଳର ସୁବିଧା ରହିଛି । ଏହି ବିଦ୍ୟାଳୟଟି ଛାତ୍ରଛାତ୍ରୀମାନଙ୍କୁ ଉତ୍ତମ ମାର୍ଗଦର୍ଶନ କରିବା ସହ ଆଦର୍ଶ ପଥରେ ଆଗେଇବାକୁ ପ୍ରେରଣା ଦେଇଥାଏ । ଛାତ୍ରଛାତ୍ରୀଙ୍କୁ ମାନସିକ ଓ ବୌଦ୍ଧିକ ସ୍ତରରେ ସୁଦୃଢ କରିବା ପାଇଁ ବିଦ୍ୟାଳୟଟି ସଦାସର୍ବଦା ପ୍ରଯତ୍ନଶୀଳ । ଏକ ସୁସ୍ଥ ସମାଜ ଓ ଆଦର୍ଶ ନାଗରିକ ଗଠନ କରିବା ହେଉଛି ବିଦ୍ୟାଳୟର ମୂଳଲକ୍ଷ୍ୟ ।