ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ସହର କ୍ରାଇମ୍ ସିଟି ଭଳି ଅନୁଭବ ହେଉଥିବା ବେଳେ ଆଜି ପୁଣି ଏକ ଅଭାବନୀୟ ଅମାନବୀୟ କାଣ୍ଡ ସହରବାସୀଙ୍କୁ ଚକିତ କରି ଦେଇଛି । ଏହି ଘଟଣା ଘଟିଛି ସ୍ଥାନୀୟ ରାଜୀବ ନଗରରେ । ସୂଚନା ଅନୁସାରେ ଆଜି ଦିନ ୧୨ଟା ୪୫ ମିନିଟ ସମୟରେ ରାଜୀବନଗର ନିବାସୀ ସର୍ବେଶ୍ୱର ସାହୁଙ୍କ ଘରକୁ ପଶି ଦୁର୍ବୃତ୍ତମାନେ ତାଙ୍କ ସହ ଝିଅ ଜ୍ୱାଇଁଙ୍କୁ ଟାଙ୍ଗି, ତର୍ୱାଲ ଓ ଲୁହାଛଡରେ ମରଣାନ୍ତକ ଆକ୍ରମଣ କରିଛନ୍ତି । ସିନ୍ଦୁରବାହାଲ ନିବାସୀ ଜ୍ୱାଇଁ ସୁମନ ଶେଖର ପାଣିଗ୍ରାହୀ ଓ ଝିଅ ପିଙ୍କି ପାଣିଗ୍ରାହୀ ନିଜର ୨ ପିଲାଙ୍କୁ ଧରି ବଲାଙ୍ଗିର ଆର୍ଟିଓ ଅଫିସକୁ କୌଣସି କାମରେ ଆସିଥିବା ବେଳେ ଦ୍ୱିପହର ସମୟରେ ବାପା ସର୍ବେଶ୍ୱର ସାହୁଙ୍କ ଘରକୁ ଯାଇଥିଲେ । ଏତିକି ବେଳେ ୬ ଜଣ ଦୁର୍ବୃତ୍ତ ଘରକୁ ପଶି ଆସି ୩ ଜଣଙ୍କୁ ମରଣାନ୍ତକ ଆକ୍ରମଣ କରିବା ସହ ୧ ଲକ୍ଷ ୪୦ ହଜାର ଟଙ୍କା, ମଙ୍ଗଳସୂତ୍ର ଓ ରୂପା ବ୍ରାସଲେଟ ଲୁଟ୍ କରି ନେଇଥିବା ଟାଉନ ଥାନାରେ ଅଭିଯୋଗ ହୋଇଛି । ଆକ୍ରମଣର ଶିକାର ହୋଇଥିବା ଶ୍ୱଶୁର ସର୍ବେଶ୍ୱର, ଜ୍ୱାଇଁ ସୁମନ ଓ ଝିଅ ପିଙ୍କି ଏବେ ସ୍ଥାନୀୟ ଭୀମଭୋଇ ମେଡିକାଲ କଲେଜରେ ଚିକିତ୍ସିତ ହୋଉଥିବା ଖବର ମିଳିଛି ।
