ପାତ୍ରପୁର : ରବିବାର ପାତ୍ରପୁର ବ୍ଲକ ସୁରଙ୍ଗୀ ପଞ୍ଚାୟତ ତିତିଗାଁ ଗ୍ରାମର ଜଣେ ଦଳିତ ବିଧବା ମହିଳା ବାରହା ଆକ୍ରମଣରେ ଗୁରୁତର ଆହତ ହୋଇଛନ୍ତି । ତାଙ୍କ ନାମ ପ୍ରମିଳା ସେଠୀ ବୋଲି ଜଣାପଡ଼ିଛି । ସୂଚନା ଅନୁସାରେ ଆଜି ସେ ନିଜ ଶାଶୁ ସତ୍ୟ ସେଠୀଙ୍କ ସହ ଗ୍ରାମର ଜନୈକ ବ୍ୟକ୍ତିଙ୍କ ଜମିରେ ତଳି ପକେଇବା ପାଇଁ ଧାନ ବିହନ ଧରି ଯାଉଥିଲେ । ହଠାତ ଗ୍ରାମର ନାଳ ନିକଟ ବୁଦାରୁ ବାରହା ବାହାରି ତାଙ୍କୁ ଆକ୍ରମଣ କରିଥିଲା । ବାରହା ଆକ୍ରମଣ କରୁଥିବା ବେଳେ ସେ ପ୍ରାଣ ରକ୍ଷା ପାଇଁ ଚିତ୍କାର କରିବାରୁ ତାଙ୍କୁ ଉଦ୍ଧାର ପାଇଁ ସ୍ଥାନୀୟ ଲୋକେ ସେଠାରେ ତତ୍କାଳ ପହଞ୍ଚି ଯାଇଥିଲେ । ଲୋକେ ପହଞ୍ଚିବା ପରେ ବାରହାଟି ନିକଟରେ ଥିବା ଜଙ୍ଗଲକୁ ଚାଲି ଯାଇଥିଲା । ବାରହା ତାଙ୍କ ଗୋଡ ଓ ଜଙ୍ଘ ପ୍ରଭୃତିକୁ କାମୁଡ଼ି ଦେଇଥିବା ବେଳେ ତାଙ୍କୁ ଚିକିତ୍ସା ପାଇଁ ପାତ୍ରପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରାଯାଇଛି ।