ପଦ୍ମପୁର, (ନିରୋଜ କୁମାର ପାଣୀ) : ପଦ୍ମପୁର ଉପଖଣ୍ଡ ପାଇକମାଲ ଶନିବାର ବଜାର ଦିନ ଲୋକଙ୍କ ଭିଡ ମଧ୍ୟରେ ଗୋପାଳ ସାହୁ ନାମକ ବ୍ୟକ୍ତିଙ୍କୁ ଆକ୍ରମଣ କରାଯାଇଥିବା ଜଣାପଡିଛି । ସୂଚନା ଅନୁସାରେ ସେ ବଜାରରେ ପନିପରିବା କିଣୁଥିବା ବେଳେ ଅଜଣା ବ୍ୟକ୍ତି ଜଣକ ହଠାତ୍ ଆସି ତାଙ୍କୁ ଖଣ୍ଡା ସାହାଯ୍ୟରେ ଆକ୍ରମଣ କରିଥିଲା । ଫଳରେ ଗୋପାଳ ସାହୁଙ୍କ ବାମ ହାତ, ଡାହାଣ ଗୋଡ ଓ ଦେହରେ ଗଭୀର ଆଘାତ ହୋଇଥିଲେ । ସେ ଅଚେତ ଅବସ୍ଥାରେ ତଳେ ପଡି ରହିଥିଲେ । ଘଟଣା ସ୍ଥଳରେ ପାଇକମାଲ ପୋଲିସ ପହଞ୍ଚି ଗୋପାଳ ସାହୁଙ୍କୁ ଉଦ୍ଧାର କରି ଡାକ୍ତରଖାନା ଆଣିଥିଲେ । ପାଇକମାଲରେ ଚିକିତ୍ସିତ ହେବା ପରେ ପଦ୍ମପୁର, ବରଗଡ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି । ଘଟଣା ଘଟାଇ ଥିବା ଅପରାଧି ଫେରାର ହୋଇଯାଇଛି । ଏପରି ସ୍ପଷ୍ଟ ଦିବା ଲୋକରେ ଅପରାଧ ଘଟଣା ପାଇକମାଲ ପୋଲିସ ପ୍ରତି ଜନସାଧାରଣ ଆସ୍ଥା ହରାଇବା ସ୍ୱାଭାବିକ ହୋଇ ପଡିଛି । ଜନ ସାଧାରଣ ତୁରନ୍ତ ଦୋଷୀକୁ ଧରି ନ୍ୟାୟ ପାଇଁ ଦାବୀ ହେଉଛି ।