ମୁରିବାହାଲ, (କେପିଏନ୍ଏସ୍) : ବଲାଙ୍ଗିର ଜିଲ୍ଲା ମୁରିବାହାଲ ଆଦର୍ଶ ବିଦ୍ୟାଳୟ ଛାତ୍ରଛାତ୍ରୀଙ୍କୁ ନେଇ ସ୍କୁଲ ଯାଉଥିବା ଏକ ଅଟୋ ସୋମବାର ଗୁଡିଘାଟ ନିକଟରେ ଥିବା ଏକ ବ୍ରିଜ ତଳକୁ ଭାରସାମ୍ୟ ହରାଇ ଖସି ପଡିଥିବା ଜଣାପଡିଛି । ଫଳରେ ଏଥିରେ ଥିବା ୧୦ ଜଣ ଛାତ୍ରଛାତ୍ରୀ ଗୁରୁତର ଆହତ ହୋଇଥିଲେ । ସ୍ଥାନୀୟ ଲୋକଙ୍କ ସହାୟତାରେ ଆହତ ଛାତ୍ରଛାତ୍ରୀଙ୍କୁ ଗୁଡିଘାଟ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ପ୍ରାଥମିକ ଚିକିତ୍ସା ପରେ ମୁରିବାହାଲ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଣାଯାଇଥିଲା । ସେମାନଙ୍କ ମଧ୍ୟରୁ ଜଣଙ୍କୁ ଅଧିକ ଚିକିତ୍ସା ପାଇଁ ବଲାଙ୍ଗିର ସ୍ଥାନାନ୍ତର କରାଯାଇଛି । ଦୁର୍ଘଟଣାଗ୍ରସ୍ତ ଅଟୋକୁ ମୁରିବାହାଲ ପୋଲିସ ଜବତ କରିଛି । ସୂଚନା ଅନୁସାରେ, ପ୍ରତିଦିନ ଭଳି ସୋମବାର ପୂର୍ବାହ୍ନ ପ୍ରାୟ ୯ଟା ୩୦ରେ ବଡ଼ସାଇମରା, ଧୂମାମାଲ, ସୁଲେକେଲା, ଟେଙ୍ଗରା, ଅଣ୍ଡାଲଦୋରୋ, ପତ୍ରପାଲି, ଇଛାପ, ଗଁରେଇ, ହଳଦୀ ଅଞ୍ଚଳର ପିଲାମାନେ ଏକ ଅଟୋରେ ଆଦର୍ଶ ବିଦ୍ୟାଳୟକୁ ପଢିବାକୁ ଆସୁଥିଲେ । ଅଟୋ ଭାରସାମ୍ୟ ହରାଇ ପାଖରେ ଥିବା ଗୁଡିଘାଟ ଯୋରର ପ୍ରାୟ ୧୦ଫୁଟ୍ ବ୍ରିଜ ତଳକୁ ଖସି ପଡିଥିଲା । ପିଲାମାନଙ୍କ ସ୍ୱାସ୍ଥ୍ୟାବସ୍ଥା ଭଲ ଥିବା ଆଦର୍ଶ ବିଦ୍ୟାଳୟ ଅଧ୍ୟକ୍ଷ ପୀତାମ୍ବର ବେଶ୍ରା କହିଛନ୍ତି ।