ବଲାଙ୍ଗିର, (କେପିଏନ୍ଏସ୍) : ନୂଆବର୍ଷ ଭୋଜିକୁ ନେଇ ସବର୍ଣ୍ଣ ଅସବର୍ଣ୍ଣ ବିବାଦ । ଉଭୟ ଗୋଷ୍ଠୀ ମାର୍ପିଟ ହୋଇଥିବା ବେଳେ ୧୦ରୁ ଅଧିକ ଆହତ ହୋଇଛନ୍ତି । ଏଭଳି ଘଟଣା ଘଟିଛି ବଲାଙ୍ଗିର ଜିଲ୍ଲା ପୁଇଁନ୍ତଲା ଥାନା ଟିମାପାଲି ଗାଁରେ । ଟିମାପାଲି ଗାଁର ସବର୍ଣ୍ଣ ଅସବର୍ଣ୍ଣଙ୍କ ଭୋଜିଭାତ ଚାଲିଥିଲା । ହରିଜନପଡାରେ ଡିଜେ ବଜାଇ ନାଚ କରୁଥିଲେ । ଜୋରରେ ଡିଜେ ବଜାଉଥିବାରୁ ଏହାର ପ୍ରତିବାଦ କରିଥିଲେ ସବର୍ଣ୍ଣ ଗୋଷ୍ଠୀର ଲୋକେ । ଯାହାକୁ ନେଇ ଉଭୟ ଗୋଷ୍ଠୀ ମଧ୍ୟରେ କଥା କଟାକଟିରୁ ମାର୍ପିଟ ହୋଇଥିଲା । ପ୍ରାୟ ଘଣ୍ଟାଏ ଧରି ଗଣ୍ଡଗୋଳ ଲାଗି ରହିଥିବା ବେଳେ ଉଭୟ ଗୋଷ୍ଠୀ ପକ୍ଷରୁ ପଥର ମାଡ ହୋଇଥିଲା । ଫଳରେ ଉଭୟ ଗୋଷ୍ଠୀର ୧୦ରୁ ଅଧିକ ଲୋକ ଆହତ ହୋଇଛନ୍ତି । ଆହତଙ୍କ ଭିତରେ କିଛି ମହିଳା ମଧ୍ୟ ରହିଛନ୍ତି । ସମସ୍ତଙ୍କୁ ବଲାଙ୍ଗିର ଭୀମଭୋଇ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଛି । ଟିମାପାଲି ଗାଁରେ ଉତ୍ତେଜନା ଜାରି ରହିଛି । ପୁଇଁନ୍ତଲା ପୁଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତି ଶାନ୍ତ କରିବା ପାଇଁ ଉଦ୍ୟମ ଜାରି ରହିଛି ।