ମୋହନା : ଗଜପତି ଜିଲ୍ଲା ମୋହନା ବ୍ଲକ ଗରଡମା ଗାଁରେ ଘର ଉପରେ ଗଛ ପଡ଼ି ୩ ଆହତ ହୋଇଥିବା ଜଣାପଡିଛି । ଆହତମାନଙ୍କୁ ରାୟଗଡ଼ା ଜିଲ୍ଲା ଚନ୍ଦ୍ରପୁର ମେଡିକାଲରେ ଭର୍ତ୍ତି କରାଯାଇଛି । ସୂଚନାନୁଯାୟୀ, ଗତ ଦୁଇ ଦିନ ଧରି ଲଗାଣ ବର୍ଷା ଜାରି ରହିଥିବା ବେଳେ ଗତକାଲି ରାତିରେ ବର୍ଷା ସହ ପବନ ହୋଇଥିଲା । ଫଳରେ ଗରଡମା ଗାଁ ରାସ୍ତା କଡ଼ରେ ଥିବା ଏକ ବଡ଼ ଗଛ ଉପୁଡ଼ି ନିକଟରେ ଥିବା ଘର ଉପରେ ପଡିଥିଲା । ଏଥିରେ ୩ ଜଣ ଆହତ ହୋଇଛନ୍ତି । ରାସ୍ତା ଉପରେ ଗଛ ପଡ଼ିଥିବା ଯୋଗୁଁ ଗରଡମାରୁ ଚନ୍ଦ୍ରପୁରକୁ ଯାତାୟତ ଠପ୍ ହୋଇଯାଇଛି । ତେବେ ଗରଡମା ଗାଁ ରାୟଗଡ଼ା ଜିଲ୍ଲାର ସୀମାନ୍ତବର୍ତ୍ତି ହୋଇଥିବା ଯୋଗୁଁ ଆହତମାନଙ୍କୁ ଚନ୍ଦ୍ରପୁର ମେଡିକାଲରେ ଭର୍ତ୍ତି କରାଯାଇଛି ।