ପଦ୍ମପୁର, (ନିରୋଜ କୁମାର ପାଣୀ) : ପଦ୍ମପୁର ସ୍ଥିତ ପଲସାପାଲି ଗାଁର ଗୌନ୍ତିଆ ତଥା ବିଂଝାଲ ଆଦିବାସୀ ଜାତିର ଜଣେ ପ୍ରମୁଖ ବ୍ୟକ୍ତିତ୍ୱ କେଶବ ଭୁଏଙ୍କ ଗତ ଶନିବାର ମଧ୍ୟ ରାତ୍ରିରେ ଦେହାନ୍ତ ହୋଇଯାଇଛି । ସ୍ୱର୍ଗତ ଭୁଏ ବରଗଡ ଜିଲ୍ଲାର ବିଶିଷ୍ଟ ଆଦିବାସୀ ନେତା, ଆଞ୍ଚଳିକ କୃଷକ ସଂଗଠନ ସଭାପତି ତଥା ଭାରତୀୟ ଜନତା ପାର୍ଟିର ପୂର୍ବତନ ରାଜ୍ୟ ସଂପାଦକ ଗୋବର୍ଦ୍ଧନ ଭୁଏଙ୍କ ପିତା ଅଟନ୍ତି । ସ୍ୱର୍ଗତ ଭୁଏଙ୍କ ୮୩ ବର୍ଷ ବୟସ ହୋଇଥିବା ବେଳେ ଶେଷ ସମୟ ପର୍ଯ୍ୟନ୍ତ ସୁସ୍ଥ ସବଳ ଥିଲେ । ତାଙ୍କର ମିଷ୍ଟଭାଷୀ ବ୍ୟବହାର ଯୋଗୁଁ ସେ ସମସ୍ତଙ୍କ ଆଦର ପାତ୍ର ଥିଲେ । ଆଜି ରବିବାର ଦିନ ପଲସାପାଲି ଗ୍ରାମରେ ବିଂଝାଲ ସମାଜର ରୀତିନୀତି ଅନୁଯାୟୀ ତାଙ୍କର ଅନ୍ତିମ ସଂସ୍କାର ସଂପନ୍ନ ହୋଇଛି । କୋଭିଡ କଟକଣା ଯୋଗୁଁ ବହୁ ଲୋକଙ୍କ ସମାଗମ ହୋଇ ନ ଥିଲେ ମଧ୍ୟ ଅନେକ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ । ସ୍ୱର୍ଗତ ଭୁଏଙ୍କ ଦେହାନ୍ତରେ ବରଗଡ ଲୋକ ସଭା ସାଂସଦ ସୁରେଶ ପୂଜାରୀ, ପୂର୍ବତନ ବିଧାୟକ ପ୍ରଦୀପ ପୁରୋହିତ, ପୂର୍ବତନ କେନ୍ଦ୍ରମନ୍ତ୍ରୀ ତଥା ସୁନ୍ଦରଗଡ ସାଂସଦ ଜୁଏଲ ଓରାମ, ରାଜ୍ୟ ବିଜେପି ଆଦିବାସୀ ମୋର୍ଚ୍ଚା ରାଜ୍ୟ ସଭାପତି ବିଶ୍ଵେଶ୍ଵର ଟୁଡୁ ଆଦି ଶୋକ ବ୍ୟକ୍ତ କରିବା ସହିତ ଶୋକସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି ।