ବଲାଙ୍ଗିର, (କେପିଏନ୍ଏସ୍) : ଗତକାଲି ଅପରାହ୍ନରେ ବଲାଙ୍ଗିର ରେଡ଼ିଓ ଷ୍ଟେସନ୍ ପାଖରେ ଶାସ୍ତ୍ରୀନଗରର ରାଜା ଭାଟି ଓ ସୁରମ୍ୟ ଯାଦନଙ୍କୁ ଦଶ ବାର ଜଣ ପିଲା ଆସି ଅତିର୍କିତ ଭାବେ ତରୱାଲ୍ ଓ ଲୁହାଛଡ଼ ସାହାଯ୍ୟରେ ଆକ୍ରମଣ କରିଥିବା ବେଳେ ଏନେଇ ବଲାଙ୍ଗିର ଟାଉନ୍ ଥାନାରେ ଅଭିଯୋଗ ହୋଇଥିଲା । ବଲାଙ୍ଗିର ଏସ୍ପି ରିଷିକେଶ ଖିଲାରୀଙ୍କ ନିର୍ଦ୍ଦେଶ କ୍ରମେ ବଲାଙ୍ଗିର ପୋଲିସ ତନାଘନା ତଦନ୍ତ ଆରମ୍ଭ କରି ୫ ଜଣ ଅଭିଯୁକ୍ତଙ୍କୁ ଗିରଫ୍ କରିଥିବା ଏସ୍ଡିପିଓ ତୋଫାନ୍ ବାଗ ସୂଚନା ଦେଇଛନ୍ତି । ଗିରଫ୍ ଅଭିଯୁକ୍ତମାନେ ହେଲେ ଲର୍କିପାଲିର ଅନୁକୁଲ ଓରଫ୍ ଭାରତ କୁମ୍ଭାର(୨୫), ସରୋଜ ନାଗ(୧୮), କନ୍ଧପାଲିପଡ଼ାର ଚିଣ୍ଟୁ ସାହୁ(୨୬), ରାକେଶ ପଧାନ(୩୪) ଓ ବ୍ରାହ୍ମଣପଡ଼ାର ରାଜକିଶୋର ସ୍ୱାଇଁ (୨୧) । ତେବେ ଟାଉନ୍ ପିଏସ୍ କେସ୍ ନଂ.୫୯୨/୨୦୨୩ ଦଫା ୩୪୧/୨୯୪/୩୨୩/୩୦୭/୨୨୦-ବି/୫୦୬/୩୪ ଆଇପିସି ବଳରେ ଅଭିଯୁକ୍ତମାନଙ୍କୁ ଗିରଫ୍ କରାଯାଇଥିବା ବେଳେ ଅଧିକ ତଦନ୍ତ ଜାରି ରହିଥିବା ପୋଲିସ ପକ୍ଷରୁ କୁହାଯାଇଛି । ତେବେ ଘଟଣାର ୨୪ ଘଂଟା ନପୂରୁଣୁ ଅଭିଯୁକ୍ତମାନଙ୍କୁ ବଲାଙ୍ଗିର ପୋଲିସ ଗିରଫ୍ କରିବାରେ ସଫଳ ହୋଇଥିବା ଯୋଗୁଁ ସାଧାରଣରେ ବଲାଙ୍ଗିର ପୋଲିସ ପ୍ରଶଂସା କରାଯାଇଛି ।