ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ଜିଲ୍ଲାରେ କାମ କରୁଥିବା ଆଦର୍ଶ ଏନ୍ଜିଓ ଜିଲ୍ଲାରୁ ପଞ୍ଚାୟତ ସ୍ତର ଯାଏଁ ଶିକ୍ଷକ ଶିକ୍ଷୟତ୍ରୀ ନିଯୁକ୍ତି ଦେବା ନାଁରେ ଲକ୍ଷ ଲକ୍ଷ ଟଙ୍କା ଠକି ଦେଇଥିବା ଅଭିଯୋଗ ନେଇ ଆଜି ଯୁବକ ଯୁବତୀମାନେ ବଲାଙ୍ଗିର ଏସ୍ପିଙ୍କ ଦ୍ୱାରସ୍ଥ ହୋଇଛନ୍ତି । ଭିନ୍ନ ଭିନ୍ନ ପଦପଦବୀ ନିମନ୍ତେ ଯୁବକ ଯୁବତୀମାନେ ୭୫୦ରୁ ୧୩ ଶହ ଟଙ୍କା ପର୍ଯ୍ୟନ୍ତ ଜମା କରିଥିବା ବେଳେ ଶିକ୍ଷକ ଶିକ୍ଷୟତ୍ରୀମାନଙ୍କୁ ମାସକୁ ୩ ହଜାର ୭ ଶହ ଟଙ୍କା, ପଞ୍ଚାୟତ ସଂଯୋଜକମାନଙ୍କୁ ୬ ହଜାର ୫ ଶହ ଟଙ୍କା ଓ ବ୍ଲକ୍ ସଂଯୋଜକମାନଙ୍କୁ ୧୨ ହଜାର ଟଙ୍କା ଲେଖାଏଁ ଦରମା ଦେବାକୁ ପ୍ରତିଶ୍ରୁତି ଦିଆଯାଇଥିଲା । ୪ ମାସ ଧରି ଚାକିରି କରିବା ପରେ ବି ମିଳିଲାନି ଦରମା । ସେପଟେ ଆଦର୍ଶ ଏନ୍ଜିଓର ମୁଖ୍ୟ ଅଧିକାରୀଙ୍କ ମୋବାଇଲ୍ ଫୋନ୍ ବନ୍ଦ ଥିବାରୁ ଠକେଇର ଶିକାର ହୋଇଥିବା ଜାଣିପାରି ଯୁବକ ଯୁବତୀମାନେ ଆଜି ଏସ୍ପିଙ୍କ ଦ୍ୱାରସ୍ଥ ହୋଇଛନ୍ତି । ବଲାଙ୍ଗିର ସାମ୍ବାଦିକ ଭବନରେ ଏକ ସାମ୍ବାଦିକ ସମ୍ମିଳନୀର ଆହ୍ୱାନ କରି ପୀଡ଼ିତ ପୀଡ଼ିତାମାନେ ସେମାନେ ଜମା କରିଥିବା ଟଙ୍କା ସହ ତାଙ୍କ ୪ ମାସର ଦରମା ଦାବୀ କରିଛନ୍ତି ।