ବଲାଙ୍ଗିର, (କେପିଏନ୍ଏସ୍) : ବାବୁ ୪୨୦ର ବାପା । ନିଜେ ଚୋରି କରି ଚୋରି ହୋଇଛି ବୋଲି ଥାନାରେ ଅଭିଯୋଗ କରିଥିଲେ ସୁନୀଲ ନାଗ । ସୂଚନା ଅନୁସାରେ ଗତ ୧୦ ତାରିଖ ଦିନ ୨ ଲକ୍ଷ ୭୦ ହଜାର ଟଙ୍କା ଲୁଟ୍ ହୋଇଥିବା ନେଇ ସୁନୀଲ ନାଗ ନାମକ ଜଣେ ଯୁବକ ବଲାଙ୍ଗିର ସଦର ଥାନାରେ ଅଭିଯୋଗ କରିଥିଲେ । ତାଙ୍କ ଅଭିଯୋଗ ଅନୁସାରେ ପାଟଣାଗଡ଼ର ଶମ୍ଭୁ ଅଗ୍ରୱାଲଙ୍କ ପାଖରେ ସେ ଡ୍ରାଇଭର ଭାବେ କାମ କରି ଇଲେକ୍ଟ୍ରିକ ସାମଗ୍ରୀ ବିଭିନ୍ନ ସ୍ଥାନକୁ ପଠାଉଥିଲେ । ଗତ ୧୦ ତାରିଖ ଦିନ ବରଗଡ଼ ଓ ବରପାଲିରେ ସାମଗ୍ରୀ ଦେଇ ୫ ଲକ୍ଷ ୧୦ ହଜାର ଟଙ୍କା ଦୋକାନୀମାନଙ୍କ ଠାରୁ ସଂଗ୍ରହ କରିଥିଲେ । ସେଠାରୁ ପାଟଣାଗଡ଼ ଫେରୁଥିବା ସମୟରେ ଖଗସାବାହାଲ ଛକ ନିକଟରେ ୬ ଜଣ ଦୁର୍ବୃତ୍ତ ତାଙ୍କୁ ଅଟକାଇ ୨ ଲକ୍ଷ ୭୦ ହଜାର ଟଙ୍କା ଲୁଟି ନେଇଥିଲେ । ଅଭିଯୋଗକୁ ଭିତ୍ତି କରି ପୁଲିସ ଏକ ମାମଲା ରୁଜୁ କରି ତଦନ୍ତ କରିଥିଲା । ପରେ ଜଣାପଡିଥିଲା ଅଭିଯୋଗକାରୀ ସୁନୀଲ ହିଁ ସେହି ଟଙ୍କାକୁ ହଡପ କରି ମିଛରେ ଡକାୟତି ଅଭିଯୋଗ କରିଥିଲେ । ପୁଲିସ ସୁନୀଲଙ୍କ ନିକଟରୁ ୨ ଲକ୍ଷ ଟଙ୍କା ଜବତ କରି ତାଙ୍କୁ ଗିରଫ କରିବା ସହ କୋର୍ଟ ଚାଲାଣ କରିଥିବା ଜଣାପଡିଛି ।