ଶିବରାଜ ସିଂହ ଚୌହାନଙ୍କ ନେତୃତ୍ୱରେ ଆସନ୍ତାକାଲିଠାରୁ ପୁରୀରୁ ଆରମ୍ଭ ହେବ ‘ବିକଶିତ କୃଷି ସଂକଳ୍ପ ଅଭିଯାନ’
● ଆଜି ପୁଣିଥରେ ଗଣମାଧ୍ୟମକୁ କାର୍ଯ୍ୟକ୍ରମର ରୂପରେଖ ବିଷୟରେ କହିଛନ୍ତି କେନ୍ଦ୍ର କୃଷି ମନ୍ତ୍ରୀ ଶ୍ରୀ ଚୌହାନ
● କୃଷକଙ୍କ ଚାଷ ସମ୍ପର୍କିତ ବ୍ୟବହାରିକ ସମସ୍ୟାର ସମାଧାନ କରାଯିବ : ଶିବରାଜ ସିଂହ ଚୌହାନ
● ଦ୍ୱିପାକ୍ଷିକ ଆଲୋଚନା ହେବ, ଚାଷୀମାନଙ୍କ ସହିତ ସାମ୍ନାସାମ୍ନି କଥାବାର୍ତ୍ତା ହେବ : କେନ୍ଦ୍ର କୃଷି ମନ୍ତ୍ରୀ
● ଚାଷ ଜମିର ଆବଶ୍ୟକତା ଅନୁଯାୟୀ ଅଧିକ ଗବେଷଣାର ମାର୍ଗ ନିର୍ଣ୍ଣୟ କରାଯିବ : ଶ୍ରୀ ଚୌହାନ
● ସାମୂହିକ ମାଲିକାନା ଏବଂ ସମର୍ପଣ ସହିତ ଅଭିଯାନରେ ଯୋଗଦେବାକୁ କେନ୍ଦ୍ର କୃଷି ମନ୍ତ୍ରୀଙ୍କ ଆହ୍ୱାନ
ନୂଆଦିଲ୍ଲୀ, (ପିଆଇବି) : କେନ୍ଦ୍ର କୃଷି ଓ କୃଷକ କଲ୍ୟାଣ ମନ୍ତ୍ରୀ ଶିବରାଜ ସିଂହ ଚୌହାନ ଆସନ୍ତାକାଲି ଓଡ଼ିଶାର ପୁରୀରୁ ‘ବିକଶିତ କୃଷି ସଂକଳ୍ପ ଅଭିଯାନ’ର ଶୁଭାରମ୍ଭ କରିବେ । କୃଷି ଏବଂ କୃଷକ କଲ୍ୟାଣ ମନ୍ତ୍ରଣାଳୟ ଏବଂ ଭାରତୀୟ କୃଷି ଗବେଷଣା ପରିଷଦ (ଆଇସିଏଆର୍) ଦ୍ୱାରା ଆରମ୍ଭ ହୋଇଥିବା ଏହି ଗୁରୁତ୍ୱପୂର୍ଣ୍ଣ ପଦକ୍ଷେପ ଭାରତୀୟ କୃଷିରେ ପରିବର୍ତ୍ତନ ଆଣିବା ଏବଂ ବୈଜ୍ଞାନିକ ନବସୃଜନ ଓ ତୃଣମୂଳ ଭାଗିଦାରୀ ମାଧ୍ୟମରେ ଦେଶର ଖାଦ୍ୟ ଭବିଷ୍ୟତକୁ ସୁରକ୍ଷିତ କରିବା ଦିଗରେ ଏକ ଦୃଢ଼ ପଦକ୍ଷେପ । ଏହି ୧୫ ଦିନିଆ ଅଭିଯାନରେ ଶ୍ରୀ ଚୌହାନ ପ୍ରାୟ ୨୦ଟି ରାଜ୍ୟ ଗସ୍ତ କରିବେ । ଅଭିଯାନକୁ ସାକାର କରିବାରେ ରାଜ୍ୟ ସରକାରମାନଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିବ ଏବଂ ସମସ୍ତ ରାଜ୍ୟ ସାମୂହିକ ମାଲିକାନା ଏବଂ ସମର୍ପଣ ମାଧ୍ୟମରେ ଏହି ଅଭିଯାନକୁ ସଫଳ କରିବେ ବୋଲି ଆଶା କରାଯାଉଛି । ଏହି ଅଭିଯାନ ଦ୍ୱିମୁଖୀ ଯୋଗାଯୋଗ ଆଭିମୁଖ୍ୟ ଗ୍ରହଣ କରିବ, ଯେଉଁଥିରେ ବୈଜ୍ଞାନିକମାନେ କୃଷକମାନଙ୍କ ସହିତ ଗବେଷଣା ଏବଂ ବୈଷୟିକ ଜ୍ଞାନ ବାଣ୍ଟିବେ, ଅନ୍ୟପକ୍ଷରେ ସେମାନେ କୃଷକମାନେ ସମ୍ମୁଖୀନ ହେଉଥିବା ସମସ୍ୟା ବିଷୟରେ ସୂଚନା ସଂଗ୍ରହ କରିବେ । ଏହି ଫଳାଫଳଗୁଡ଼ିକ ଭବିଷ୍ୟତର ଗବେଷଣା ପ୍ରୟାସକୁ ମାର୍ଗଦର୍ଶନ କରିବାରେ ସାହାଯ୍ୟ କରିବ ଏବଂ ବ୍ୟବହାରିକ, ସ୍ଥାନ-ନିର୍ଦ୍ଦିଷ୍ଟ ସମାଧାନ ପ୍ରଦାନ କରିବ । ଆଜି ପୁଣିଥରେ ଗଣମାଧ୍ୟମ ସହ ଶିବରାଜ ସିଂହ ଚୌହାନ କାର୍ଯ୍ୟକ୍ରମର ରୂପରେଖ ଉପରେ ଆଲୋଚନା କରିଥିଲେ । ଶ୍ରୀ ଚୌହାନ କହିଥିଲେ ଯେ ଆସନ୍ତାକାଲି ଠାରୁ ଏକ ବ୍ୟାପକ ଅଭିଯାନ ଆରମ୍ଭ ହେବାକୁ ଯାଉଛି । ଭାରତୀୟ କୃଷି ଗବେଷଣା ପରିଷଦ ଏବଂ କୃଷି ବିଜ୍ଞାନ କେନ୍ଦ୍ରର ବୈଜ୍ଞାନିକମାନେ ‘ଲ୍ୟାବ୍ ଟୁ ଲ୍ୟାଣ୍ଡ’ ବା ପରୀକ୍ଷାଗାରରୁ ଚାଷ ଜମିକୁ ଯୋଡ଼ିବା ପାଇଁ ଏକ ଅଭିଯାନ ଆରମ୍ଭ କରିବେ । ଶ୍ରୀ ଚୌହାନ କହିଥିଲେ ଯେ ୧୬ ହଜାର ବୈଜ୍ଞାନିକଙ୍କୁ ନେଇ ସଂଖ୍ୟାଧିକ ଦଳ ଗଠନ କରାଯାଇଛି, ଯେଉଁମାନେ ଗାଁକୁ ଗାଁ ଯାଇ କୃଷକମାନଙ୍କ ସହ ଭାବ ବିନିମୟ କରିବେ । ୨୧୭୦ଟି ଦଳ ଗଠନ କରାଯାଇଛି, ଯେଉଁମାନଙ୍କ ସହ ଯୋଗାଯୋଗ କରାଯିବ । ଗୋଟିଏ ଦଳ ଗୋଟିଏ ଦିନରେ ୨ଟି ଗ୍ରାମ ପରିଦର୍ଶନ କରିବ । ଏହି ଅଭିଯାନ ୧୫ ଦିନ ଧରି ଚାଲିବ ଏବଂ କୃଷକମାନଙ୍କ ମଧ୍ୟରେ ସିଧାସଳଖ ଆଲୋଚନା ହେବ । ସ୍ଥାନୀୟ ଅଞ୍ଚଳର ଜଳବାୟୁ, ଜଳ, ମୃତ୍ତିକାର ପୋଷକ ତତ୍ତ୍ୱ ଏବଂ ଅନ୍ୟାନ୍ୟ କାରକ, କେଉଁ ଫସଲ ବୁଣାଯିବା ଉଚିତ, କେଉଁ ପ୍ରକାର ରହିବା ଉଚିତ, ସାରର କେତେ ସନ୍ତୁଳିତ ବ୍ୟବହାର କରାଯିବା ଉଚିତ, ପ୍ରାକୃତିକ ଚାଷ ସହିତ ଡାଲି ଏବଂ ତୈଳବୀଜ ଚାଷ ଉପରେ କୃଷକମାନଙ୍କ ସହ ଆଲୋଚନା କରାଯିବ । ବୈଜ୍ଞାନିକମାନେ ସିଧାସଳଖ ବାର୍ତ୍ତାଳାପ ମାଧ୍ୟମରେ କୃଷକମାନଙ୍କ ବ୍ୟବହାରିକ ସମସ୍ୟାର ସମାଧାନ କରିବେ । ଫାର୍ମର ଆବଶ୍ୟକତା ଅନୁଯାୟୀ ଅଧିକ ଗବେଷଣାର ଦିଗ ମଧ୍ୟ ସ୍ଥିର କରାଯିବ । ଶ୍ରୀ ଚୌହାନ ପୁଣିଥରେ ସମସ୍ତ ଜନସାଧାରଣଙ୍କୁ ଏହି ଅଭିଯାନରେ ସାମିଲ ହେବା ଏବଂ ଦେଶବ୍ୟାପୀ ଏହାକୁ ଫଳପ୍ରଦ ତଥା ସଫଳ କରିବା ଲାଗି ଆହ୍ୱାନ କରିଥିଲେ । ଏହି ଅଭିଯାନ ମେ ୨୯ରୁ ୧୨ ଜୁନ୍ ୨୦୨୫ ପର୍ଯ୍ୟନ୍ତ ୭୦୦ରୁ ଅଧିକ ଜିଲ୍ଲାରେ ଆୟୋଜନ ହେବ । ଏହି ଅଭିଯାନରେ ୭୩୧ଟି କେଭିକେ, ୧୧୩ଟି ଆଇସିଏଆର୍ ପ୍ରତିଷ୍ଠାନ, ରାଜ୍ୟସ୍ତରୀୟ ବିଭାଗ ଏବଂ କୃଷି, ଉଦ୍ୟାନ କୃଷି, ପ୍ରାଣୀସମ୍ପଦ, ମତ୍ସ୍ୟଚାଷ ଏବଂ ନବୋନ୍ମେଷୀ ଚାଷୀ ସାମିଲ ହେବେ । ଏହି ଅଭିଯାନ ମାଧ୍ୟମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିକଶିତ ଭାରତ ପାଇଁ ସଂକଳ୍ପ ଦିଗରେ ଏକ ଦୃଢ଼ ଅଧ୍ୟାୟ ଯୋଡ଼ିବା ପାଇଁ ପ୍ରୟାସ କରାଯାଇଛି ।