ଟିଟିଲାଗଡ଼, (କେପିଏନ୍ଏସ୍) : ଟିଟିଲାଗଡ଼ ଆର୍ପିଏଫ୍ ପାଖରୁ ଖବର ପାଇ ଟିଟିଲାଗଡ଼ ଅବକାରୀ ବିଭାଗ ଟିଟିଲାଗଡ଼ ରେଳ ଷ୍ଟେସନ୍ ୫ ନମ୍ବର ପ୍ଲାଟ୍ଫର୍ମରୁ ୨ ଜଣ ବ୍ୟକ୍ତି ନାଗପୁରକୁ ଗଂଜେଇ ନେଉଥିବା ବେଳେ ସେମାନଙ୍କୁ ଗିରଫ୍ କରିବା ସହ ସେମାନଙ୍କଠାରୁ ୨୦ କେଜି ୬୦୦ ଗ୍ରାମ ଗଂଜେଇ ଜବତ୍ କରିଥିଲା । ଗିରଫ୍ ଦୁଇ ଅଭିଯୁକ୍ତମାନେ ହେଲେ ମହାରାଷ୍ଟ୍ରର ୱାର୍ଦ୍ଧା ଜିଲ୍ଲା କରଂଜା ନିବାସୀ ଓମ୍ପ୍ରକାଶ ରମେଶରାଓ ନସାରେ(୧୯) ଏବଂ ସାହିଲ୍ ଅଶୋକରାଓ ସାରୋଡେ଼(୧୯) । ଦୁଇ ଅଭିଯୁକ୍ତଙ୍କୁ ପଚରା ଉଚୁରା ବେଳେ ଅଭିଯୁକ୍ତମାନେ ଟିଟିଲାଗଡ଼ ହାଇସ୍କୁଲପଡ଼ାରୁ ଜବତ୍ ଗଂଜେଇ ଆଣିଥିବା କହିବା ପରେ ଟିଟିଲାଗଡ଼ ଅବକାରୀ ବିଭାଗ ହାଇସ୍କୁଲପଡ଼ା ଚେତାବନୀ ଦାସଙ୍କ ଘର ଉପରେ ଚଢ଼ଉ କରିଥିଲା ଏବଂ ସେଠାରେ ୧୨୦ କେଜି ଗଂଜେଇ ଜବତ୍ କରିଥିଲା । ଘଟଣାସ୍ଥଳରୁ ଚନ୍ଦନ ଦାସ(୩୧)ଙ୍କୁ ଅବକାରୀ ବିଭାଗ ଗିରଫ୍ କରିଥିବା ବେଳେ ଚେତାବନୀ ଦାସ ଫୋରର୍ ଥିବା ଅବକାରୀ ବିଭାଗ ପକ୍ଷରୁ ସୂଚନା ମିଳିଛି । ଗିରଫ୍ ୩ ଜଣ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ସୂଚନାରେ କୁହାଯାଇଛି ।