ମହାରାଷ୍ଟ୍ର ବୁଲଢ଼ାଣାର ସମୃଦ୍ଧି ମହାମର୍ଗ ଏକ୍ସପ୍ରେସ୍ ୱେରେ ବସ୍ରେ ଲାଗିଲା ନିଆଁ : ୨୬ ଯାତ୍ରୀଙ୍କ ପ୍ରାଣହାନୀ, ଅନେକ ଆହତ
ବୁଲଢ଼ାଣା : ମହାରାଷ୍ଟ୍ରର ବୁଲଢ଼ାଣାର ସମୃଦ୍ଧି ମହାବର୍ଗ ଏକ୍ସପ୍ରେସ ୱେରେ ଏକ ବଡ଼ ଦୁର୍ଘଟଣା ଘଟିଛି । ଏଠାରେ ଏକ ବସ୍ରେ ନିଆଁ ଲାଗି ୨୬ ଯାତ୍ରୀଙ୍କ ମୃତ୍ୟୁ ଘଟିଛି । ବସ୍ରେ ସମୁଦାୟ ୩୩ ଜଣ ଯାତ୍ରୀ ଥିଲେ । ବୁଲଢ଼ାଣା ଜିଲ୍ଲାର ସିନ୍ଧଖେଡାରାଜା ନିକଟ ପିମ୍ପଲଖୁଟା ଗ୍ରାମ ନିକଟ ସମୃଦ୍ଧି ରାଜପଥରେ ଏହି ଦୁର୍ଘଟଣା ଘଟିଛି । ଯାତ୍ରୀବାହୀ ବସ ନାଗପୁରରୁ ପୁଣେ ଯାଉଥିଲା । ମଧ୍ୟରାତ୍ରିରେ ଏହି ଦୁର୍ଘଟଣା ଘଟିଛି । ବସ୍ରେ ନାଗପୁର, ୱାଦ୍ର୍ଥା ଏବଂ ୟବତମାଲର ଯାତ୍ରୀମାନେ ଉପସ୍ଥିତ ଥିଲେ । ଏହି ବସ୍ ବିଦର୍ଭ ଟ୍ରାଭେଲ୍ସର ହୋଇଥିବା ଜଣାପଡ଼ିଛି ।
ମହାରାଷ୍ଟ୍ରର ସିଏମ୍ ଏକନାଥ ସିନ୍ଦେ ଏହି ଦୁର୍ଘଟଣାରେ ଦୁଃଖ ପ୍ରକାଶ କରିବା ସହ ମୃତକଙ୍କ ସମ୍ପର୍କୀୟଙ୍କ ପାଇଁ ୫ ଲକ୍ଷ ଟଙ୍କା ଅନୁକଂପା ରାଶି ଘୋଷଣା କରିଛନ୍ତି । ଏହା ବ୍ୟତୀତ ସିଏମ୍ ଘଟଣାର ଉଚ୍ଚ ସ୍ତରୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି । ଏହି ପ୍ରସଙ୍ଗରେ ସିଏମ୍ ବୁଲଢ଼ାଣା କଲେକ୍ଟର ଏବଂ ପୋଲିସ ଅଧିକାରୀଙ୍କ ସହ ଫୋନରେ କଥା ହୋଇ କହିଛନ୍ତି ଯେ, ଏହି ଘଟଣାରେ ଆହତମାନଙ୍କୁ ସରକାରଙ୍କ ଖର୍ଚ୍ଚରେ ଚିକିତ୍ସା କରାଯିବା ଉଚିତ୍ ।