କିଭ୍ : ଆଜି ହେଉଛି ରୁଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧର ନବମ ଦିନ । ରୁଷର ସାମରିକ ଗୁଳି ବିନିମୟ ହେତୁ ଜାପୋଜିରିଆ ପରମାଣୁ କାରଖାନାରେ ନିଆଁ ଲାଗିଯାଇଛି । ତୁହାକୁ ତୁହା ଗୁଳି ଓ ବୋମା ବର୍ଷଣ ପରେ ରୁଷର ସେନା ୟୁକ୍ରେନ୍ ପ୍ରଶାସନ ଏବଂ ନିୟନ୍ତ୍ରଣ ଭବନକୁ କାବୁ କରିଛି । ତେବେ ବୋମା ମାଡ଼ ପରେ ବି କାରଖାନା ସୁରକ୍ଷିତ ଥିବା ନିର୍ଦ୍ଦେଶକ ଆଲେକ୍ସଜାଣ୍ଡାର୍ ଷ୍ଟାରୁଖ କହିଛନ୍ତି । ଏହି ସମୟରେ ଆମେରିକାର ରାଷ୍ଟ୍ରପତି ଜୋ ବାଇଡେନ ରୁଷ ସହ କଥା ହୋଇଛନ୍ତି ଏବଂ ଜରୁରୀକାଳୀନ ସହାୟକ ବ୍ୟକ୍ତିଙ୍କୁ ଜାପୋରିଜିଆରେ ପ୍ରବେଶ କରିବାକୁ ଅନୁମତି ଦେବାକୁ ନିବେଦନ କରିଛନ୍ତି ।
ରୁଷ ଦ୍ୱାରା ଏହି ଆକ୍ରମଣ ଜାରି ରହିଛି । ଖେରସାନରେ ହୋଇଥିବା ରୁଷ ଆକ୍ରମଣରେ ନଅ ଜଣ ପ୍ରାଣ ହରାଇଛନ୍ତି । ଗତକାଲି ୟୁକ୍ରେନରେ ଫସି ରହିଥିବା ଭାରତୀୟ ନାଗରିକଙ୍କୁ ଉଦ୍ଧାର କରିବା ପାଇଁ ୧୯ଟି ବିମାନ ଚଳାଚଳ କରାଯାଇଥିଲା । ୟୁକ୍ରେନରେ ଫସି ରହିଥିବା ଲୋକଙ୍କ ପରିବାରକୁ ମଧ୍ୟ ଯୋଗାଯୋଗ କରାଯାଉଛି ।
ପୋଲାଣ୍ଡରେ ଭାରତୀୟଙ୍କୁ ନେବାକୁ ଯାଇଥିବା ଅବସରପ୍ରାପ୍ତ ଜେନେରାଲ ଭି.କେ ସିଂ ସୂଚନା ଦେଇଛନ୍ତି ଯେ, ଚିକିତ୍ସା ଚାଲିଥିବା କିଭ୍ରେ ଆଉ ଜଣେ ଭାରତୀୟ ଛାତ୍ରଙ୍କ ନିଧନ ହୋଇଛି ।
ରୁଷ-ୟୁକ୍ରେନ ସାମରିକ ବିବାଦ ପରେ ଦୁଇ ପୂର୍ବତନ ସୋଭିଏତ୍ ଗଣତନ୍ତ୍ର ଜର୍ଜିଆ ଏବଂ ମଲଡୋଭା ୟୁରୋପୀୟ ୟୁନିଅନ୍ (ଇୟୁ)ର ସଦସ୍ୟତା ପାଇଁ ଆବେଦନ କରିଛନ୍ତି । ୟୁକ୍ରେନ କହିଛି ଯେ, ସେ ଫାଷ୍ଟ-ଟ୍ରାକ୍ ସଦସ୍ୟତା ଚାହୁଁଛି ।
ଯୁଦ୍ଧରେ ଫସି ରହିଥିବା ଭାରତୀୟ ନାଗରିକଙ୍କୁ ଫେରାଇ ଆଣିବା ପାଇଁ କେନ୍ଦ୍ର ସରକାର ଉଦ୍ୟମ ଜୋରଦାର କରିଛନ୍ତି । ଗୁରୁବାର ଦିନ ୟୁକ୍ରେନର ଖାର୍କିଭ ସହରରେ ରହୁଥିବା ଭାରତୀୟ ନାଗରିକଙ୍କୁ ସରକାର ତ୍ୱରାନ୍ୱିତ କରିବା ପାଇଁ ଏକ ଫର୍ମ ପୂରଣ କରିବାକୁ ନିବେଦନ କରିଛନ୍ତି ।
ରୁଷ୍ର ବିସ୍ଫୋରଣ ମଧ୍ୟରେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି କହିଛନ୍ତି ଯେ, ଯୁଦ୍ଧ ପରେ ୟୁକ୍ରେନକୁ ପୁନଃ ନିର୍ମାଣ କରିବା ପାଇଁ ସେ କାର୍ଯ୍ୟ କରିବେ । ଆମର ସ୍ୱାଧୀନତା ବ୍ୟତୀତ ଆମର କିଛି ହରାଇବାକୁ ନାହିଁ । ଓଡେସା, ବିଲା ସର୍ସ୍କା ଏବଂ ଭୋଲିନ୍ ଓବ୍ଲାଷ୍ଟସରେ ଏୟାର ଷ୍ଟ୍ରାଇକ୍ ଚେତାବନୀ ଦିଆଯାଇଛି । ବାସିନ୍ଦାଙ୍କୁ ନିକଟସ୍ଥ ସୁରକ୍ଷିତ ସ୍ଥାନରେ ଆଶ୍ରୟ ନେବାକୁ କୁହାଯାଇଛି ।
ବ୍ରିଟିଶ ପ୍ରଧାନମନ୍ତ୍ରୀ ବୋରିସ୍ ଜନସନ ରାଷ୍ଟ୍ରପତି ଜେଲେନସ୍କିଙ୍କ ସହ କଥାବାର୍ତ୍ତା କରି କହିଛନ୍ତି ଯେ ଜାପୋରିଜିଆ ପରମାଣୁ କାରଖାନାର ପରିସ୍ଥିତି ସମ୍ପର୍କରେ ସେ ଆସନ୍ତା ଘଣ୍ଟା ମଧ୍ୟରେ ମିଳିତ ଜାତିସଂଘ ସୁରକ୍ଷା ପରିଷଦର ଏକ ଜରୁରୀ ବୈଠକ ଡାକିବେ ।
ୟୁକ୍ରେନରୁ ଭାରତୀୟଙ୍କ ନିରାପଦ ପ୍ରତ୍ୟାବର୍ତ୍ତନ ପାଇଁ ଭାରତ ସରକାର ସମ୍ପୂର୍ଣ୍ଣ ବଳ ପ୍ରୟୋଗ କରିଛନ୍ତି । ଏପର୍ଯ୍ୟନ୍ତ ଅପରେସନ୍ ଗଙ୍ଗା ଅଧୀନରେ ୬,୪୦୦ ଭାରତୀୟଙ୍କୁ ୩୦ ଟି ବିମାନ ଯୋଗେ ଦେଶକୁ ଅଣାଯାଇଛି । ମାର୍ଚ୍ଚ ୧୦ ସୁଦ୍ଧା ସମସ୍ତଙ୍କୁ ଆଣିବାକୁ ଏକ ଲକ୍ଷ୍ୟ ଧାର୍ଯ୍ୟ କରାଯାଇଛି । ଭାରତୀୟମାନଙ୍କୁ ସୁରକ୍ଷିତ ବାହାର କରିବା ପାଇଁ ରୁଷ୍ ୧୩୦ଟି ବସର ସୁବିଧା କରିଛି ।
ୟୁକ୍ରେନକୁ ୧୦ ବିଲିୟନ ଡଲାର (ପ୍ରାୟ ୭୫ ହଜାର ୯୧୧ କୋଟି ଟଙ୍କା) ଦେବା ପାଇଁ ବାଇଡେନ ପ୍ରଶାସନ ଆମେରିକା କଂଗ୍ରେସକୁ ଏକ ପ୍ରସ୍ତାବ ପଠାଇଛି । ଅନୁମତି ପାଇବା ପରେ ଏହି ଟଙ୍କା ୟୁକ୍ରେନକୁ ପଠାଯିବ । ଦୁଇ ଦେଶ ମଧ୍ୟରେ ଶାନ୍ତି କଥାବାର୍ତ୍ତାର ପରବର୍ତ୍ତୀ ରାଉଣ୍ଡରେ ମାନବିକ କରିଡର ନିର୍ମାଣ ପାଇଁ ସହମତି ପ୍ରକାଶ ପାଇଛି । ଏହି କରିଡର ଅଧୀନରେ ଯୁଦ୍ଧ ଅଞ୍ଚଳର ଲୋକଙ୍କ ମଧ୍ୟରେ ଖାଦ୍ୟ ଏବଂ ଔଷଧ ବିତରଣ କାର୍ଯ୍ୟ କରାଯିବ ।
