ହାଇଦ୍ରାବାଦ : ହାଇଦ୍ରାବାଦରେ ଚାରିମିନାର ଏକ୍ସପ୍ରେସର ୩ଟି ବଗି ଲାଇନଚ୍ୟୁତ ହୋଇଥିବା ଜଣାପଡିଛି । ଏହି ଦୁର୍ଘଟଣାରେ ୬ ଜଣ ଯାତ୍ରୀ ଆହତ ହୋଇଥିବା ଖବର ମିଳିଛି । ସୂଚନା ଅନୁଯାୟୀ ହାଇଦ୍ରାବାଦର ନାମପଲ୍ଲୀସ୍ଥିତ ହାଇଦ୍ରାବାଦ ଡେକାନ୍ ରେଳ ଷ୍ଟେସନରେ ଚେନ୍ନାଇ-ହାଇଦ୍ରାବାଦ ଚାରିମିନାର ଏକ୍ସପ୍ରେସର ୩ଟି ବଗି ବୁଧବାର ଅପରାହ୍ନରେ ଲାଇନଚ୍ୟୁତ ହେବା ଫଳରେ ୬ ଜଣ ଯାତ୍ରୀ ସାମାନ୍ୟ ଆହତ ହୋଇଛନ୍ତି । ହାଇଦ୍ରାବାଦ ଡେକାନ୍ ରେଳ ଷ୍ଟେସନ ହେଉଛି ଟ୍ରେନର ଶେଷ ଗନ୍ତବ୍ୟସ୍ଥଳ । ଦକ୍ଷିଣ କେନ୍ଦ୍ରୀୟ ରେଳବାଇ (ଏସ୍ସିଆର) ଅଧିକାରୀଙ୍କ କହିବା ଅନୁଯାୟୀ, ଟ୍ରେନ୍ଟି ଷ୍ଟେସନରେ ପହଞ୍ଚିବା ବେଳକୁ ଏହା ଧୀର ବେଗରେ ଗତି କରୁଥିଲା ଏବଂ ଶେଷ ବିନ୍ଦୁକୁ ଅତିକ୍ରମ କରି ଯାଇଥିଲା । ଯାହା ଫଳରେ ଟ୍ରେନ୍ର ୩ଟି ବଗି (ଏସ୍୨, ଏସ୍୩ ଓ ଏସ୍୬) ଲାଇନଚ୍ୟୁତ ହୋଇ ଯାଇଥିଲା । ଆହତ ଯାତ୍ରୀମାନଙ୍କୁ ନିକଟସ୍ଥ ଡାକ୍ତରଖାନାରେ ଚିକିତ୍ସା କରାଯାଉଛି ବୋଲି ଏସ୍ସିଆର୍ର ଜଣେ ଅଧିକାରୀ କହିଛନ୍ତି ।