ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : ପୁରୀ ଜିଲ୍ଲା ଡେଲାଙ୍ଗ ବ୍ଲକ ଅନ୍ତର୍ଗତ ଖେଳାଉରୀ ଗ୍ରାମର ବରିଷ୍ଠ ପାଲା ଗାୟକ ସ୍ୱର୍ଗତ ପ୍ରଫୁଲ୍ଲ ଚନ୍ଦ୍ର ମହାରଣାଙ୍କ ଏକାଦଶାହ ଉତ୍ସବରେ ଏକ ସ୍ମୃତି ଚାରଣ ଓ ଶ୍ରଦ୍ଧାଞ୍ଜଳି ସଭା ଦିବଙ୍ଗତ ମହାରଣାଙ୍କ ବାସଭବନ ସମ୍ମୁଖରେ ଶୁକ୍ରବାର ଅନୁଷ୍ଠିତ ହୋଇଯାଇଛି । ଅନନ୍ତ ଗୋପାଳ ଗୁରୁ ଦାସ ପାଲା ସମିତି ଆନୁକୂଲ୍ୟରେ ଆୟୋଜିତ ଏହି ଶ୍ରଦ୍ଧାଞ୍ଜଳି ସଭାରେ ମୁଖ୍ୟ ଅତିଥି ଭାବେ ବରିଷ୍ଠ ଗାୟକ ନାରାୟଣ ମହାରଣା, ମୁଖ୍ୟବକ୍ତା ରୂପେ ଅଭିମନ୍ୟୁ ସ୍ୱାଇଁ, ସମ୍ମାନିତ ଅତିଥି ଭାବେ ହରିହର ସାମନ୍ତରାୟ, ରମେଶ ଚନ୍ଦ୍ର ପ୍ରଧାନ, ପ୍ରମୁଖ ଯୋଗ ଦେଇଥିଲେ । ଉକ୍ତ ସ୍ମୃତି ଚାରଣ ସଭାରେ ଗାୟକ କାଶୀନାଥ ଜେନା ଅଧ୍ୟକ୍ଷତା କରିଥିବା ବେଳେ ପାଲା ସମିତିର ସମ୍ପାଦକ ତଥା ପାଲା ଗାୟକ ପ୍ରମୋଦ କୁମାର ଜେନା ଅତିଥି ପରିଚୟ ପ୍ରଦାନ ସହ ମଞ୍ଚ ପରିଚାଳନା କରିଥିଲେ । ଦିବଙ୍ଗତ ମହାରଣାଙ୍କ ପାଲା ଗୁରୁ ବିଶ୍ୱନାଥ ସାହୁ, ଗିରିଧାରୀ ମହାପାତ୍ର ସହ ଜଗନ୍ନାଥ ଧର୍ମ ପ୍ରଚାରକ ଶରତ ରାଉତ, ସମେତ ଶତାଧିକ ଗାୟକ, ଗାୟିକା, ବାୟକ, ପାଳିଆ, ଶିଷ୍ୟ, ବହୁ ବୁଦ୍ଧିଜୀବୀ, ବନ୍ଧୁ ପରିଜନ ଓ ଗ୍ରାମବାସୀ ଯୋଗଦାନ କରି ସ୍ୱର୍ଗତ ମହାରଣାଙ୍କ ସ୍ମୃତି ଚାରଣ କରିବା ସହ ଅମର ଆତ୍ମାର ସଦଗତି କାମନା କରି ଦୁଇ ମିନିଟ ନିରବ ପ୍ରାର୍ଥନା ପୂର୍ବକ ଅଶ୍ରୁଳ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ସ୍ୱର୍ଗତ ମହାରଣାଙ୍କ ପୁତ୍ର ନିରଞ୍ଜନ ମହାରଣା ସମସ୍ତଙ୍କୁ ସ୍ୱାଗତ ଓ କୃତଜ୍ଞତା ଜଣାଇ ଥିଲେ ।