- ପ୍ରଯୁକ୍ତିବିଦ୍ୟା, ନବସୃଜନ ଏବଂ ଆତ୍ମନିର୍ଭରଶୀଳତା ଉପରେ ଧ୍ୟାନ ଦେଇ ଭୁବନେଶ୍ୱରରେ ଦୁଇ ଦିନିଆ ଚିନ୍ତନ ଶିବିର ଆୟୋଜନ କରିବ ଇସ୍ପାତ ମନ୍ତ୍ରଣାଳୟ
- ଇସ୍ପାତ କ୍ଷେତ୍ରରେ ଅଭିବୃଦ୍ଧି ଏବଂ ପରିଚାଳନଗତ ଉତ୍କର୍ଷତା ପାଇଁ ଚିନ୍ତନ ଶିବିରରେ ସହଯୋଗ ରଣନୀତି ପ୍ରସ୍ତୁତ କରାଯିବ
ନୂଆଦିଲ୍ଲୀ, (ପିଆଇବି) : ଆସନ୍ତାକାଲିଠାରୁ କେନ୍ଦ୍ର ଇସ୍ପାତ ମନ୍ତ୍ରଣାଳୟ ଭୁବନେଶ୍ୱର ଠାରେ ଏକ ଦୁଇ ଦିନିଆ ଚିନ୍ତନ ଶିବିର ଆୟୋଜନ କରିବ। ଏଥିରେ ଭାରତର ଇସ୍ପାତ କ୍ଷେତ୍ରର ଭବିଷ୍ୟତ ଗତିପଥ ଉପରେ ବିଚାର ବିମର୍ଶ କରିବା ପାଇଁ ବରିଷ୍ଠ ନେତୃତ୍ୱ ଏବଂ ଅଂଶୀଦାରମାନଙ୍କୁ ଏକତ୍ରିତ କରାଯିବ । ରାଷ୍ଟ୍ର ନିର୍ମାଣରେ ଘରୋଇ ଇସ୍ପାତ କ୍ଷେତ୍ରର ଭୂମିକାକୁ ସୁଦୃଢ଼ କରିବା ପାଇଁ ବ୍ୟାପକ ବିଚାରମନ୍ଥନ, ସହଯୋଗ ଏବଂ ରଣନୀତିକ ସମନ୍ୱୟ ପାଇଁ ଶିବିରକୁ ଏକ ମଞ୍ଚ ଭାବରେ ପରିକଳ୍ପନା କରାଯାଇଛି । କେନ୍ଦ୍ର ଇସ୍ପାତ ମନ୍ତ୍ରୀ ଏଚ୍.ଡି. କୁମାରସ୍ୱାମୀ ଏବଂ ଇସ୍ପାତ ରାଷ୍ଟ୍ରମନ୍ତ୍ରୀ ଭୂପତିରାଜୁ ଶ୍ରୀନିବାସ ବର୍ମାଙ୍କ ଉପସ୍ଥିତିରେ ଏହି ଆଲୋଚନା ଅନୁଷ୍ଠିତ ହେବ । ସେମାନଙ୍କ ସହିତ ଇସ୍ପାତ ମନ୍ତ୍ରଣାଳୟର ସଚିବ ସନ୍ଦୀପ ପୌଣ୍ଡ୍ରିକ୍, ଇସ୍ପାତ ମନ୍ତ୍ରଣାଳୟ ଅଧୀନସ୍ଥ କେନ୍ଦ୍ରୀୟ ରାଷ୍ଟ୍ରାୟତ୍ତ ଉଦ୍ୟୋଗଗୁଡ଼ିକର ମୁଖ୍ୟ ଏବଂ ଇସ୍ପାତ ମନ୍ତ୍ରଣାଳୟର ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଯୋଗଦେବେ । ଶିବିରର ବିଷୟବସ୍ତୁ ଅଧିବେଶନଗୁଡ଼ିକରେ ନବସୃଜନ ଏବଂ ପ୍ରତିଦ୍ୱନ୍ଦ୍ୱିତାକୁ ଆଗେଇ ନେବା ପାଇଁ କୃତ୍ରିମ ବୁଦ୍ଧିମତ୍ତା, ମେସିନ୍ ଲର୍ଣ୍ଣିଂ ଏବଂ ଡିଜିଟାଲାଇଜେସନ୍ ସମେତ ଇସ୍ପାତରେ ସଦ୍ୟତମ ପ୍ରଯୁକ୍ତିବିଦ୍ୟାର ଉପଯୋଗ ଉପରେ ଆଲୋଚନା ହେବ । ପରିଚାଳନାଗତ ଉତ୍କର୍ଷତା ଏବଂ ଉତ୍ପାଦକତା ଉପରେ ମଧ୍ୟ ଆଲୋଚନା ହେବ ଯାହା ମୂଲ୍ୟ ଶୃଙ୍ଖଳାରେ ଦକ୍ଷତା ସୁନିଶ୍ଚିତ କରିବ । ଏହି କାର୍ଯ୍ୟକ୍ରମରେ ଅଂଶୀଦାରଙ୍କ ମତାମତ ସଂଗ୍ରହ ମାଧ୍ୟମରେ ଏକ ରଣନୀତିକ ଦୃଷ୍ଟିକୋଣ ବିକାଶ କରିବା ପାଇଁ ଲକ୍ଷ୍ୟ ରଖାଯାଇଛି । ଅନ୍ୟପଟେ ଆତ୍ମନିର୍ଭରଶୀଳତା ଏବଂ ନବସୃଜନକୁ ଆଗକୁ ବଢ଼ାଇବା ପାଇଁ ଇସ୍ପାତ କ୍ଷେତ୍ରରେ ସ୍ୱଦେଶୀ ପ୍ରଯୁକ୍ତିବିଦ୍ୟାକୁ ପ୍ରୋତ୍ସାହିତ କରିବା ଉପରେ ମଧ୍ୟ ଚିନ୍ତନ ଶିବିରରେ ବିଶେଷ ଗୁରୁତ୍ୱ ଦିଆଯିବ । ଏହା ସହିତ, ଶିବିର ଆଧୁନିକ ଖଣି ପଦ୍ଧତି ଉପରେ ମଧ୍ୟ ବିଚାରବିମର୍ଶ କରିବ, ଯେଉଁଥିରେ ଖଣି ଭିତ୍ତିଭୂମିର ଉନ୍ନତିକରଣ ଏବଂ ଶିଳ୍ପର ବର୍ଦ୍ଧିତ ଚାହିଦା ପୂରଣ କରିବା ପାଇଁ ଉତ୍ପାଦନ କ୍ଷମତା ବୃଦ୍ଧି ଉପରେ ଧ୍ୟାନ ଦିଆଯିବ । ଭୁବନେଶ୍ୱରରେ ଚିନ୍ତନ ଶିବିର ଏପରି ଇସ୍ପାତ ଶିଳ୍ପ ପାଇଁ ରୋଡମ୍ୟାପ୍ ପ୍ରସ୍ତୁତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ଏହା ଭାରତର ଆର୍ଥିକ ଅଭିବୃଦ୍ଧି ଏବଂ ଶିଳ୍ପ ପ୍ରଗତିରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ।