ମୁରିବାହାଲ, (ଦୁର୍ଗାନନ୍ଦ ମହାକୁର) : ବଲାଙ୍ଗିର ଜିଲ୍ଲା ମୁରିବାହାଲ ବ୍ଲକ ଲେବଡା ପଞ୍ଚାୟତ ଟଟୋପରା ଗ୍ରାମରେ ଭଗବାନ ଶ୍ରୀ ସତ୍ୟସାଇ ବାବାଙ୍କ ବାର୍ଷିକ ଉତ୍ସବ ଟଟୋପରା ଭଜନ ମଣ୍ଡଳୀର ଆବାହକ ଭାର୍ଗବ ପୁଟେଲ ଏବଂ ନୀଳମଣି ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଗ୍ରାମର ଆବାଳ ବୃଦ୍ଧ ବନିତାଙ୍କ ସହଯୋଗରେ ନଗର ପରିକ୍ରମା, ସତ୍ୟସାଇ ବାବାଙ୍କ ପାଲିଙ୍କି ଯାତ୍ରା ମଧ୍ୟ କରାଯାଇଥିଲା । ଏଥିରେ ଆବାହକ ଭାର୍ଗବ ପୁଟେଲ ମୁଖ୍ୟବକ୍ତା ହିସାବରେ ଅନୁଷ୍ଠାନରେ ବିତିଯାଇଥିବା ୩୦ ବର୍ଷର ମୁଖ୍ୟ ବିଷୟ ତଥା ସେବାକାର୍ଯ୍ୟ, ବାଳବିକାଶ, ସତ୍ୟ, ଧର୍ମ, ଶାନ୍ତି, ପ୍ରେମ, ଅହିଂସା ଏବଂ ବାବାଙ୍କ ନବବିଧ ଆଚରଣ ଉପରେ ଆଲୋକପାତ କରାଇଥିଲେ । ପୂର୍ବରୁ ଅନୁଷ୍ଠିତ ବିଭିନ୍ନ ପ୍ରତିଯୋଗିତାରେ ଉତ୍ତୀର୍ଣ୍ଣ ହୋଇଥିବା ବାଳବିକାଶ ପିଲାମାନଙ୍କୁ ସାର୍ଟିଫିକେଟ ପ୍ରଦାନ କରାଯାଇଥିଲା । ଏହି କାର୍ଯ୍ୟକ୍ରମରେ ଗ୍ରାମ ତଥା ଅନ୍ୟ ଗ୍ରାମରୁ ୪ଶହରୁ ଅଧିକ ଲୋକ ଉପସ୍ଥିତ ରହି ଏହି ଉତ୍ସବର ଆନନ୍ଦ ନେଇଥିଲେ ।