କଳାହାଣ୍ଡି, (ଶୁଭେନ୍ଦୁ କୁମାର ପଣ୍ଡା) : କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ବ୍ଲକର ପୋଡ଼ାପଦର ଓ ତଲନାଗି ପଞ୍ଚାୟତର ପୂର୍ବତନ ନିଲମ୍ବିତ ପିଇଓ ଦେବାନନ୍ଦ ସାଗରଙ୍କୁ ତିନିକୋଟିରୁ ଅଧିକ ସରକାରୀ ଅର୍ଥ ଆତ୍ମସାତ କରିଥିବା ଅଭିଯୋଗରେ ଶନିବାର ଭିଜିଲାନ୍ସ ବିଭାଗ ଗିରଫ କରିଛି । ସୂଚନାନୁଯାୟୀ ଦେବାନନ୍ଦ ପୋଡାପଦର ଓ ତଲନାଗି ପଞ୍ଚାୟତରେ କାର୍ୟ୍ୟରତ ଥିବା ସମୟରେ ନିଜ ପଦବୀର ଅପବ୍ୟବହାର କରି ସରପଞ୍ଚଙ୍କ ଜାଲ ଦସ୍ତଖତ କରି ପିଏଫ୍ଏମ୍ଏସ୍ ମାଧ୍ୟମରେ ନିଜ ବ୍ୟକ୍ତିଗତ ବ୍ୟାଙ୍କ ଖାତାକୁ ୩.୨୬ କୋଟି ଟଙ୍କା ପଠାଇଥିଲେ । ତଲନାଗି ପଞ୍ଚାୟତର ୧ କୋଟି ୧୭ ଲକ୍ଷ ୮୬ ହଜାର ୩୪୨ ଟଙ୍କା ଏବଂ ପୋଡାପଦର ପଞ୍ଚାୟତର ୧ କୋଟି ୫୫ ଲକ୍ଷ ୭୫୮ ସରକାରୀ ଟଙ୍କାକୁ ନିଜ ବ୍ୟକ୍ତିଗତ ବ୍ୟାଙ୍କ ଖାତାକୁ ପଠାଇଥିଲେ । ସେହି ଅର୍ଥକୁ ଦେବାନନ୍ଦ ଫେୟାରପ୍ଲେ ନାମକ ଅନଲାଇନ ପ୍ଲାଟଫର୍ମ ମାଧ୍ୟମରେ କ୍ରିକେଟ ବେଟିଂ ପାଇଁ ବ୍ୟବହାର କରିଥିଲେ । ୨୦୨୩ ମସିହାରେ ମଧ୍ୟ ସେ କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ବ୍ଲକ ବଡ଼ ଛତରଙ୍ଗ ଏବଂ ବିରିକୋଟ ପଞ୍ଚାୟତ ଏବଂ ଲାଞ୍ଜିଗଡ଼ ବ୍ଲକର ପାହାଡ଼ ପଦର ପଞ୍ଚାୟତର ପିଇଓ ଭାବେ କାର୍ୟ୍ୟରତ ଥିବା ସମୟରେ ୧.୦୪ କୋଟି ସରକାରୀ ଅର୍ଥର ଅପବ୍ୟବହାର କରି ଭିଜିଲାନ୍ସ ହାତରେ ଧରାପଡ଼ି ନିଲମ୍ବିତ ହୋଇଥିଲେ । ଏହି ସବୁ ମାମଲାର ତଦନ୍ତ ଚାଲିଥିଲା । ଏହି ଘଟଣାରେ ସତ୍ୟାସତ୍ୟ ଥିବା ଜଣାପଡିବା ପରେ ଶନିବାର ଭିଜିଲାନ୍ସ ବିଭାଗ ନିଲମ୍ବିତ ପିଇଓ ଦେବାନନ୍ଦ ସାଗରଙ୍କୁ ଗିରଫ କରି ଭବାନୀପାଟଣା ଭିଜିଲାନ୍ସ ବିଭାଗ ସ୍ୱତନ୍ତ୍ର ଜଜ କୋର୍ଟକୁ ପଠାଇଥିବା ସୂଚନା ମିଳିଛି । ଏ ସଂକ୍ରାନ୍ତରେ କୋରାପୁଟ ଭିଜିଲାନ୍ସ କାର୍ୟ୍ୟାଳୟରେ ଦୁଇଟି ମାମଲା ୧୨ ଏବଂ ୧୩ ରୁଜ୍ଜୁ କରି ଅଧିକ ତଦନ୍ତ ଜାରି ରଖିଛି ଭିଜିଲାନ୍ସ ବିଭାଗ ।