- ପର୍ତ୍ତୁଗାଲରେ ଥିବା ଭାରତୀୟ ସମ୍ପ୍ରଦାୟର ସଦସ୍ୟମାନଙ୍କୁ ସ୍ୱାଗତ ସମାରୋହରେ ସମ୍ବୋଧିତ କରିଛନ୍ତି ଶ୍ରୀମତୀ ଦ୍ରୌପଦୀ ମୁର୍ମୁ
ସ୍ଲୋଭାକିଆ ଗସ୍ତରେ ଯାଇଛନ୍ତି ରାଷ୍ଟ୍ରପତି
ନୂଆଦିଲ୍ଲୀ, (ପିଆଇବି) : ପର୍ତ୍ତୁଗାଲ ଗସ୍ତର ଶେଷ ଦିନ (ଏପ୍ରିଲ ୮, ୨୦୨୫)ରେ ଭାରତର ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁ ଲିସବନଠାରେ ପର୍ତ୍ତୁଗିଜ ସଂସଦର ଅଧ୍ୟକ୍ଷ ମହାମହିମ ଜୋସେ ପେଡ୍ରୋ ଆଗୁଆର-ବ୍ରାଙ୍କୋଙ୍କୁ ଭେଟିଥିଲେ । ଭାରତ ଓ ପର୍ତ୍ତୁଗାଲର ସଂସଦ ମଧ୍ୟରେ ନିୟମିତ ଆଦାନ ପ୍ରଦାନ ଦୁଇ ଦେଶର ଜନସାଧାରଣଙ୍କ ମଧ୍ୟରେ ସମ୍ପର୍କକୁ ସୁଦୃଢ଼ କରିବ ବୋଲି ସେମାନେ ଏକମତ ଥିଲେ । ରାଷ୍ଟ୍ରପତି ଲିସବନ ଠାରେ ପର୍ତ୍ତୁଗାଲର ପ୍ରଧାନମନ୍ତ୍ରୀ ମହାମହିମ ଲୁଇସ୍ ମଣ୍ଟେନେଗ୍ରୋଙ୍କୁ ମଧ୍ୟ ଭେଟି ଆଲୋଚନା କରିଥିଲେ । ଏହି ବୈଠକରେ ଉଭୟ ନେତା ଦ୍ୱିପାକ୍ଷିକ ସମ୍ପର୍କକୁ ଆହୁରି ସୁଦୃଢ଼ କରିବା ଦିଗରେ ଆଲୋଚନା କରିଥିଲେ । ବ୍ୟବସାୟ ଓ ବାଣିଜ୍ୟ, ପ୍ରତିରକ୍ଷା, ବିଜ୍ଞାନ ଓ ପ୍ରଯୁକ୍ତି ବିଦ୍ୟା ଏବଂ ଶକ୍ତି ଭଳି ଅନେକ କ୍ଷେତ୍ରରେ ସହଯୋଗର ଅଧିକ ସୁଯୋଗ ରହିଛି ବୋଲି ସେମାନେ ସହମତି ପ୍ରକାଶ କରିଥିଲେ । ଗତକାଲି (ଏପ୍ରିଲ ୮, ୨୦୨୫) ରାଷ୍ଟ୍ରପତି ଦ୍ରୌପଦୀ ମୁର୍ମୁ ରାଷ୍ଟ୍ରପତି ମାର୍ସେଲୋ ରିବେଲୋ ଡି ସୋସାଙ୍କ ସହ ଲିସବନ ସ୍ଥିତ ଚମ୍ପାଲିମାଉଡ୍ ଫାଉଣ୍ଡେସନ ପରିଦର୍ଶନ କରି ସ୍ନାୟୁବିଜ୍ଞାନ, ଅଙ୍କୋଲୋଜି, ପରୀକ୍ଷାମୂଳକ କ୍ଲିନିକାଲ୍ ଗବେଷଣା ଏବଂ ସ୍ୱୟଂଚାଳିତ ଔଷଧ ବିତରଣ କ୍ଷେତ୍ରରେ ବିଭିନ୍ନ ଗବେଷଣା ଓ ବିକାଶ ପଦକ୍ଷେପ ଦେଖିଥିଲେ । ଫାଉଣ୍ଡେସନ୍ ଏବଂ ପର୍ତ୍ତୁଗାଲର ଅନ୍ୟାନ୍ୟ ଅନୁଷ୍ଠାନରେ କାର୍ଯ୍ୟରତ ଭାରତୀୟ ଗବେଷକ ଏବଂ ପଣ୍ଡିତମାନଙ୍କ ସହ ରାଷ୍ଟ୍ରପତି ଆଲୋଚନା କରିଥିଲେ । ଉଦୀୟମାନ ପ୍ରଯୁକ୍ତି ବିଦ୍ୟା ଏବଂ ବୈଜ୍ଞାନିକ ଗବେଷଣା କ୍ଷେତ୍ରରେ ଭାରତ-ପର୍ତ୍ତୁଗାଲ ସହଯୋଗକୁ ଗଭୀର କରିବାରେ ଭାରତୀୟ ପଣ୍ଡିତମାନଙ୍କ ଭୂମିକା ପାଇଁ ସେ ପ୍ରଶଂସା କରିଥିଲେ । ଚମ୍ପାଲିମାଉଡ଼ ସେଣ୍ଟର ଫର ଦି ଅନନୋନ୍ ହେଉଛି ଏକ ଅତ୍ୟାଧୁନିକ ଚିକିତ୍ସା, ବୈଜ୍ଞାନିକ ଏବଂ ବୈଷୟିକ ଅନୁଷ୍ଠାନ ଯେଉଁଠାରେ ପ୍ରୟୋଗିକ ଗବେଷଣା କାର୍ଯ୍ୟକଳାପ ଏବଂ ଉନ୍ନତ ଶିକ୍ଷା କାର୍ଯ୍ୟକ୍ରମ ସହିତ ଆନ୍ତଃବିଭାଗୀୟ କ୍ଲିନିକାଲ କେୟାର ବିକଶିତ କରାଯାଉଛି । ଏହାପରେ ରାଷ୍ଟ୍ରପତି ଲିସବନ ଠାରେ ଥିବା ମହାତ୍ମା ଗାନ୍ଧୀ ଓ କସ୍ତୁରବା ଗାନ୍ଧୀଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ । ସେ ରାଧା-କୃଷ୍ଣ ମନ୍ଦିର ଯାଇ ପୂଜାର୍ଚ୍ଚନା କରିଥିଲେ । ଲିସବନରେ ଅନୁଷ୍ଠିତ ଅନ୍ତିମ କାର୍ଯ୍ୟକ୍ରମରେ ରାଷ୍ଟ୍ରପତି ପର୍ତ୍ତୁଗାଲରେ ଅବସ୍ଥାପିତ ଭାରତୀୟ ରାଷ୍ଟ୍ରଦୂତଙ୍କ ଦ୍ୱାରା ଆୟୋଜିତ ଏକ ସମ୍ବର୍ଦ୍ଧନା ଉତ୍ସବରେ ଭାରତୀୟ ସମ୍ପ୍ରଦାୟର ସଦସ୍ୟମାନଙ୍କୁ ସମ୍ବୋଧିତ କରିଥିଲେ । ଏହି ଅବସରରେ ରାଷ୍ଟ୍ର ମନ୍ତ୍ରୀ ଶ୍ରୀମତୀ ନିମୁକେନ୍ ଜୟନ୍ତୀଭାଇ ବମ୍ଭନିଆ, ସାଂସଦ ଧବଳ ପଟେଲ ଓ ସନ୍ଧ୍ୟା ରାୟ ଉପସ୍ଥିତ ଥିଲେ । ପର୍ତ୍ତୁଗାଲର ସମସ୍ତ ପ୍ରାନ୍ତରୁ ଏହି ଅବସରରେ ଲିସବନ୍ ଗସ୍ତ କରିଥିବା ଭାରତୀୟ ସମ୍ପ୍ରଦାୟର ସଦସ୍ୟମାନଙ୍କ ଉତ୍ସାହଜନକ ସମାବେଶକୁ ସମ୍ବୋଧିତ କରି ରାଷ୍ଟ୍ରପତି କହିଥିଲେ ଯେ ଭାରତର ଅନେକ ଅଂଶ ଏବଂ ବିଭିନ୍ନ ସମ୍ପ୍ରଦାୟର ପ୍ରତିନିଧିତ୍ୱ କରି ସେମାନେ କେବଳ ଭାରତର ବିବିଧତାକୁ ପ୍ରତିଫଳିତ କରନ୍ତି ନାହିଁ ବରଂ ଆମ ଦେଶକୁ ବାନ୍ଧି ରଖିଥିବା ମିଳିତ ମୂଲ୍ୟବୋଧ – ଗଣତନ୍ତ୍ର, ତଥା ଭାଇଚାରାର ଭାବନାକୁ ମଧ୍ୟ ପ୍ରତିନିଧିତ୍ୱ କରନ୍ତି । ରାଷ୍ଟ୍ରପତି କହିଥିଲେ ଯେ ପର୍ତ୍ତୁଗାଲ ପ୍ରତି ସେମାନଙ୍କର ଅବଦାନ ଏବଂ ଭାରତୀୟ ସଂସ୍କୃତିକୁ ପ୍ରୋତ୍ସାହିତ କରିବା ପାଇଁ ସେମାନଙ୍କର ପ୍ରୟାସ ସେମାନଙ୍କୁ ଆମ ଦେଶର ପ୍ରକୃତ ରାଷ୍ଟ୍ରଦୂତ କରିଥାଏ । ନିଜ କଠିନ ପରିଶ୍ରମ ବଳରେ ସେମାନେ ସଫଳତା ଓ ଉତ୍କର୍ଷତା ହାସଲ କରି ଭାରତକୁ ଗର୍ବିତ କରୁଛନ୍ତି ବୋଲି ସେ ଖୁସି ବ୍ୟକ୍ତ କରିଛନ୍ତି । ପ୍ରବାସୀ ଭାରତୀୟଙ୍କୁ ସ୍ୱାଗତ କରିବା ଏବଂ ସେମାନଙ୍କ ସୁରକ୍ଷା ଏବଂ କଲ୍ୟାଣ ସୁନିଶ୍ଚିତ କରିଥିବାରୁ ସେ ପର୍ତ୍ତୁଗାଲ ସରକାର ଏବଂ ଜନସାଧାରଣଙ୍କୁ ଧନ୍ୟବାଦ ଜଣାଇଛନ୍ତି । ରାଷ୍ଟ୍ରପତି କହିଥିଲେ ଯେ ଭାରତ ସରକାର ଏହାର ପ୍ରବାସୀମାନଙ୍କ ସହିତ ସମ୍ପର୍କକୁ ସୁଦୃଢ଼ କରିବା ଏବଂ ସେମାନଙ୍କ କଲ୍ୟାଣକୁ ସୁନିଶ୍ଚିତ କରିବା ପାଇଁ ପ୍ରତିଶ୍ରୁତିବଦ୍ଧ । ସଙ୍କଟ ସମୟରେ ପ୍ରବାସୀଙ୍କୁ ସାହାଯ୍ୟ କରିବା ପାଇଁ ସରକାର ଅନେକ ପଦକ୍ଷେପ ନେଇଛନ୍ତି । ସେ ପ୍ରବାସୀ ଭାରତୀୟଙ୍କୁ କହିଥିଲେ ଯେ ବିଦେଶରେ ଥିବା ଭାରତୀୟ ଦୂତାବାସ ପ୍ରତ୍ୟେକ ଭାରତୀୟଙ୍କୁ ସାହାଯ୍ୟ କରିବାକୁ ପ୍ରସ୍ତୁତ, କାରଣ ସେମାନେ ଯେଉଁଠି ବି ଥାଆନ୍ତୁ, ସେମାନଙ୍କ ମାତୃଭୂମି ସର୍ବଦା ସେମାନଙ୍କ ସହିତ ରହିଥାଏ ।
ସ୍ୱାଗତ ସମାରୋହ ପରେ ରାଷ୍ଟ୍ରପତି ସ୍ଲୋଭାକ୍ ରିପବ୍ଲିକ୍ ଅଭିମୁଖେ ଯାତ୍ରା କରିଥିଲେ ।