ବଲାଙ୍ଗିର, (କେପିଏନ୍ଏସ୍) : କଥାରେ ଅଛି ରଖେ ହରି ତ’ ମାରେ କିଏ । ସାଙ୍ଗମାନଙ୍କ ସହ ଖେଳୁ ଖେଳୁ କୂଅରେ ଭିତରେ ଗଳି ପଡିଥିଲା ଶିଶୁକନ୍ୟା । ଅଧଘଣ୍ଟା ଭିତରେ ତାକୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ବଲାଙ୍ଗିର ଜିଲ୍ଲା ପୁଇଁତଲା ଥାନା ଅନ୍ତର୍ଗତ ରଣ୍ଡା ପଂଚାୟତର ପଦମପୁର ଗାଁରେ ଘଟିଛି ଏଭଳି ଏକ ଅଭାବନୀୟ ଘଟଣା । ଅସାବଧାନତା ଯୋଗୁଁ ପଦମ୍ପୁର ଗାଁର ଜିତୁ ବିଶ୍ଵାଳଙ୍କ ଝିଅ ଅଦ୍ୟାଶା ଖୋଲା କୂଅ ଭିତରେ ଖସି ପଡ଼ିଥିଲା । ସ୍ଥାନୀୟ ଲୋକେ ଏହା ଜାଣିବା ପରେ ତୁରନ୍ତ ପୁଇଁତଲା ପୋଲିସକୁ ଖବର ଦେଇଥିଲେ । ପୁଇଁତଲା ପୋଲିସଠାରୁ ଖବର ପାଇ ବଲାଙ୍ଗିର ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଥିଲା । ତା’ପରେ ଆରମ୍ଭ ହୋଇଥିଲା ଶିଶୁକନ୍ୟାର ଉଦ୍ଧାର ଅଭିଯାନ । ପ୍ରାୟ ଅଧଘଣ୍ଟା ଉଦ୍ୟମ ପରେ ଗୁରୁତର ଅବସ୍ଥାରେ ଶିଶୁକନ୍ୟାକୁ ଉଦ୍ଧାର କରାଯାଇଥିଲା । ଉଦ୍ଧାର ପରେ ଅଗ୍ନିଶମ ବାହିନୀ କର୍ମଚାରୀମାନେ ଶିଶୁ କନ୍ୟାକୁ ବଲାଙ୍ଗିର ଭୀମଭୋଇ ମେଡ଼ିକାଲ କଲେଜରେ ଭର୍ତି କରିଥିଲେ । ଚିକିତ୍ସା ପରେ ଶିଶୁ କନ୍ୟାଟିର ସ୍ୱାସ୍ଥ୍ୟାବସ୍ଥା ସ୍ଥିର ଥିବା ଡାକ୍ତର କହିଥିଲେ । ଶିଶୁକୁ ସୁରକ୍ଷିତ ପାଇ ବେଶ୍ ଖୁସି ପ୍ରକାଶ କରିଛନ୍ତି ପରିବାର ଲୋକେ ।