- ‘ନବୀନ’ର ପ୍ରତିଷ୍ଠାତା ମହୁରୀ ରାଜା କୃପାସିନ୍ଧୁ ନରେନ୍ଦ୍ର ଦେବ ସ୍ମୃତି ସମ୍ମାନ ପ୍ରଦାନ ଉତ୍ସବ
ବ୍ରହ୍ମପୁର, (କେପିଏନ୍ଏସ୍) : ଓଡ଼ିଶାର ସର୍ବପୁରାତନ ସମ୍ବାଦପତ୍ର ‘ନବୀନ’ ଓଡ଼ିଆ ଅସ୍ମିତାର ବାର୍ତ୍ତାବହ ବୋଲି ପୂର୍ବତନ ସାଂସଦ ତଥା ଓଡ଼ିଶାର ବିଶିଷ୍ଟ କବି ଡ. ପ୍ରସନ୍ନ ପାଟ୍ଟଶାଣୀ ନବୀନ ପକ୍ଷରୁ ଆୟୋଜିତ କୃପାସିନ୍ଧୁ ନରେନ୍ଦ୍ର ଦେବ ସ୍ମୃତି ସମ୍ମାନ ପ୍ରଦାନ ଉତ୍ସବରେ ମୁଖ୍ୟଅତିଥି ଭାବେ ଯୋଗଦେଇ ଉପରୋକ୍ତ ମନ୍ତବ୍ୟ ଦେଇଛନ୍ତି । ଡ. ପାଟ୍ଟଶାଣୀ କହିଥିଲେ ଯେ, ନବୀନ ଓ ଗଞ୍ଜାମ ଜିଲ୍ଲା ସହ ସମ୍ପର୍କ ଅର୍ଦ୍ଧଶତାବ୍ଦୀର । ଏହି ଜିଲା ସ୍ୱାଧୀନତା ସଂଗ୍ରାମ, ସମ୍ବାଦପତ୍ର ପ୍ରକାଶନ, ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ଇତ୍ୟାଦିର ନେତୃତ୍ୱ ନେଇ ସମଗ୍ର ଓଡ଼ିଶାରେ ନବଜାଗରଣ ସୃଷ୍ଟି କରିବାରେ ପ୍ରମୁଖ ଭୂମିକା ଗ୍ରହଣ କରିଆସିଛି । ଏହି ଜିଲ୍ଲାରୁ ୩ଜଣ ମୁଖ୍ୟମନ୍ତ୍ରୀ ଓଡ଼ିଶାର ଶାସନ ଭାର ସମ୍ଭାଳିଛନ୍ତି । ସାହିତ୍ୟ, ସଂସ୍କୃତି, ନୃତ୍ୟ କଳା ଇତ୍ୟାଦି ବିଭିନ୍ନ କ୍ଷେତ୍ରରେ ଗଞ୍ଜାମ ଜିଲ୍ଲା ସମଗ୍ର ରାଜ୍ୟରେ ଶୀର୍ଷ ସ୍ଥାନରେ ରହିଛି । ସେ ଆହୁରି କହିଥିଲେ ଯେ, ନବୀନ ପ୍ରକାଶନ ଆରମ୍ଭରୁ ହିଁ ଓଡ଼ିଆ ସାରସ୍ୱତ ସାଧକ ମାନଙ୍କର ସାରଥୀ ଭାବେ କାର୍ଯ୍ୟ କରିଆସିଥିବା ବେଳେ ଆଜି ମଧ୍ୟ ସେହି ଧାରାକୁ ବଜାୟ ରଖିଛି । ସ୍ଥାନୀୟ କ୍ଷୁଦ୍ର ଜଳସେଚନ ବିଭାଗ ସମ୍ମିଳନୀ କକ୍ଷରେ ସାପ୍ତାହିକ ‘ନବୀନ’ର ୯୫ତମ ପ୍ରତିଷ୍ଠା ଦିବସ ପାଳନ ଓ କୃପାସିନ୍ଧୁ ନରେନ୍ଦ୍ର ଦେବ ସ୍ମୃତି ସମ୍ମାନ ପ୍ରଦାନ ଉତ୍ସବ ପାଳନ ଅବସରରେ ନବୀନର ସମ୍ପାଦକ ରବି ରଥଙ୍କ ଅଧ୍ୟକ୍ଷତାରେ ଅନୁଷ୍ଠିତ କାର୍ଯ୍ୟକ୍ରମରେ ମୁଖ୍ୟବକ୍ତା ଭାବେ ଭାଗବତ ଭାସ୍କର ତଥା ପ୍ରବଚକ ପଣ୍ଡିତ ଜଗନ୍ନାଥ ପଣ୍ଡା ଯୋଗଦେଇ ନବୀନର ଉତ୍ତୋରତ୍ତର ଶ୍ରୀବୃଦ୍ଧି କାମନା କରିବା ସହ ‘ନବୀନ’ର ଶତାୟୁ ହେଉ ବୋଲି ଆଶୀର୍ବଚନ ଦେଇଥିଲେ । ଏହି ଅବସରରେ ମୁଖ୍ୟଅତିଥିଙ୍କ ଦ୍ୱାରା ଭାରତ ବର୍ଷର ବିଶିଷ୍ଟ ସମାଜସେବୀ ତଥା ଅଗ୍ରଣୀ ସ୍ୱେଚ୍ଛାସେବୀ ସଂଗଠନ ‘ପ୍ରେମ୍’ ର ସଭାପତି ଡ଼. ଜାକୋବ୍ ଥୁଣ୍ଡିଲ ଓ ବିଶିଷ୍ଟ ସମାଜସେବୀ ତଥା ଅଗସ୍ତିନୂଆଗାଁ ସ୍ଥିତ ଚିଦାନନ୍ଦ ଦିବ୍ୟଧାମର ପ୍ରତିଷ୍ଠାତା ସଭାପତି ବିପ୍ର ଚରଣ ପାତ୍ରଙ୍କୁ ମାନପତ୍ର, ଉତ୍ତରୀୟ ଓ ପୁଷ୍ପଗୁଚ୍ଛ ପ୍ରଦାନ ପୂର୍ବକ କୃପାସିନ୍ଧୁ ନରେନ୍ଦ୍ର ଦେବ ସମ୍ମାନରେ ସମ୍ମାନିତ କରାଯାଇଥିଲା । ଡ. ଥୁଣ୍ଡିଲ ଓ ଶ୍ରୀ ପାତ୍ର ସମ୍ବର୍ଦ୍ଧନାର ଉତ୍ତରରେ ନବୀନର ଏଭଳି ଉଚ୍ଛ୍ୱସିତ ସମ୍ବର୍ଦ୍ଧନା ପାଇ ଆନନ୍ଦ ପ୍ରକାଶ କରିବା ସହ ଅନୁଷ୍ଠାନ ପ୍ରତି କୃତଜ୍ଞତା ଜଣାଇଥିଲେ । ଏହି ଅବସରରେ ପ୍ରତିଷ୍ଠାନର କାର୍ଯ୍ୟକାରୀ ସଭାପତି ତଥା ବର୍ଷିୟାନ କବି କୃଷ୍ଣଚନ୍ଦ୍ର ତ୍ରିିପାଠୀଙ୍କ ସଭାପତିତ୍ୱରେ ଆୟୋଜିତ କବିତା ପାଠୋତ୍ସବରେ ଅତିଥି ଭାବେ ସୁମନା ଶ୍ୱେତପଦ୍ମା ସମ୍ପାଦକ ବିଜୟ ଚନ୍ଦ୍ର ମିଶ୍ର, ଡ. ଡ଼ମ୍ବରୁଧର ସାହୁ ଯୋଗ ଦେଇଥିବା ବେଳେ ପଦ୍ମିନୀ ମିଶ୍ର କବିତା ସଂଯୋଜନା କରିଥିଲେ । ଏଥିରେ ଓଡ଼ିଶାର ବିଭିନ୍ନ ସ୍ଥାନରୁ ଶତାଧିକ କବି କବୟିତ୍ରୀ ଅଂଶଗ୍ରହଣ କରି ସ୍ୱରଚିତ କବିତା ପାଠ କରିଥିଲେ । କାର୍ଯ୍ୟକ୍ରମ ପରିଚାଳନାରେ ଅନୁଷ୍ଠାନର ସମ୍ପାଦକ ସୁଶାନ୍ତ କର, ନବୀନର ପ୍ରକାଶିକା ମଞ୍ଜୁ ରଥ, ଅଞ୍ଜଳି ଦାଶ, ସସ୍ମିତା ମିଶ୍ର, ପବିତ୍ର କୁମାର ଚୌଧୁରୀ, ଇଂ. ମାନସ ରଞ୍ଜନ ତ୍ରିପାଠୀ, ସାମ୍ବାଦିକ ଅରୁଣ କୁମାର ପଣ୍ଡା, ଶିକ୍ଷାବିତ୍ କାମରାଜୁ ମହାରଣା ସହଯୋଗ କରିଥିବା ବେଳେ ଶେଷରେ ସାମ୍ବାଦିକ ରଞ୍ଜନ କୁମାର ସାହୁ ଧନ୍ୟବାଦ ଅର୍ପଣ କରିଥିଲେ ।
