- ଆମ ଦେଶର ଅର୍ଥନୈତିକ ଅଭିବୃଦ୍ଧିରେ ଏମଏସଏମଇ କ୍ଷେତ୍ର ଏକ ପରିବର୍ତ୍ତନକାରୀ ଭୂମିକା ଗ୍ରହଣ କରିଥାଏ ଏବଂ ଆମେ ଏହି କ୍ଷେତ୍ରର ବିକାଶ ଏବଂ ସୁଦୃଢ଼ୀକରଣ ପାଇଁ ପ୍ରତିଶ୍ରୁତିବଦ୍ଧ : ପ୍ରଧାନମନ୍ତ୍ରୀ
- ବିଗତ ୧୦ ବର୍ଷ ମଧ୍ୟରେ ଭାରତ ସଂସ୍କାର, ଆର୍ଥିକ ଶୃଙ୍ଖଳା, ସ୍ୱଚ୍ଛତା ଏବଂ ସାମଗ୍ରିକ ବିକାଶ ପାଇଁ ସ୍ଥାୟୀ ପ୍ରତିବଦ୍ଧତା ଦେଖାଇଛି : ଶ୍ରୀ ମୋଦୀ
ସଂସ୍କାରକ୍ଷେତ୍ରରେ ନିରନ୍ତରତା ଏବଂ ନିଶ୍ଚିତତା ହେଉଛି ଏକ ପରିବର୍ତ୍ତନ ଯାହା ଆମ ଶିଳ୍ପ ପାଇଁ ନୂତନ ଆତ୍ମବିଶ୍ୱାସ ଆଣିଛି : ପ୍ରଧାନମନ୍ତ୍ରୀ
ଆଜି ବିଶ୍ୱର ପ୍ରତ୍ୟେକ ଦେଶ ଭାରତ ସହ ନିଜର ଅର୍ଥନୈତିକ ଭାଗିଦାରୀକୁ ସୁଦୃଢ଼ କରିବାକୁ ଚାହୁଁଛନ୍ତି : ପ୍ରଧାନମନ୍ତ୍ରୀ - ଆମର ଉତ୍ପାଦନ କ୍ଷେତ୍ର ଏହି ଭାଗିଦାରୀର ଅଧିକରୁ ଅଧିକ ଲାଭ ଉଠାଇବା ପାଇଁ ପଦକ୍ଷେପ ନେବା ଉଚିତ : ଶ୍ରୀ ମୋଦୀ
- ଆମେ ଆତ୍ମନିର୍ଭର ଭାରତର ଲକ୍ଷ୍ୟକୁ ଆଗେଇ ନେଇଛୁ ଏବଂ ସଂସ୍କାରର ଗତିକୁ ତ୍ୱରାନ୍ୱିତ କରିଛୁ : ପ୍ରଧାନମନ୍ତ୍ରୀ
- ଆମର ପ୍ରୟାସ ଅର୍ଥନୀତି ଉପରେ କୋଭିଡ ମହାମାରୀର ପ୍ରଭାବକୁ ହ୍ରାସ କରିଛି, ଭାରତକୁ ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତିରେ ପରିଣତ କରିବାରେ ସାହାଯ୍ୟ କରିଛି : ପ୍ରଧାନମନ୍ତ୍ରୀ
- ଭାରତର ଉତ୍ପାଦନ ଯାତ୍ରାରେ ଗବେଷଣା ଓ ବିକାଶ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି ଏବଂ ଏହାକୁ ଆଗକୁ ବଢ଼ାଇବା ଏବଂ ତ୍ୱରାନ୍ୱିତ କରିବାର ଆବଶ୍ୟକତା ରହିଛି : ପ୍ରଧାନମନ୍ତ୍ରୀ
- ଗବେଷଣା ଓ ବିକାଶ ମାଧ୍ୟମରେ ଆମେ ଅଭିନବ ଉତ୍ପାଦ ଉପରେ ଧ୍ୟାନ ଦେବା ସହ ଉତ୍ପାଦରେ ମୂଲ୍ୟ ସଂଯୁକ୍ତ କରିପାରିବା : ପ୍ରଧାନମନ୍ତ୍ରୀ
ଏମ୍ଏସ୍ଏମ୍ଇ କ୍ଷେତ୍ର ଭାରତର ଉତ୍ପାଦନ ଓ ଶିଳ୍ପ ବିକାଶର ମେରୁଦଣ୍ଡ : ପ୍ରଧାନମନ୍ତ୍ରୀ
ନୂଆଦିଲ୍ଲୀ, (ପିଆଇବି) : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭିଡିଓ କନଫରେନ୍ସିଂ ଜରିଆରେ ବଜେଟ୍ ପରବର୍ତ୍ତୀ ୱେବିନାରକୁ ସମ୍ବୋଧିତ କରିଥିଲେ । ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏମ୍ଏସ୍ଏମ୍ଇ) କ୍ଷେତ୍ରର ଅଭିବୃଦ୍ଧି, ଉତ୍ପାଦନ, ରପ୍ତାନି ଏବଂ ଆଣବିକ ଶକ୍ତି ମିଶନ, ନିୟନ୍ତ୍ରଣ, ନିବେଶ ଏବଂ ବ୍ୟବସାୟ କରିବାରେ ସହଜତା ଆଦି ବିଷୟ ଉପରେ ଏହି ୱେବିନାର ଆୟୋଜନ କରାଯାଇଥିଲା । ଏହି ଅବସରରେ ଉପସ୍ଥିତ ଲୋକଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ଉତ୍ପାଦନ ଏବଂ ରପ୍ତାନି ଉପରେ ଆୟୋଜିତ ଏହି ବଜେଟ୍ ପରବର୍ତ୍ତୀ ୱେବିନାର୍ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଏହି ବଜେଟକୁ ସରକାରଙ୍କ ତୃତୀୟ କାର୍ଯ୍ୟକାଳର ପ୍ରଥମ ପୂର୍ଣ୍ଣାଙ୍ଗ ବଜେଟ୍ ବୋଲି ଉଲ୍ଲେଖ କରି ସେ ଗୁରୁତ୍ୱାରୋପ କରିଥିଲେ ଯେ ଏହି ବଜେଟର ସବୁଠାରୁ ଉଲ୍ଲେଖନୀୟ ଦିଗ ହେଉଛି ଏହାର ଆଶାନୁରୂପ ଫଳାଫଳ । ବିଭିନ୍ନ କ୍ଷେତ୍ରରେ ବିଶେଷଜ୍ଞଙ୍କ ଆଶାଠାରୁ ଅଧିକ ପଦକ୍ଷେପ ସରକାର ନେଇଛନ୍ତି ବୋଲି ଶ୍ରୀ ମୋଦୀ ଉଲ୍ଲେଖ କରିଥିଲେ । ଚଳିତ ବଜେଟରେ ଉତ୍ପାଦନ ଏବଂ ରପ୍ତାନି ସମ୍ପର୍କରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି ବୋଲି ସେ ଉଲ୍ଲେଖ କରିଛନ୍ତି । ପ୍ରଧାନମନ୍ତ୍ରୀ କହିଥିଲେ ଯେ ଦେଶରେ ଏକ ଦଶନ୍ଧିରୁ ଅଧିକ ସମୟ ଧରି ସ୍ଥିର ସରକାରୀ ନୀତି ଦେଖିବାକୁ ମିଳିଛି ଏବଂ ଗତ ୧୦ ବର୍ଷ ମଧ୍ୟରେ ଦେଶ ସଂସ୍କାର, ଆର୍ଥିକ ଶୃଙ୍ଖଳା, ସ୍ୱଚ୍ଛତା ଏବଂ ଅନ୍ତର୍ଭୁକ୍ତ ବିକାଶ ପାଇଁ ପ୍ରତିଶ୍ରୁତିବଦ୍ଧତା ପ୍ରଦର୍ଶନ କରିଛି । ନିରନ୍ତରତା ଏବଂ ସଂସ୍କାରର ନିଶ୍ଚିତତା ଶିଳ୍ପରେ ନୂତନ ଆତ୍ମବିଶ୍ୱାସ ସୃଷ୍ଟି କରିଛି ବୋଲି ସେ ଉଲ୍ଲେଖ କରିଥିଲେ । ଆଗାମୀ ବର୍ଷଗୁଡ଼ିକରେ ଏହି ନିରନ୍ତରତା ବଜାୟ ରହିବ ବୋଲି ସେ ଉତ୍ପାଦନ ଏବଂ ରପ୍ତାନି ସହ ଜଡ଼ିତ ପ୍ରତ୍ୟେକ ଅଂଶୀଦାରଙ୍କୁ ଆଶ୍ୱାସନା ଦେଇଥିଲେ । ଅଂଶୀଦାରମାନଙ୍କୁ ସାହସିକ ପଦକ୍ଷେପ ନେବାକୁ ଉତ୍ସାହିତ କରିବା ସହ ଦେଶ ପାଇଁ ଉତ୍ପାଦନ ଏବଂ ରପ୍ତାନି ପାଇଁ ନୂତନ ବାଟ ଖୋଲିବାକୁ ଉତ୍ସାହିତ କରି ଶ୍ରୀ ମୋଦୀ ଆଲୋକପାତ କରିଥିଲେ ଯେ ବିଶ୍ୱର ପ୍ରତ୍ୟେକ ଦେଶ ଭାରତ ସହିତ ଅର୍ଥନୈତିକ ଭାଗିଦାରୀକୁ ସୁଦୃଢ଼ କରିବାକୁ ଚାହୁଁଛନ୍ତି । ଏହି ଭାଗିଦାରୀରୁ ଉତ୍ପାଦନ କ୍ଷେତ୍ର ସମ୍ପୂର୍ଣ୍ଣ ଭାବେ ଉପକୃତ ହେବା ପାଇଁ ସେ ଅନୁରୋଧ କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ଯେକୌଣସି ଦେଶର ବିକାଶ ପାଇଁ ସ୍ଥିର ନୀତି ଏବଂ ଉତ୍ତମ ବ୍ୟବସାୟିକ ବାତାବରଣ ଅତ୍ୟନ୍ତ ଜରୁରୀ । ସେ ଉଲ୍ଲେଖ କରିଥିଲେ ଯେ କିଛି ବର୍ଷ ପୂର୍ବେ ସରକାର ପବ୍ଲିକ୍ ଟ୍ରଷ୍ଟ ଆକ୍ଟ ପ୍ରଣୟନ କରିଥିଲେ ଏବଂ ଅନୁପାଳନକୁ ହ୍ରାସ କରିବାକୁ ପ୍ରୟାସ କରିଥିଲେ । ଉଭୟ କେନ୍ଦ୍ର ଓ ରାଜ୍ୟ ସ୍ତରରେ ୪୦,୦୦୦ରୁ ଅଧିକ ଅନୁପାଳନକୁ ହଟାଇ ଦିଆଯାଇଛି, ଯାହା ଫଳରେ ବ୍ୟବସାୟ କରିବା ସହଜ ହୋଇଛି । ଏହି ପ୍ରକ୍ରିୟାଜାରି ରଖିବା ଉପରେ ଗୁରୁତ୍ୱାରୋପ କରି ଶ୍ରୀ ମୋଦୀ ଉଲ୍ଲେଖ କରିଛନ୍ତି ଯେ ସରକାର ଆୟକର ପାଇଁ ସରଳ ବ୍ୟବସ୍ଥା ପ୍ରଣୟନ କରିଛନ୍ତି ଏବଂ ପବ୍ଲିକ ଟ୍ରଷ୍ଟ ୨.୦ ବିଲ୍ ଉପରେ କାମ ଚାଲିଛି । ଅଣ-ଆର୍ଥିକ କ୍ଷେତ୍ରରେ ନିୟମାବଳୀକୁ ଆଧୁନିକ, ନମନୀୟ, ଲୋକାଭିମୁଖୀ ଏବଂ ବିଶ୍ୱାସ ଭିତ୍ତିକ କରିବା ଉଦ୍ଦେଶ୍ୟରେ ଏହାର ସମୀକ୍ଷା ପାଇଁ ଏକ କମିଟି ଗଠନ କରାଯାଇଛି । ଏହି ପ୍ରକ୍ରିୟାରେ ଶିଳ୍ପର ଗୁରୁତ୍ୱପୂର୍ଣ୍ଣ ଭୂମିକା ଉପରେ ସେ ଆଲୋକପାତ କରିଥିଲେ । ସେ ଅଂଶୀଦାରମାନଙ୍କୁ ସେହି ସମସ୍ୟାଗୁଡ଼ିକୁ ଚିହ୍ନଟ କରିବାକୁ ଉତ୍ସାହିତ କରିଥିଲେ ଯାହାର ସମାଧାନ ପାଇଁ ଅଧିକ ସମୟ ଲାଗିଥାଏ ଏବଂ ପ୍ରଧାନମନ୍ତ୍ରୀ ଅଂଶୀଦାରମାନଙ୍କୁ ପ୍ରକ୍ରିୟାକୁ ସରଳ କରିବାର ଉପାୟ ପରାମର୍ଶ ଦେଇଥିଲେ ଏବଂ ପ୍ରଯୁକ୍ତିବିଦ୍ୟାର ଉପଯୁକ୍ତ ବ୍ୟବହାର ମାଧ୍ୟମରେ ଶୀଘ୍ର ଏବଂ ଉତ୍ତମ ଫଳାଫଳ ହାସଲ କରିବା ପାଇଁ ସେମାନଙ୍କୁ ମାର୍ଗଦର୍ଶନ କରିଥିଲେ । ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ବିଶ୍ୱ ବର୍ତ୍ତମାନ ରାଜନୈତିକ ଅନିଶ୍ଚିତତାର ସମ୍ମୁଖୀନ ହେଉଛି ଏବଂ ସମଗ୍ର ବିଶ୍ୱ ଭାରତକୁ ବିକାଶର କେନ୍ଦ୍ର ଭାବରେ ଦେଖୁଛି । ସେ କହିଛନ୍ତି ଯେ କୋଭିଡ୍ ମହାମାରୀ ସମୟରେ ଯେତେବେଳେ ବିଶ୍ୱ ଅର୍ଥନୀତି ମନ୍ଥର ହୋଇଥିଲା, ସେତେବେଳେ ଭାରତ ବିଶ୍ୱ ଅଭିବୃଦ୍ଧିକୁ ତ୍ୱରାନ୍ୱିତ କରିଥିଲା । ଆତ୍ମନିର୍ଭର ଭାରତର ପରିକଳ୍ପନାକୁ ଆଗେଇ ନେବା ଏବଂ ସଂସ୍କାରକୁ ତ୍ୱରାନ୍ୱିତ କରିବା ଦ୍ୱାରା ଏହା ହାସଲ ହୋଇଛି ବୋଲି ସେ ଉଲ୍ଲେଖ କରିଥିଲେ । ଏହି ପ୍ରୟାସ ଅର୍ଥନୀତି ଉପରେ କୋଭିଡ୍ର ପ୍ରଭାବକୁ ହ୍ରାସ କରିବା ସହ ଭାରତକୁ ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତିରେ ପରିଣତ କରିବାରେ ସହାୟକ ହୋଇଛି ବୋଲି ସେ ଗୁରୁତ୍ୱାରୋପ କରିଥିଲେ । ଭାରତ ବିଶ୍ୱ ଅର୍ଥନୀତିପାଇଁ ଅଭିବୃଦ୍ଧିର ଇଞ୍ଜିନ୍ ହୋଇ ରହିଛି ଏବଂ ଆହ୍ୱାନପୂର୍ଣ୍ଣ ପରିସ୍ଥିତିରେ ନିଜର ସ୍ଥିରତା ପ୍ରମାଣିତ କରିଛି ବୋଲି ସେ କହିଛନ୍ତି । ସେ ଉଲ୍ଲେଖ କରିଛନ୍ତି ଯେ ଯୋଗାଣ ଶୃଙ୍ଖଳାରେ ବାଧା ବିଶ୍ଵ ଅର୍ଥନୀତିକୁ ପ୍ରଭାବିତ କରିଥାଏ ଏବଂ ବିଶ୍ୱକୁ ବିଶ୍ୱସନୀୟ ଅଂଶୀଦାରଙ୍କ ଆବଶ୍ୟକତା ରହିଛି ଯିଏ ଉଚ୍ଚ ଗୁଣବତ୍ତା ଉତ୍ପାଦ ଉତ୍ପାଦନ କରିପାରିବ ଏବଂ ଭରସାଯୋଗ୍ୟ ଯୋଗାଣ ସୁନିଶ୍ଚିତ କରିପାରିବ । ଏହି ଆବଶ୍ୟକତାକୁ ପୂରଣ କରିବା ପାଇଁ ଭାରତ ସକ୍ଷମ ଏବଂ ଏହା ଦେଶ ପାଇଁ ଏକ ଗୁରୁତ୍ୱପୂର୍ଣ୍ଣ ସୁଯୋଗ ପ୍ରଦାନ କରୁଛି ବୋଲି ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ । କେବଳ ଦର୍ଶକ ନ ହୋଇ ସକ୍ରିୟ ଭାବରେ ସେମାନଙ୍କ ଭୂମିକା ଖୋଜିବା ଏବଂ ସୁଯୋଗର ଫାଇଦା ଉଠାଇବାକୁ ସେ ଶିଳ୍ପକୁ ଅନୁରୋଧ କରିଛନ୍ତି । ସେ କହିଛନ୍ତି ଯେ ଅତୀତ ତୁଳନାରେ ଆଜି ଏହା ସହଜ, କାରଣ ଦେଶରେ ଅନୁକୂଳ ନୀତି ରହିଛି ଏବଂ ସରକାର ଶିଳ୍ପ ସହିତ କାନ୍ଧରେ କାନ୍ଧ ମିଳାଇ ଛିଡ଼ା ହୋଇଛନ୍ତି । ପ୍ରଧାନମନ୍ତ୍ରୀ ବିଶ୍ୱ ଯୋଗାଣ ଶୃଙ୍ଖଳାରେ ସୁଯୋଗ ଖୋଜିବାରେ ସଂକଳ୍ପ, ନିରପେକ୍ଷତା ଏବଂ ଆହ୍ୱାନକୁ ଗ୍ରହଣ କରିବାକୁ ଆହ୍ୱାନ ଦେଇଥିଲେ । ପ୍ରତ୍ୟେକ ଶିଳ୍ପ ମିଳିତ ଭାବେ ଗୋଟିଏ ପାଦ ଆଗକୁ ବଢ଼ିଲେ ସେମାନେ ଉଲ୍ଲେଖନୀୟ ଅଗ୍ରଗତି କରିପାରିବେ ବୋଲି ସେ ଗୁରୁତ୍ୱାରୋପ କରିଥିଲେ । ବର୍ତ୍ତମାନ ଉତ୍ପାଦନ ସଂଯୁକ୍ତ ପ୍ରୋତ୍ସାହନ (ପିଏଲଆଇ) ଯୋଜନାରେ ୧୪ଟି କ୍ଷେତ୍ର ଉପକୃତ ହେଉଛନ୍ତି ବୋଲି ପ୍ରଧାନମନ୍ତ୍ରୀ ଆଲୋକପାତ କରିଥିଲେ । ଏହି ଯୋଜନା ଅଧୀନରେ ୭୫୦ରୁ ଅଧିକ ୟୁନିଟ୍ ଅନୁମୋଦନ କରାଯାଇଛି, ଯାହାଫଳରେ ଦେଢ଼ ଲକ୍ଷ କୋଟି ଟଙ୍କାରୁ ଅଧିକ ପୁଞ୍ଜିନିବେଶ, ୧୩ ଲକ୍ଷ କୋଟିରୁ ଅଧିକ ଉତ୍ପାଦନ ଏବଂ ୫ ଲକ୍ଷ କୋଟିରୁ ଅଧିକ ରପ୍ତାନି ହୋଇଛି । ସୁଯୋଗ ମିଳିଲେ ଉଦ୍ୟୋଗୀମାନେ କିପରି ନୂତନ କ୍ଷେତ୍ରରେ ଅଗ୍ରସର ହୋଇପାରିବେ ତାହା ଏହା ଦର୍ଶାଉଛି ବୋଲି ସେ ଗୁରୁତ୍ୱାରୋପ କରିଥିଲେ । ମାନୁଫାକ୍ଚରିଂ ଓ ରପ୍ତାନିକୁ ପ୍ରୋତ୍ସାହନ ଦେବା ପାଇଁ ଦୁଇଟି ମିଶନ ଆରମ୍ଭ କରାଯିବା ସଂପର୍କରେ ଶ୍ରୀ ମୋଦୀ ଘୋଷଣା କରିଥିଲେ । ଉନ୍ନତ ଜ୍ଞାନକୌଶଳ ଏବଂ ଗୁଣାତ୍ମକ ଉତ୍ପାଦ ଉପରେ ଗୁରୁତ୍ୱ ଦେବା ସହିତ ଖର୍ଚ୍ଚ ହ୍ରାସ କରିବା ପାଇଁ ଦକ୍ଷତାର ଗୁରୁତ୍ୱ ଉପରେ ସେ ଗୁରୁତ୍ୱାରୋପ କରିଥିଲେ । ସେ ସମସ୍ତ ଅଂଶୀଦାରମାନଙ୍କୁ ଭାରତରେ ଉତ୍ପାଦିତ ହୋଇପାରୁଥିବା ବିଶ୍ୱସ୍ତରୀୟ ଚାହିଦା ସହିତ ନୂତନ ଉତ୍ପାଦ ଚିହ୍ନଟ କରିବାକୁ ଅନୁରୋଧ କରିଥିଲେ ଏବଂ ରପ୍ତାନି ସମ୍ଭାବନା ଥିବା ଦେଶମାନଙ୍କ ନିକଟରେ ରଣନୀତିକ ଭାବରେ ପହଞ୍ଚିବା ପାଇଁ ସେମାନଙ୍କୁ ଉତ୍ସାହିତ କରିଥିଲେ । ଭାରତର ଉତ୍ପାଦନ ଯାତ୍ରାରେ ଗବେଷଣା ଏବଂ ବିକାଶ ଏକ ପ୍ରମୁଖ ଭୂମିକା ଗ୍ରହଣ କରିଛି ଏବଂ ଏହାକୁ ଆହୁରି ତ୍ୱରାନ୍ୱିତ ଏବଂ ପ୍ରୋତ୍ସାହିତ କରିବାର ଆବଶ୍ୟକତା ରହିଛି ବୋଲି ଶ୍ରୀ ମୋଦୀ କହିଥିଲେ । ଗବେଷଣା ଓ ବିକାଶ ମାଧ୍ୟମରେ ନୂତନ ଉତ୍ପାଦ ଏବଂ ବିଦ୍ୟମାନ ଉତ୍ପାଦଗୁଡ଼ିକର ମୂଲ୍ୟ ବୃଦ୍ଧି ଉପରେ ଧ୍ୟାନ ଦିଆଯାଇପାରିବ ବୋଲି ସେ ଉଲ୍ଲେଖ କରିଥିଲେ । ଭାରତର ଖେଳନା, ଜୋତା ଏବଂ ଚମଡ଼ା ଶିଳ୍ପର ସାମର୍ଥ୍ୟକୁ ବିଶ୍ୱ ସ୍ୱୀକାର କରୁଛି ଏବଂ ପାରମ୍ପରିକ ହସ୍ତଶିଳ୍ପକୁ ଆଧୁନିକ ଜ୍ଞାନକୌଶଳ ସହ ମିଶାଇ ଉଲ୍ଲେଖନୀୟ ସଫଳତା ହାସଲ କରାଯାଇପାରିବ ବୋଲି ସେ ଗୁରୁତ୍ୱାରୋପ କରିଥିଲେ । ସେ କହିଥିଲେ ଯେ ଭାରତ ଏହି କ୍ଷେତ୍ରରେ ବିଶ୍ୱର ନେତୃତ୍ୱ ନେଇପାରିବ ଯାହା ରପ୍ତାନିରେ ଯଥେଷ୍ଟ ବୃଦ୍ଧି ଆଣିବ । ଏହି ଅଭିବୃଦ୍ଧି ଶ୍ରମ ଭିତ୍ତିକ କ୍ଷେତ୍ରରେ ଲକ୍ଷ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି କରିବ ଏବଂ ଉଦ୍ୟୋଗକୁ ପ୍ରୋତ୍ସାହିତ କରିବ ବୋଲି ଶ୍ରୀ ମୋଦୀ ଆଲୋକପାତ କରିଥିଲେ । ପ୍ରଧାନମନ୍ତ୍ରୀ ବିଶ୍ୱକର୍ମା ଯୋଜନା ପାରମ୍ପରିକ କାରିଗରମାନଙ୍କୁ ସାମଗ୍ରିକ ସହାୟତା ପ୍ରଦାନ କରିଥାଏ ବୋଲି ଉଲ୍ଲ…