ଡେଲାଙ୍ଗ ଉଚ୍ଚମାଧ୍ୟମିକ ବିଦ୍ୟାଳୟ ପକ୍ଷରୁ ଯୁବ ଓଡିଶା, ନବୀନ ଓଡିଶା ଅନ୍ତର୍ଭୁକ୍ତ ବିଭିନ୍ନ ସାମାଜିକ କାର୍ଯ୍ୟକ୍ରମ
ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : ଓଡିଶା ସରକାରଙ୍କ ପ୍ରୟୋଜିତ ନୂଆ-ଓ ଯୁବ ଓଡିଶା, ନବୀନ ଓଡିଶା ସମନ୍ୱିତ ଯୁବ ବିକାଶ କାର୍ଯ୍ୟକ୍ରମ ମାଧ୍ୟମରେ ବିଭିନ୍ନ ସାମାଜିକ କାର୍ଯ୍ୟକ୍ରମ ଡେଲାଙ୍ଗ ଉଚ୍ଚମାଧ୍ୟମିକ ବିଦ୍ୟାଳୟ ପକ୍ଷରୁ ନିକଟବର୍ତ୍ତୀ ଗ୍ରାମଗୁଡିକରେ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମକୁ ବିଦ୍ୟାଳୟର ଅଧ୍ୟକ୍ଷ ଡଃ ଶରତ ଚନ୍ଦ୍ର ବିଶ୍ୱାଳ ଆନୁଷ୍ଠାନିକ ଭାବେ ଉଦ୍ଘାଟନ କରିଥିଲେ । ନୋଡାଲ ଅଫିସର ଅଧ୍ୟାପକ ଅତୁଲ କୁମାର ଦାଶଙ୍କ ତତ୍ୱାବଧାନରେ ଅଧ୍ୟାପକ ମନୋରଞ୍ଜନ ରଣସିଂହ, ସୁମନ୍ତ ତରେଇ, ଜିତେନ୍ଦ୍ର କୁମାର ମଲ୍ଲିକ ଏହାକୁ ସୂଚାରୁ ରୂପେ ପରିଚାଳନା କରିଥିଲେ । ଛାତ୍ରଛାତ୍ରୀମାନେ ବେନୁପଡା, ଗୋଲାସାହି, ଗୌରଦେଇପୁର, ରାମଚନ୍ଦ୍ରପୁର ଆଦି ଗ୍ରାମଗୁଡିକରେ ପ୍ଲାକାର୍ଡ ଧରି ଶୋଭାଯାତ୍ରାରେ ବିଭିନ୍ନ ସ୍ଲୋଗାନ ଓ ପଥପ୍ରାନ୍ତ ସଭା କରି ସମାଜକୁ ପଲିଥିନ ମୁକ୍ତ କରିବା, ଯୌତକ ପ୍ରଥା, ବାଲ୍ୟ ବିବାହ ପ୍ରଥା, ନାରୀ ନିର୍ଯ୍ୟାତନା ଓ ନିଶା ନିବାରଣ ସମ୍ପର୍କରେ ଜନସାଧାରଣଙ୍କୁ ସଚେତନ କରାଇଥିଲେ । ଏଥି ସହିତ ସ୍ଥାନୀୟ ସରପଞ୍ଚ ଦୀପକ କୁମାର ସାହୁ ଓ ଡେଲାଙ୍ଗ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଧିକାରୀ ଡଃ ସନ୍ତୋଷ ତ୍ରିପାଠୀଙ୍କ ସହଯୋଗରେ ମେଡିକାଲ ପରିସରରେ, ଡେଲାଙ୍ଗ ହାଟ ବଜାର, ମେଳଣ ପଡିଆ, ପଂଚାୟତ ଅଫିସ ପରିସର ସଫେଇ କରାଯାଇଥିଲା । ଛାତ୍ରଛାତ୍ରୀମାନେ ବିଦ୍ୟାଳୟ ପରିସରରେ ୧୦୦ଟି ବିଭିନ୍ନ ପ୍ରକାର ଚାରା ରୋପଣ କରିଥିଲେ । ଏହି କାର୍ଯ୍ୟକ୍ରମରେ ଅଧ୍ୟାପକ ସରୋଜ ବଳିୟାର ସିଂହ, ସୁକାନ୍ତ କୁମାର ପଣ୍ଡା, ସୁମନ୍ତ ତରେଇ, ରାକେଶ କୁମାର ସ୍ୱାଇଁ, ଅଧ୍ୟାପିକା ଡଃ ସ୍ନେହାଞ୍ଜଳୀ ମହାନ୍ତି, ସୌଭାଗିନୀ ପାଢ଼ୀ, ଗୀତାଞ୍ଜଳି ସାହୁ, ତନ୍ମୟୀ ମହାପାତ୍ର, ପ୍ରିୟଙ୍କା ଦଳେଇ, ବରିଷ୍ଠ କିରାଣୀ ଗଙ୍ଗାଧର ଜେନା, ସର୍ବେଶ୍ୱର ସ୍ୱାଇଁ ପ୍ରମୁଖ ଅଂଶଗ୍ରହଣ କରିଥିଲେ ।