ଉଲୁଣ୍ଡା, (କେପିଏନ୍ଏସ୍) : ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଥାନା ସରଧାଝୁଲି ଗାଁରେ ଘଟିଛି ଏକ ଅଘଟଣ । ଗାଈବନ୍ଧା ଶାବଳରେ ଭୁସି ହୋଇ ଜଣେ ମହିଳାଙ୍କ ମୃତ୍ୟ ଘଟିଛି । ସୂଚନା ଅନୁସାରେ ଗୀତାଞ୍ଜଳି ପ୍ରଧାନ(୪୨) ନାମ୍ନୀ ଜଣେ ମହିଳା ତାଙ୍କ ଗାଁ ନିକଟସ୍ଥ ଜମିରେ ଘାସ ଚରିବା ପାଇଁ ନିଜ ଗାଈକୁ ଏକ ଲମ୍ବା ଦଉଡିରେ ବାନ୍ଧି ଶାବଳକୁ ଖୁଣ୍ଟ ଭାବରେ ପୋତିଥିଲେ । କିଛି ସମୟ ପରେ ଗାଈଟି ଦଉଡିକୁ ଜୋରରେ ଟାଣିବାରୁ ତା’ ସହ ଶାବଳ ମଧ୍ୟ ଓପାଡି ହୋଇ ବାହାରି ଯାଇଥିଲା । ଏହାପରେ ଗାଈଟି ଗାଁ ଭିତରକୁ ଦୌଡିଥିଲା । ସେହି ସମୟରେ ଗୀତାଞ୍ଜଳି ବନ୍ଧରୁ ଗାଧୋଇ ଫେରୁଥିବା ବେଳେ ଗାଈକୁ ଦେଖିଥିଲେ । ତା’କୁ ଅଟକାଇବାକୁ ଚେଷ୍ଟା କରୁଥିବା ବେଳେ ଗାଈଟି ଏଣେତେଣେ ଧାଇଁଥିଲା । ଫଳରେ ଦୌଡି ବନ୍ଧା ହୋଇଥିବା ଶାବଳଟି ଗୀତାଞ୍ଜଳିଙ୍କ ପେଟରେ ଭୁସି ହୋଇଯାଇଥିଲା । ସେ ଗୁରୁତର ଆହତ ହୋଇ ପଡିଥିଲେ । ତାଙ୍କୁ ତୁରନ୍ତ ସୋନପୁର ଡାକ୍ତରଖାନାକୁ ନିଆଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।