ସୋର : ବାଲେଶ୍ୱର ଜିଲ୍ଲା ସିମୁଳିଆ ଅଞ୍ଚଳରେ ବଢ଼ୁଛି ଡକାୟତି ଓ ଲୁଟ୍ ଘଟଣା । ଘରେ ପଶି ଆକ୍ରମଣ କରି ନଗଦ ଟଙ୍କା ସହ ଲୁଟିନେଲେ ଲକ୍ଷାଧିକ ଟଙ୍କାର ସୁନା ଅଳଙ୍କାର । ସେହିଭଳି ମାର୍କୋଣା ବଜାରରେ ଏକ ମୋବାଇଲ ଦୋକାନରେ ଲୁଟ୍ ବେଳେ ତିନି ଲୁଟେରାଙ୍କୁ ମାଡି ବସିଥିଲା ପୋଲିସ । ସୂଚନାଯୋଗ୍ୟ ଯେ, ରବିବାର ବିଳମ୍ବିତ ରାତିରେ ବାଲେଶ୍ୱର ଜିଲ୍ଲା ସିମୁଳିଆ ଥାନା ଅନ୍ତର୍ଗତ ବାଟି ପଞ୍ଚାୟତ ବଣଗଡିଆ ଗ୍ରାମର ବ୍ୟବସାୟୀ ଆନନ୍ଦ ବେହେରାଙ୍କ ଘରୁ ଲୁଟ୍ ହୋଇଛି । ପ୍ରାୟ ୬ ଜଣ ଦୁର୍ବୃତ୍ତ ବାଇକ୍ରେ ଆସି ଘର ପଛ ପଟ ଛାତ ଉପରେ ଚଢି ଘର ଭିତରକୁ ପଶିଥିଲେ । ପରିବାର ଲୋକ ଶୋଇଥିବା ବେଳେ ଦୁର୍ବୃତ୍ତ ମାନେ ପ୍ରଥମେ ମୋବାଇଲ ଗୁଡିକ ଆଣି ଭାଙ୍ଗି ଦେଇଥିଲେ । ପରେ ଭୁଜାଲିରେ ପୁଅ ରତିକାନ୍ତଙ୍କ ହାତକୁ ହାଣି ଗୁରୁତର କରିଥିଲେ । ଏହାପରେ ଆଲମିରା ଭାଙ୍ଗି ୧୦ଲକ୍ଷରୁ ଉର୍ଦ୍ଧ ଟଙ୍କା ସମେତ ସୁନାରୁପା ଅଳଙ୍କାର ଲୁଟ୍ କରି ଫେରାର ହୋଇଯାଇଥିଲେ । ଆକ୍ରମଣରେ ରତିକାନ୍ତ ଗୁରୁତର ହୋଇଥିବା ବେଳେ ତାଙ୍କୁ ପ୍ରଥମେ ସିମୁଳିଆ ପରେ କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଛି ।