କଳାହାଣ୍ଡି, (ଶୁଭେନ୍ଦୁ କୁମାର ପଣ୍ଡା) : କଳାହାଣ୍ଡି ଜିଲ୍ଲା କର୍ଲାମୁଣ୍ଡା ବ୍ଳକର ଗଜବାହାଲ ଗ୍ରାମ ପଞ୍ଚାୟତର କଅଁସିଲ୍ ଗ୍ରାମର ନିର୍ମାଣଧୀନ ପାଣିଟାଙ୍କି ଉପରେ ଚଢି ଜଣେ ଯୁବକ ଆତ୍ମହତ୍ୟା ଉଦ୍ୟମ କରୁଥିବା ଚିତ୍ର ସାମ୍ନାକୁ ଆସିଛି । ଯୁବକ ଜଣକ ନବରଙ୍ଗପୁର ଜିଲ୍ଲାର କୁମାର ଗୁଡା ଗାଁର ମହେଶ ବୋଲି ସୂଚନା ମିଳିଛି । ମହେଶ ଉକ୍ତ ପାଣି ଟାଙ୍କି ନିର୍ମାଣ କାର୍ଯ୍ୟରେ ଶ୍ରମିକ ଭାବେ କାର୍ଯ୍ୟ କରୁଥିଲେ । ପାଣି ଟାଙ୍କି ଉପରେ ଚଢି ଯାଇ ଆଉ ତଳକୁ ଓହ୍ଲାଉ ନଥିଲେ । ସହକର୍ମୀ ଶ୍ରମିକ ଓ ଗ୍ରାମବାସୀମାନେ ସ୍ଥାନୀୟ ରିଷିଡା ପୋଲିସ ଓ ଅଗ୍ନିଶମ ବିଭାଗକୁ ଖବର ଦେଇଥିଲେ । ପୋଲିସ ଓ ଅଗ୍ନିଶମ କର୍ମଚାରୀମାନେ ପହଞ୍ଚି ଉଦ୍ଧାର କରିବାକୁ ଓ ତଳକୁ ଆଣିବାକୁ ପ୍ରୟାସ କରିଥଲେ ବି ବିଫଳ ହୋଇଥିଲେ । ଯୁବକ ଜଣକ ହାତରେ ଗୋଟେ ଛୋଟ ବାଡି ଧରିଥିବା ବେଳେ ପାଣି ଟାଙ୍କିରୁ ତଳକୁ ଆସୁ ନଥିଲେ । ଏଣୁ ଉଦ୍ଧାରକାରୀମାନଙ୍କୁ ନାକେଦମ୍ ହେବାକୁ ପଡିଥିଲା । ଦୀର୍ଘ ସମୟର ପ୍ରୟାସ ପରେ ଉକ୍ତ ଯୁବକଙ୍କୁ ଉଦ୍ଧାର କରାଯାଇଥିବା ସୂଚନା ମିଳିଛି ।