ଜଗତସିଂହପୁର : ଅଦିନିଆ ବର୍ଷା ପାଇଁ ଉଜୁଡ଼ି ଗଲା ବର୍ଷକର ପରିଶ୍ରମ । ଉଜୁଡ଼ା କ୍ଷେତ ଦେଖି ହତବାକ୍ ହୋଇଗଲେ ଯୁବ ଚାଷୀ । ଶେଷରେ ବେକରେ ରଶି ଲଗାଇ ଜୀବନ ହାରିଦେଲେ ଯୁବ ଚାଷୀ । ଏଭଳି ଘଟଣା ଘଟିଛି ଜଗତସିଂହପୁର ଜିଲ୍ଲା ବାଲିକୁଦା ଥାନା ଅସାରଣା ଗାଁରେ । ସୂଚନା ଅନୁଯାୟୀ ବାଲିକୁଦା ଥାନା ଅସାରଣା ଗାଁର ଉତ୍ତମ ସ୍ୱାଇଁଙ୍କ ଏକମାତ୍ର ପୁଅ କୃତିବାସ ସ୍ୱାଇଁ । ପୈତୃକ ଚାଷ ଜମି ସମେତ ଦୁଇ ଏକରରୁ ଅଧିକ ଜମିରେ ଭାଗ ଚାଷ କରି ନିଜ ପରିବାର ଚଳାନ୍ତି । ଘରେ ସ୍ତ୍ରୀ ଓ ବୃଦ୍ଧ ବାପା ମା ସହିତ ୨ଟି କୁନି କୁନି ଝିଅ ଅଛନ୍ତି । କୃତିବାସ ଚାଷ ପାଇଁ ବିଭିନ୍ନ ସଂସ୍ଥାରୁ ଟଙ୍କା ସୁଧକୁ ଆଣି ଚାଷ କାମରେ ଲଗାଇଥିଲେ । ଲଘୁଚାପ ଜନିତ ଲଗାଣ ବର୍ଷା ପୂର୍ବରୁ ସେ ଗୋଟିଏ ଏକର ଧାନ କାଟି ଦେଇଥିଲେ । ହେଲେ ବର୍ଷା ପରେ ଧାନ ବିଲରେ ପାଣି ଜମି ଫସଲ ନଷ୍ଟ ହେବା ସହିତ ଗଜା ହୋଇଯାଇଥିଲା । ଦୁଇଦିନ ତଳେ ବିଲକୁ ଯାଇ ଧାନର ଅବସ୍ଥା ଦେଖି ଏକ ପ୍ରକାର ମାନସିକ ଭାରସାମ୍ୟ ହରାଇ ଚିନ୍ତାରେ ରହିଥିଲେ । ଗତକାଲି ପୁଣି ସେ ବିଲକୁ ଯାଇ ଫେରିବା ପରେ ସନ୍ଧ୍ୟାରେ ଗାଈ କାମ କରିଥିଲେ । ସନ୍ଧ୍ୟାରେ ଘର ଲୋକେ ଦାଣ୍ଡ ପଟରେ ବସି ଚା ଜଳଖିଆ ଖାଉଥିବା ବେଳେ ସେ ନିଜ ଶୋଇବା ଘରକୁ ଯାଇଥିଲେ କିଛି ସମୟ ପରେ ସେ ନ ଫେରିବାରୁ ଘର ଲୋକେ ତାଙ୍କ ଶୋଇବା ଘର କବାଟ ବନ୍ଦ ଥିବା ଦେଖି କବାଟ ଭାଙ୍ଗିବାରୁ କୃତିବାସ ଫ୍ୟାନରେ ଝୁଲିଥିଲେ । ପରିବାର ଲୋକେ କୃତିବାସଙ୍କୁ ଉଦ୍ଧାର କରି ଜଗତସିଂହପୁର ମୁଖ୍ୟ ଚିକିତ୍ସାଳୟକୁ ଆଣିଥିଲେ ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । କୃତିବାସଙ୍କ ମୃତ୍ୟୁ ପରେ ପରିବାର ଲୋକେ ଭାଙ୍ଗି ପଡିଛନ୍ତି । ଘରର ଏକମାତ୍ର ରୋଜଗାରିଆ ପୁଅକୁ ହରାଇ ମାଁ ଭୂଇଁ ସାଉଁଟୁଛି । ସେପଟେ ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି ।