ଜହ୍ନାପଙ୍କ : ବାଉଁଶୁଣୀ ଥାନା ସାହାଜପାଲ ନିକଟରେ ଦୁର୍ଘଟଣା । ରାସ୍ତାକଡ଼ରେ ଠିଆ ହୋଇଥିବା ଟ୍ରକ୍କୁ ପଟିଲା ଆଉ ଏକ ଟ୍ରକ୍ । ଡ୍ରାଇଭର୍ ଓ ହେଲପର୍ ଗୁରୁତର । ଶନିବାର ଭୋର୍ ୫ଟାରେ ଏହି ଦୁର୍ଘଟଣା ଘଟିଛି । ଦୁର୍ଘଟଣା ଘଟାଇଥିବା ଟ୍ରକ୍ଟି ଫେରାର୍ ହୋଇଯାଇଛି । ସୂଚନାଅନୁଯାୟୀ, ଶନିବାର ଭୋର୍ ୫ଟା ବେଳେ ବୌଦ୍ଧ ପଟରୁ ଏକ ଛଡ ବୋଝେଇ ଟ୍ରକ ମନମୁଣ୍ଡା ଆଡକୁ ଯାଉଥିଲା । ବାଉଁଶୁଣୀ ଥାନା ସାହାଜପାଲ ନିକଟରେ ରାସ୍ତା କଡରେ ଠିଆ ହୋଇଥିବା ଏକ ଟ୍ରକ୍କୁ ପଛପଟୁ ଧକ୍କା ଦେଇଥିଲା । ଦୁର୍ଘଟଣା ଘଟାଇ ଟ୍ରକ୍ଟି ଘଟଣାସ୍ଥଳରୁ ଫେରାର୍ ହୋଇଯାଇଥିଲା । ଏହି ଦୁର୍ଘଟଣାରେ ଡ୍ରାଇଭର୍ ଓ ହେଲପର ଗୁରୁତର ଆହତ ହୋଇଥିଲେ । ଗୁରୁତର ଟ୍ରକ୍ ଡ୍ରାଇଭର ହରଭଙ୍ଗା ଥାନା ଭଗାମୁଣ୍ଡା ଗ୍ରାମର ଶ୍ରୀନିବାସ ପ୍ରଧାନ ଓ ହେଲପର ଦଶପଲ୍ଲାର ଭାପୁର ବ୍ଲକର ସଞ୍ଜୟ ବେହେରା ବୋଲି ସୂଚନା ମିଳିଛି । ହେଲପର ସଞ୍ଜୟଙ୍କ ଗୋଡ ଟ୍ରକ୍ କେବିନ ମଧ୍ୟରେ ଚାପି ରହିଥିବା ଯୋଗୁଁ ବୌଦ୍ଧ ଓ ବାଉଁଶୁଣୀ ଦମକଳ ବାହିନୀ କଟର ମେସିନ୍ ସାହାଯ୍ୟରେ ତାଙ୍କୁ ଉଦ୍ଧାର କରିଛନ୍ତି । ଉଭୟ ଗୁରୁତରଙ୍କୁ ବୌଦ୍ଧ ଡାକ୍ତରଖାନାରେ ଭର୍ତ୍ତି କରାଯାଇଛି । ବାଉଁଶୁଣୀ ପୋଲିସ ଏନେଇ ତଦନ୍ତ ଆରମ୍ଭ କରିଛି ।