ଖୋର୍ଦ୍ଧା : ଖୋର୍ଦ୍ଧା ଆଦର୍ଶ ଥାନା ଅଧୀନ ପୁବୁସାହିର ଏକ କବାଡିଆ ଗୋଦାମରେ କାମ କରୁଥିବା ଶ୍ରମିକ ବାସୁଦେବ ପ୍ରଧାନ ହତ୍ୟା ଘଟଣାରେ ପୋଲିସ ୩ ଜଣଙ୍କୁ ଗିରଫ କରିଛି । ମୁଖ୍ୟ ଅଭିଯୁକ୍ତ କବାଡିଆ ଗୋଦାମ ମାଲିକ ରବୀନ୍ଦ୍ର ମୁଦୁଲି ଏବଂ ତାର ଦୁଇ ସହଯୋଗୀ ବେଗୁନିଆ ଥାନା କୋଦବେରଣୀ ଗ୍ରାମର ମାନସ ମୁଦୁଲି, ଫତେଗଡ ଥାନା ଜଗନ୍ନାଥପୁର ଗ୍ରାମର ଡ୍ରାଇଭର ଛବି ସାହୁଙ୍କୁ ପୋଲିସ ଗିରଫ କରିଛି । ଏଥିସହ ପୋଲିସ ଏକ ବୋଲେରୋ ଗାଡି ଜବତ କରିଛି । ସୂଚନା ଅନୁସାରେ ଖୋର୍ଦ୍ଧା ଆଦର୍ଶ ଥାନା ଅନ୍ତର୍ଗତ ପୁବୁସାହିର ଏକ କବାଡିଆ ଗୋଦାମରେ ଶ୍ରମିକ ବାସୁଦେବ ପ୍ରଧାନ କାମ କରୁଥିଲେ । ତମ୍ବା ତାର ଚୋରି କରିବା ଅଭିଯୋଗରେ କବାଡିଆ ଗୋଦାମ ମାଲିକ ଶ୍ରମିକ ବାସୁଦେବଙ୍କୁ ପ୍ଲାଷ୍ଟିକ ପାଇପରେ ନିସ୍ତୁକ ମାଡ ମାରିବା ଫଳରେ ତାଙ୍କ ମୃତ୍ୟୁ ହୋଇଥିଲା । ଏହା ପରେ ଗତ ୨୩ ତାରିଖରେ ମୁଖ୍ୟ ଅଭିଯୁକ୍ତ ରବିନ୍ଦ୍ର ମୁଦୁଲି, ଡ୍ରାଇଭର ଏବଂ ଅନ୍ୟ ଜଣେ ସହଯୋଗୀଙ୍କ ସହ ଶ୍ରମିକଙ୍କ ମୃତଦେହକୁ ବୋଲେରୋ ଗାଡି ଯୋଗେ ମହାନଦୀର ସିଦ୍ଧମୁଳା ବ୍ରିଜ୍ ନିକଟରେ ନେଇ ଫିଙ୍ଗିଥିଲେ । ପରେ ପୋଲିସ ଜଗତପୁର ଥାନା ଅଞ୍ଚଳରୁ ବାସୁଦେବଙ୍କ ମୃତଦେହ ଜବତ କରି ପରିବାର ଲୋକଙ୍କୁ ହସ୍ତାନ୍ତର କରିଥିଲା । ପୋଲିସ ତଦନ୍ତ କରି କବାଡିଆ ଗୋଦାମ ମାଲିକ ରବିନ୍ଦ୍ର, ୨ ସହଯୋଗୀ ମାନସ ଓ ଡ୍ରାଇଭର ଛବିଙ୍କୁ ଗିରଫ କରିଥିଲା । ଏଥିସହ ଗୋଟିଏ ବୋଲେରୋ ଗାଡି ଏବଂ ପ୍ଲାଷ୍ଟିକ ପାଇପକୁ ପୋଲିସ ଜବତ କରିଛି ।