ଚର୍ଚ୍ଚାରେ ବଲାଙ୍ଗିର ବ୍ଲକ ଅନ୍ତର୍ଗତ ୨୨ ନମ୍ବର ଜିଲ୍ଲା ପରିଷଦ ଜୋନ୍ : କଂଗ୍ରେସ ଗଡରେ କଂଗ୍ରେସକୁ ହରାଇ ବିଜେଡିର ବାଜିମାତ୍
ବଲାଙ୍ଗିର, (କେପିଏନ୍ଏସ୍) : ତ୍ରିସ୍ତରୀୟ ପଂଚାୟତ ନିର୍ବାଚନରେ କଂଗ୍ରେସର ସବୁ କିଛି ଅଙ୍କ କଷା ଏବେ ବିଫଳ । କାରଣ କଂଗ୍ରେସ ଗଡରେ କଂଗ୍ରେସକୁ ହରାଇ ଏବେ ବିଜେଡି ବିଜୟର ବାନା ଧରିଛି । ଏହି ଜୋନର ସମସ୍ତ ପଂଚାୟତରେ ବରିଷ୍ଠ କଂଗ୍ରେସ ନେତା ତଥା ବଲାଙ୍ଗିର ବିଧାୟକ ନରସିଂହ ମିଶ୍ରଙ୍କ ଦବ୍ଦବା ରହି ଆସିଥିବା ବେଳେ ଗତ ଥର ଏହି ଜୋନରେ କଂଗ୍ରେସ ବିଜୟ ହୋଇଥିଲା । କିନ୍ତୁ ଚଳିତ ପଂଚାୟତ ନିର୍ବାଚନରେ ସବୁ କିଛି ଓଲଟା ହୋଇଯାଇଛି । କଂଗ୍ରେସ ଗଡକୁ ଧସେଇ ପଶିଛି ବିଜେଡି । ଏଥର ପଂଚାୟତ ନିର୍ବାଚନରେ ଜିଲ୍ଲା ପରିଷଦ ପ୍ରାର୍ଥିନୀ ଭାବେ କଂଗ୍ରେସ ପକ୍ଷରୁ ଯଶୋବନ୍ତୀ ବଘାର ରହିଥିବା ବେଳେ ବିଜେଡି ପକ୍ଷରୁ ଜିଲ୍ଲା ଯୁବ ବିଜେଡି ସଭାପତି ରାଜେନ୍ଦ୍ର ହୋତାଙ୍କ ଧର୍ମପତ୍ନୀ ଅନାମିକା ହୋତା ବିଜେଡି ପ୍ରାର୍ଥିନୀ ଭାବେ ନିର୍ବାଚିତ ହୋଇଥିଲେ । ତେବେ ଏହି ସବୁ ମଧ୍ୟରେ କଂଗ୍ରେସ ବିଧାୟକ ନରସିଂହ ମିଶ୍ର ଖୋଦ ଏହି ଜୋନରେ ପ୍ରଚାର ମଇଦାନରେ ଓହ୍ଲାଇ ଜନତା ଜନାର୍ଦ୍ଦନଙ୍କ ସମ୍ମୁଖ ହୋଇ ଯେମିତି ଏହି ଜୋନକୁ ବିଜେଡି ଓ ବିଜେପି ଆସିପାରିବେ ନାହିଁ ସେଥିପାଇଁ ଫୁଲ୍ ଦମ୍ରେ ଦିନ ରାତି ଏକ କରି ଲାଗି ପଡିଥିଲେ ବିଧାୟକ ଶ୍ରୀ ମିଶ୍ର । ଅନ୍ୟପଟେ ବିଜେଡି ଦଳ ମଧ୍ୟ ଏହି ଜୋନରେ କଂଗ୍ରେସ ହାତରୁ କଂଗ୍ରେସ ଗଡକୁ ଛଡାଇବା ପାଇଁ ଦିନ ରାତି ଜୋନରେ ଡେରା ପକାଇ ବିଜେଡିର ବରିଷ୍ଠ ନେତାମାନେ ପ୍ରଚାର ମଇଦାନରେ ଓହ୍ଲାଇଥିଲେ । ଯାହା ଆଜି ବିଜେଡିକୁ ଏକ ବଡ ସଫଳତା ମିଳିବା ସହ ସାରା ଜିଲ୍ଲାରେ ଏହି ୨୨ ନମ୍ବର ଜିଲ୍ଲା ପରିଷଦ ଜୋନକୁ ନେଇ ଚର୍ଚ୍ଚା ହେଉଛି ।