ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ସହର ବଢୁଥିବା ସାଙ୍ଗକୁ ଲୋକଙ୍କ ଅବସର ବିନୋଦନ ପାଇଁ ପାର୍କର ଆବଶ୍ୟକତା ରହିଥିଲା । ପୂର୍ବରୁ ମାତ୍ର ୨ରୁ ୩ଟି ପାର୍କ ରହିଥିବା ବେଳେ ଏବେ ସହରର ପ୍ରାୟ ସବୁ ୱାର୍ଡରେ ଶିଶୁ ଉଦ୍ୟାନଗୁଡିକ ନିର୍ମାଣ ହୋଇଛି । କିନ୍ତୁ ଏବେ ପୌରପାଳିକାର ବିକାଶ ତାଲିକାରେ ଆଉ ଏକ ଫର୍ଦ୍ଦ ଯୋଡି ହୋଇଯାଇଛି । ବଲାଙ୍ଗିର-ଟିଟିଲାଡ ରାସ୍ତାର ବିଜାଖମନଠାରେ ଏକ ବଡ ପାର୍କ ଉଦ୍ଘାଟନ ହୋଇଯାଇଛି । ୭ଏକର ଜମି ଉପରେ ୫କୋଟି ୮୦ଲକ୍ଷ ଟଙ୍କା ବ୍ୟୟ ଅଟକଳରେ ନିର୍ମିତ ବଲାଙ୍ଗିର ଉଦ୍ୟାନ (ସ୍ମାର୍ଟପାର୍କ)କୁ ମୁଖ୍ୟମନ୍ତ୍ରୀ ଉଦ୍ଘାଟନ କରିଛନ୍ତି । ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବଲାଙ୍ଗିର ଲୋୟର ସୁକତେଲ ଜଳସେଚନ ପ୍ରକଲ୍ପ ସହିତ ବଲାଙ୍ଗିର ସ୍ମାର୍ଟପାର୍କ ସମେତ ୬୯ଟି ପ୍ରକଲ୍ପର ଉଦ୍ଘାଟନ କରିଛନ୍ତି । ତେବେ ମାଗୁରବେଢାର ଡେମ୍ ସାଇଟ୍ରୁ ମୁଖ୍ୟମନ୍ତ୍ରୀ ଏହି ସ୍ମାର୍ଟପାର୍କର ଶୁଭ ଉଦ୍ଘାଟନ କରିଥିବା ବେଳେ ସଂଧ୍ୟାରେ ରାଜ୍ୟହାଉସିଂ ବୋର୍ଡର ଅଧ୍ୟକ୍ଷ କଳିକେଶନାରାୟଣ ସିଂଦେଓ ଏହାର ଶୁଭାରମ୍ଭ କରିଥିଲେ । ଏହି କାର୍ଯ୍ୟକ୍ରମରେ ବଲାଙ୍ଗିର ଜିଲ୍ଲାପାଳ ଚଞ୍ଚଳ ରାଣା, ଏସ୍ପି ଋଷିକେଶ ଖିଲାରୀ, ପୌରାଧ୍ୟକ୍ଷା ଲିକା ସାହୁ, ଉପାଧ୍ୟକ୍ଷା ଗାୟତ୍ରୀ ଭୋଇ, ପୌରଅଧିକାରୀ ବିଶ୍ୱମ୍ବର ମିଶ୍ର, ପୌରପାଳିକାର ସମସ୍ତ କାଉନସିଲର ଉପସ୍ଥିତ ରହିଥିଲେ । ସଂଧ୍ୟାରେ ରଙ୍ଗାରଙ୍ଗ କାର୍ଯ୍ୟକ୍ରମ ମାଧ୍ୟମରେ ଏହାର ଶୁଭାରମ୍ଭ ହୋଇଥିବା ବେଳେ ସହରର ହଜାର ସଂଖ୍ୟାରେ ଲୋକ ଏଥିରେ ସାମିଲ ହୋଇଥିଲେ । ଦୀର୍ଘ ସମୟ ପର୍ଯ୍ୟନ୍ତ ସାଂସ୍କୃତିକ କାର୍ଯ୍ୟକ୍ରମ ଚାଲିଥିବା ଦେଖାଯାଇଥିଲା । ବଲାଙ୍ଗିର ପଥରଚେପା ଆଦର୍ଶ ବିଦ୍ୟାଳୟ, ଦୁଲଦୁଲି କଳାପରିଷଦ ଓ ଅନ୍ୟ କିଛି ଅନୁଷ୍ଠାନର କଳକାରମାନେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ । ଏହି କାର୍ଯ୍ୟକ୍ରମରେ ପୂର୍ବତନମନ୍ତ୍ରୀ ତଥା ବିଜେଡିର ଭେଟେରାନ ଲିଡର ଅନଙ୍ଗଉଦୟ ସିଂଦେଓ, ଯୁବନେତା ଅର୍କେଶନାରାୟଣ ସିଂଦେଓ ଉପସ୍ଥିତ ରହି ଲୋକଙ୍କ ସହ ସାଂସ୍କୃତିକ କାର୍ଯ୍ୟକ୍ରମକୁ ଉପଭୋଗ କରିଥିଲେ ।।