- ସାମିଲ ହେଲେ ସଂଗଠନ, ବୁଦ୍ଧିଜୀବୀ, ଛାତ୍ର ଓ ଯୁବକ
- ଆଗାମୀ ବିଧାନସଭାରେ ଉପସ୍ଥାପନା ପାଇଁ ଆସିଲା ବିଭିନ୍ନ ପ୍ରସ୍ତାବ
- ନିର୍ବାଚନ ନ ଲଢିବା ନେଇ ଘୋଷଣା କଲେ ନରସିଂହ
- ସ୍ୱାସ୍ଥ୍ୟ, ଶିକ୍ଷା, କୃଷି ଓ ରୋଜଗାର ସମସ୍ୟା ଉପରେ ଗୁରୁତ୍ୱ : ନରସିଂହ
- ପଶ୍ଚିମ ଓଡିଶା ପ୍ରତି ବୈମାତୃକ ମନୋଭାବ ବିରୁଦ୍ଧରେ ହେବ ଜୋରଦାର ଆଲୋଚନା : ନରସିଂହ
ବଲାଙ୍ଗିର, (ଦେବାଶିଷ ମିଶ୍ର) : ଆଗାମୀ ବିଧାନସଭା ଅଧିବେଶନ ହେଉଛି ମୋର ଶେଷ ଅଧିବେଶନ । ଆପଣମାନେ ନିମନ୍ତ୍ରଣ ମୁତାବକ ଆସିଥିବାରୁ ଆପଣମାନଙ୍କୁ ଧନ୍ୟବାଦ ଦେଉଛି । ଜଣେ ବିଧାୟକ ଲୋକଙ୍କ ପାଇଁ କାମ କରିବା ପାଇଁ ନିର୍ବାଚିତ ହୋଇଥାଏ । ସେ ଯେତେବେଳେ ଅନୁଭବ କରେ ଆଗକୁ ଆଉ ଲୋକଙ୍କ କାମ କରିବା ପାଇଁ ନିଜର ସ୍ୱାସ୍ଥ୍ୟ ଅନୁମତି ଦେଉନାହିଁ ସେତେବେଳେ ସେ ଓହରି ଯିବା କଥା । ତେଣୁ ଆପଣମାନେ ଚାହିଁବା ସତ୍ତ୍ଵେ ମଧ୍ୟ ମୁଁ ଆଗାମୀ ନିର୍ବାଚନ ଲଢିବି ନାହିଁ । ଆପଣମାନଙ୍କ ଭଲ ପାଇବା ଓ ମୋ ଉପରେ ଥିବା ଅତୁଟ ବିଶ୍ୱାସ ପାଇଁ ମୁଁ ଆପଣମାନଙ୍କ ସମ୍ମୁଖରେ କୃତଜ୍ଞତା ଜ୍ଞାପନ କରୁଛି ଏବଂ ଆଶା କରୁଛି ମୋର ଆଗାମୀ ନିର୍ବାଚନ ନ ଲଢିବା ଘୋଷଣା ଆପଣମାନେ ନିଶ୍ଚିତ ଭାବରେ ଗ୍ରହଣ କରିବେ କିନ୍ତୁ ଏହା ମଧ୍ୟ ସତ୍ୟ ଯେ ମୁଁ ରାଜନୀତି ଛାଡୁ ନାହିଁ । ମୁଁ ମରିବା ପର୍ଯ୍ୟନ୍ତ ଲୋକଙ୍କ ସେବା କରିଚାଲିଥିବି ବୋଲି ଗତ କାଲି ସ୍ଥାନୀୟ ହୋଟେଲ ସେଲିବ୍ରେସନଠାରେ ବିଧାୟକ ଓ ଜନମତ କାର୍ଯ୍ୟକ୍ରମରେ ଉପସ୍ଥିତ ଥିବା ଛାତ୍ର ଯୁବକ, ସାମାଜିକ ସଂଗଠନ ଓ ବୁଦ୍ଧିଜୀବୀମାନଙ୍କୁ ନିଜ ପ୍ରାରମ୍ଭିକ ବକ୍ତବ୍ୟରେ କହିଛନ୍ତି । ଏଠାରେ ସୂଚନାଯୋଗ୍ୟ ଯେ ବଲାଙ୍ଗିର ବିଧାୟକ ନରସିଂହ ମିଶ୍ର ପ୍ରତ୍ୟେକ ଅଧିବେଶନ ଆଗରୁ ସ୍ଥାନୀୟ ଜନସାଧାରଣ, ବୁଦ୍ଧିଜୀବୀ, ସାମାଜିକ ସଂଗଠନ, ବରିଷ୍ଠ ନାଗରିକମାନଙ୍କୁ ଡାକି ତାଙ୍କଠାରୁ ଅଂଚଳର ସମସ୍ୟା ଉପରେ ଅବଗତ ହେବା ସହ ବିଧାନସଭାରେ କେଉଁ ବିଷୟ ଆଲୋଚନା ହେବ ସେ ପ୍ରସ୍ତାବ ଗ୍ରହଣ କରିଥାନ୍ତି । ସେହି ମର୍ମରେ ଆଜି ସ୍ଥାନୀୟ ଲୋକଙ୍କୁ ନେଇ ବିଧାୟକ ଶ୍ରୀ ମିଶ୍ରଙ୍କର ବିଧାୟକ ଜନମତ କାର୍ଯ୍ୟକ୍ରମରେ ବିଭିନ୍ନ ପ୍ରକାର ସମସ୍ୟା ନେଇ ଆଲୋଚନା ହୋଇଥିଲା । ବିଧାୟକ ଶ୍ରୀ ମିଶ୍ର କହିଥିଲେ ଶିକ୍ଷା, ସ୍ୱାସ୍ଥ୍ୟ, ଜଳସେଚନ, ରୋଜଗାର, କର୍ମନିଯୁକ୍ତି, ଶିଳ୍ପ ପ୍ରତିଷ୍ଠାକୁ ନେଇ ବଲାଙ୍ଗିର ସବୁବେଳେ ଅବହେଳିତ । ଏ ସବୁ ସମସ୍ୟା ପ୍ରତ୍ୟେକ ବିଧାନସଭାରେ ଉପସ୍ଥାପନା ହେଉଛି କିନ୍ତୁ ସରକାର ନିର୍ଲଜ ହୋଇଗଲାଣି । ସଂଖ୍ୟାଗରିଷ୍ଠତା ଗର୍ବରେ ସେମାନେ ଲୋକଙ୍କ ମତକୁ ହେୟଜ୍ଞାନ କରୁଛନ୍ତି । ତେଣୁ ଜନସାଧାରଣ ପ୍ରତିକ୍ରିୟାଶିଳ ହେବା ନିହାତି ଦରକାର କିନ୍ତୁ ଦେଖାଯାଉଛି ଆମର ଛାତ୍ର ଯୁବକ ସାଧାରଣ ଜନତା ଆମ ଅଂଚଳ ପ୍ରତି ରାଜ୍ୟ ସରକାର ଯେତେ ବୈମାତୃକ ମନୋଭାବ କଲେ ହେଁ ଆମେ ପ୍ରତିକ୍ରିୟା ଦେଖାଉ ନାହୁଁ । ତେଣୁ ଯଦି ଅଂଚଳର ବିକାଶ ଦରକାର ଜନସାଧାରଣ ପ୍ରତିକ୍ରିୟାଶୀଳ ହୁଅନ୍ତୁ ବୋଲି ଶ୍ରୀ ମିଶ୍ର କହିଥିଲେ । ଆଲୋଚନା ବେଳେ ଜନପ୍ରତିନିଧିଙ୍କୁ ଗୁରୁତ୍ୱ ନ ଦେବା, ଶିକ୍ଷା, ସ୍ୱାସ୍ଥ୍ୟ, କୃଷି ଜଳସେଚନ, ବାଇପାସ ସମସ୍ୟା, ଜିଏସ୍ଟି ସମସ୍ୟା, ଆଇନଶୃଙ୍ଖଳା, ଧାନର ଅଭାବି ବିକ୍ରି, ଲୋୟର ସୁକତେଲ ବିସ୍ତାପିତଙ୍କ ସମସ୍ୟା, ଗରିବ ଭୂମିହୀନଙ୍କୁ ଘର ଓ ଜମି ଦେବାରେ ଅପାରଗତା, ଦ୍ୱିତୀୟ ବିଶ୍ୱବିଦ୍ୟାଳୟ ଦାବି, ଶିକ୍ଷକ ନିଯୁକ୍ତିରେ ଦୁର୍ନିତି, କୋଶଲି ଭାଷାକୁ ସରକାରୀ ଭାଷା ମାନ୍ୟତା, ଟାଟା ପାୱାରର ମନମୁଖି ଦେୟବୃଦ୍ଧି ସମସ୍ୟା, ବିଭିନ୍ନ ଉନ୍ନୟନମୂଳକ ପ୍ରକଳ୍ପ କାର୍ଯ୍ୟରେ ମନ୍ଥରତା, ବିଜୁ ସ୍ୱାସ୍ଥ୍ୟ ଯୋଜନାରେ ଅସଂଗତିକୁ ନେଇ ଜନସାଧାରଣଙ୍କ ପକ୍ଷରୁ ବିଭିନ୍ନ ପ୍ରସ୍ତାବ ଓ ପ୍ରଶ୍ନ ବିଧାୟକଙ୍କ ସମ୍ମୁଖରେ ରଖାଯାଇଥିଲା । ଏସବୁକୁ ସମୟ ଏବଂ ପ୍ରାଥମିକତା ହିସାବରେ ବିଧାନସଭାର ବିଭିନ୍ନ ସମୟରେ ନିଶ୍ଚୟ ଆଲୋଚନା କରାଯିବ ବୋଲି ବିଧାୟକ ଶ୍ରୀ ମିଶ୍ର ପ୍ରତିଶୃତି ଦେଇଥିଲେ । ସାମାଜିକ କର୍ମୀ ଧର୍ମେନ୍ଦ୍ର ନନ୍ଦଙ୍କ ସଂଯୋଜନାରେ ଆୟୋଜିତ ଏହି କାର୍ଯ୍ୟକ୍ରମରେ ଡା. ଏଲ୍.କେ. ମହାପାତ୍ର, ସନ୍ତୋଷ ଦାଶ, ପ୍ରେମଚନ୍ଦ ମହାନ୍ତି, ନକୁଲ ଅଗ୍ରୱାଲ, ମଲିଆ ଗଡୁଆ, ଦିନେଶ ନାଗ, ବିରଂଚି ବହିଦାର, ଶ୍ରୀମନ୍ତ ପଣ୍ଡା, ସମାୟିକା ନାୟକ, ସଂଜିବ ରଥ, ଲଳିତ ସାହୁ, ସୁଧିର ତ୍ରିପାଠି, ଦେବାଶିଷ ପାଣ୍ଡିଆ, ସଂଜୟ ଗଡତ୍ୟା, ବୁଲୁ ମହାକୁର, ପ୍ରଶାନ୍ତ ପାଣିଗ୍ରାହୀ, ବସନ୍ତ ଆଚାର୍ଯ୍ୟ, ବେଲାର ସିଂ ଭୋଇ, ନିତିଶ ପ୍ରଧାନ, ବାପୁନି ସାହୁ, ବିକାଶ ସା, ଶ୍ରୀପଦା ଷଡଙ୍ଗୀ, ନିବେଶ ପାଣିଗ୍ରାହୀ, ଡା. ସାଗରିକା ମହାପାତ୍ର, ସଂଜୀବ ସାହୁ, ଶ୍ରୀକର ମିଶ୍ର, ମନୋରଂଜନ ସାହୁ, ଶ୍ରୀକାନ୍ତ ଶର୍ମା ପ୍ରମୁଖ ଏହି ଆଲୋଚନାରେ ଅଂଶଗ୍ରହଣ କରିଥିଲେ । ଶେଷରେ ବିଧାୟକ ଶ୍ରୀ ମିଶ୍ର ସମସ୍ତଙ୍କୁ ଧନ୍ୟବାଦ ଦେଇ ଆଗାମୀ ନିର୍ବାଚନରେ ବଲାଙ୍ଗିରର ବିକାଶ ପ୍ରକ୍ରିୟାକୁ ନିରନ୍ତର ଜାରି ରଖିବା ପାଇଁ ଏକ ସଶକ୍ତ ବିଧାୟକ ପ୍ରାର୍ଥୀ ନିର୍ବାଚିତ କରନ୍ତୁ ଯିଏ କି ଜନପ୍ରତିନିଧିର ପ୍ରକୃତ କର୍ତ୍ତବ୍ୟ କରିପାରିବ ବୋଲି କହିଥିଲେ ।