କଳାହାଣ୍ଡି, (ଶୁଭେନ୍ଦୁ କୁମାର ପଣ୍ଡା) : କଳାହାଣ୍ଡି ଜିଲ୍ଲା କଲମପୁର ବେଲପଡା ପ୍ରାଥମିକ ବିଦ୍ୟାଳୟ ପରିସରରେ ରବିବାର ଏକ ଅବସର କାଳୀନ ବିଦାୟ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଯାଇଛି । ବିଦ୍ୟାଳୟର ପ୍ରଧାନ ଶିକ୍ଷୟତ୍ରୀ ସଂଯୁକ୍ତା ମୁଣ୍ଡ କର୍ମମୟ ଜୀବନରୁ ଅବସର ଗ୍ରହଣ କରିଥିବାରୁ ବିଦ୍ୟାଳୟ ପରିଚାଳନା କମିଟି ଏବଂ ଛାତ୍ର ଛାତ୍ରୀମାନଙ୍କ ପକ୍ଷରୁ ଏହି ସମ୍ବର୍ଦ୍ଧନା ସଭାର ଆୟୋଜନ କରାଯାଇଥିଲା । ପ୍ରଧାନ ଶିକ୍ଷୟତ୍ରୀ ଶ୍ରୀମତୀ ମୁଣ୍ଡ ୧୯୯୦ ମସିହାରେ ଜୁନାଗଡ଼ ବ୍ଲକ କଣ୍ଡରି ପଦରରୁ ତାଙ୍କ ଶିକ୍ଷକ ଜୀବନ ଆରମ୍ଭ କରିଥିବାବେଳେ ଆଜି ଅବସର ଗ୍ରହଣ କରିଥିଲେ । ସେ ଜଣେ ମିଷ୍ଟଭାସି, ନମ୍ର, ଛାତ୍ର ବତ୍ସଳା, ଜଣେ କର୍ତ୍ତବ୍ୟପରାୟଣା, ଜଣେ ସୁ ସାହିତ୍ୟିକା, କବୟିତ୍ରୀ ଏବଂ ମେଳାପୀ ଭାବେ ନିଜର ପରିଚୟ ସୃଷ୍ଟି କରି ପାରିଥିଲେ । ବିଦ୍ୟାଳୟ ପରିଚାଳନା କମିଟି ସଭାପତି ଅଣାକାର ରଣାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସଭାରେ ସରପଞ୍ଚ ସୂର୍ଯ୍ୟକାନ୍ତୀ ପଣ୍ଡା ମୁଖ୍ୟ ଅତିଥି, ଏବିଇଓ ଦିଲୀପ ବେହେରା ମୁଖ୍ୟ ବକ୍ତା, ପୂର୍ବତନ ସରପଞ୍ଚ ଚତୁର୍ଭୁଜ ପଣ୍ଡା, ଦେବେନ୍ଦ୍ର ସାହୁ, ସାଇରମ ପଣ୍ଡା ପ୍ରମୁଖ ସମ୍ମାନୀୟ ଅତିଥୀ ଭାବେ ଯୋଗଦେଇଥିଲେ । ଅତିଥି ମାନେ ଶ୍ରୀମତୀ ମୁଣ୍ଡଙ୍କ କର୍ତ୍ତବ୍ୟନିଷ୍ଠ, ବିଦ୍ୟାଳୟ ଏବଂ ଛାତ୍ର ଛାତ୍ରୀମାନଙ୍କ ପ୍ରତିଥିବା ମମତା ସମ୍ପର୍କରେ ବକ୍ତବ୍ୟ ରଖିବା ସହ ସେ କେବଳ ଜଣେ ଶିକ୍ଷୟତ୍ରୀ ନ ଥିଲେ ସେ ଏକାଧାରରେ ଜଣେ କବୟିତ୍ରୀ, ଗାଳ୍ପିକା ଏବଂ ସମାଜ ସେଵୀ ବୋଲି ମତବ୍ୟକ୍ତ କରିଥିଲେ । ବିଦ୍ୟାଳୟର ପୂର୍ବତନ ଛାତ୍ର, ଶିକ୍ଷକ କର୍ମଚାରୀ, ଅବିଭାବକ, ଅଭିଭାବିକା, ଏବଂ ଗ୍ରାମବାସୀ ଉପସ୍ଥିତ ରହି ତାଙ୍କୁ ମାନପତ୍ର ଉପଢୌକନ ପ୍ରଦାନ କରି ଭାବ ବିହ୍ଵଳ କୃତଜ୍ଞତା ଜ୍ଞାପନ କରିବା ସହ ନିରାମୟ ଜୀବନ କାମନା କରିଥିଲେ । ଶ୍ରୀମତୀ ମୁଣ୍ଡ ମଧ୍ୟ ତାଙ୍କ ବିଦାୟକାଳୀନ ବକ୍ତବ୍ୟରେ ମୁଁ ବିଦ୍ୟାଳୟରେ ଦୀର୍ଘଦିନ ଧରି ଥିଲି ଏବଂ ଆଗାମୀ ଦିନରେ ମଧ୍ୟ ମୋ ସହଯୋଗ ରହିବ ବୋଲି ଭାବବିହ୍ୱଳ କଣ୍ଠରେ ପ୍ରକାଶ କରିଥିଲେ । ପ୍ରଧାନ ଶିକ୍ଷକ ମନ୍ମଥ ମିଶ୍ର କାର୍ଯ୍ୟକ୍ରମ ପରିଚାଳନା କରିଥିଲେ । କାର୍ଯ୍ୟକ୍ରମ ପରେ ସମସ୍ତେ ମିଶି ଏକ ଶୋଭାଯାତ୍ରାରେ ଶ୍ରୀମତୀ ମୁଣ୍ଡଙ୍କୁ ବିଦ୍ୟାଳୟରୁ ତାଙ୍କ ବାସଭବନ ଯାଏ ନେଇଥିଲେ ।